فوق هام السحب ( الشعر الشعبي) على متن القوافي

‏يامن احبـك خاطـري بالجفا ضاق
وبُعــدك عليا صـاب قلبي بضيقه

قلبي قسم بالله يحــرق بالاشواق
والشوق في صدري مولع حريقه

يامن احبك غيبتك صعب تنطاق
قلبي بدونك عايشن وسط ضيقه

ماريد تبعد يوم عن ضو الاحداق
ولا اطيق بُعدك ولو هي دقيقه



......

‏يا الله يامن فــوق عرشـــك تعليت
يامــن تدبـــر كل زينـه وشينه

ادعيك تغفر لي خطايا اذا اخطيت
وتمسح ذنوبي كل ذنبٍ بحينه

يارب يااللي لك عبـــدتك وصليت
عبــدك لجا لك يا إلهي تعينه

ترزقني الراحـــــه علــى ماتمنيت
وتملا حياتي بالفرح والسكينه


بقلمي

‏الصمت بوح لبعض حالات الانسان
يشــرح لـه أحزانه ويشــرح سروره

حتى ترى الشاعر وهو شاعر أحيان
يحتاج له شاعـــر يترجــم شعوره

وانا بجو الصمت مدمن به إدمان
أخفي ورا صمت المحاني كسوره

ماحـب احكي ما بقلبي من احزان
وصمتي يترجم كبر ضيقي وجوره



......

يارب تعرفني وتعرف نواياي
وتعرف جميع ظروفي المستبده

احيان اصيب الراي واضيع الراي
واحيان افتح باب واحيان اسده


......

ياقلبي ادري داخلك شي حساس
لاباس وان كانت جروحك كثيره

حزنك وضيقك وانفرادك عن الناس
صدقني انها بعض الاحيان خيره

بقلمي

اعط الحقوق لراعي الحق لا اخطيت
وحاول مثل ماتـاخذ الـحـق تعطي

مـاهوب عيب ان قلت مخطي وزليت
العيب تنكـر زلـتـك وانـت مخطي


بقلمي

من ينتظر رد الجمايل من الناس
كفه على فعل الوفاء لا يمده

واللي يبي له ذكر طيب ونوماس
شيٍ يسوي للبشر لا يعده


بقلمي

الناس ماعادها بالطبع تتشابه
ماعاد بالارض واحد يشبه الثاني

تدري متى الشخص مايسال عن اصحابه
لا صار حتى مع الاصحاب وحداني

وتدري متى الشخص مايشتاق لاحبابه
لاصار في قربهم مهموم ويعاني

وتدري متى الشخص مايتمالك اعصابه
لا صار مجني عليه ويعتبر جاني


بقلمي

بعض البشـر محتـاج للذوق خبره
عنـدي نصيحه له على مر الازمان

المرء باخلاقه وذوقه وفكره
وبروعة اسلوبه يصير اجمل انسان

بقلمي

الطيب جمع ناس لا عرق فيها
والحقد فرق ناس من صلب جدان

عمر الردايا ما تمثل ذويها
والطيبين اخوان لو ماهم اخوان


بقلمي