فوق هام السحب ( الشعر الشعبي) على متن القوافي

يا فاعل الخير لاتحصي وتستكثر
اعمالك اللي لوجه الله تسويها

صحّح نواياك لا زليت واستغفر
تكسب رضا خالق الدنيا ومفنيها

اللي بذكره قلوب اهل التقى تطهر
والنفس بالطاعة العظمى يزكّيها

يافاعل الخير قدّم واحتسب واصبر
والناس مهما تحاول صعب ترضيها


رجا عوض العازمي

لا تخلي ماضي جروحك يهدم احلامك
المصايب ما تطيح الا براس الطيب

جعل يسقئ ياحبيبي يوم كنت حزامك
كل ماضاقت اضيق بضيقتك و اغـيّب

فدوتك ماراح وابشر بالعوض قدامك
ابك انا سقت المصايب لين راسي شيّب

ماقدرت اكافح الضيقه بعز ايامك
كيف تبغاني اكافحها و منت قريّب


علي حامد

حكمة الصمت منها عزة النفس ملت
عزتي للصراحـه والنفوس الصـريـحـه

في زمـنـا الاوادم عـن شيـمها تـخـلت
والنوايا تسودها الوجيــه الـقـبـيـحـه

كـل ماجـامـل الـعـالم تـمـادت وزلت
ان سكتنا فضيحه وان هرجنا فضيحه


محمد بن موفي

‏ترى الغرور يحوّل الرجل من فوق
بين الرجال ايصير ماله مكانه

ابليس يلعب فيه ويحط به عوق
واللي يطيع ابليس يلقى الاهانه

من يفتقد للدّين والطيب والذوق
مثـل الذي خان العهد والامانه

كن الفكر عنده معطّل ومسروق
مثـل البهيـمه راح غلطة زمانه

ابو محمد

صكات بقعا تنطح الأدمي نطح
والرابح اللي معه صبر وعزيمه

ماكل من باع وشرى فاز بالربح
احيان راس المال ربح وغنيمه

والمرجله والدين والخاطر السمح
من دونها الرجال من غير قيمه

ولاهان من يمناه ماتعرف الشح
في سلمه ان الشح ضلم وجريمه


جري بن عبيد

يقولون من خاف القضا جنّب المحراف
تركّد على عمرك ترى العمر له قيمه

وانا اقول ماتسلم من الموت ياخوّاف
لو إنك تموت بدون طقّه وتعليمه

ذليله حياة اللي مايعرف ولا ينشاف
لو إنه بخير ونعمه وراحه مقيمه

عساها فدا راسي وانا اعدّي المشراف
اناطح مقاديم السحاب بمقاديمه


......

مالقيت أمحق مصايد من شفوف النفوس
والنفوس اللي توالف ما كانت تنفره

والشيوخ اللي تخضّع على شان الفلوس
والثريّ اللي يلقّي المواجيب إظهره

والضعيف اللي يحرّك مثل حرب البسوس
والقوي إن هاز حملٍ خفيف ولا إقدره

والكلام اللي ورى درفة الصدر إمحبوس
لا ظهر في غير وقته وهِمّش جوهره


......

‏يا رفيقي ما ورى الدنيا وأهلها طمعه
والأماني ما تحقق حلم للمتحلّم

أجتهد فالدين دام الدين راس السمعه
وأستعن بالله وخلّك للسفر متولّم

حظ من حول لوجه الله تعالى دمعه
وكل ما ضاقت به الدنيا سجد ما كلّم

وتدري الخسران منهو في نهار الجمعه
اللي ما صلى على وجه الرسول وسلّم


......

انا لي ثلاث سنين ضرفي عديم اخلاق
قعد للإماني من عناده يعاندها

تركني رهين هموم مدري رهين اشواق
على حاجتن لي عدة سنين فاقدها

بعد صار من بيني وبين الشفوف فراق
صدوف الزمان الجايره من يجاهدها؟

دروب السعه لو من وراها تعب وارهاق
ابا اروح معها قبل ماروح مع يدها


متعب جريس

ماعاد فينا حيل لمجاهد الناس
من زان زنا له ومن شان شنا

الكفو يربطنا معه مذهب و ساس
ولا ردي الراس .. ماهوب منا

سوالف عيال الهواين وجع راس
ماغير حنا اللي .. وحنا وحنا

قلو هل الافعال والدرع والطاس
و كثرت مرددت الكلام المغنى

سعود ابو ذراع