اخترنا لكم

هنا والقصيد العذب بسم الله الرحمن
‏يديني على قلبي وقلبي وش يساير

‏عسى الغالي اللي كنت اداريه مهما كان
‏ما يهدم مقرّه ريحً من الهجر ساير

‏على كثر ما كنت اهتوي عودّه الريان
‏يراودني ان القلب يشكي رعي جاير

‏ذبحني وقوفي بين لحظة قلق وامان
‏وانا اللي يوقف وقفتي ماهو بحاير

‏ادور على طاري يجيبه من أي لسان
‏لو يجيبه الطاير تعلقت بالطاير

‏اثر لكة البندق مثل صدّة الخذلان
‏تشوف المشاعر و الفشق حالهم باير

‏ترا اللي يذوقك الجفا يا غصيْن البان
‏مثل من يحط القيد في قبضة الثاير

‏عرفت انك تذوق المراره من الحرمان
‏مثل ما عرفت ان الظبا بينهم ذاير

‏وانا اللي يقول لسانك اعبر من البركان
‏محلفّك بالله لا يعوّد علي فاير

‏معك مستعد انسى المصايب قدر إلامكان
‏لو تقول وش صاير لنا ؟ قلت وش صاير

.....

‏تهزّع على ماشفت من عِرق يا محلوّ
‏ترى كل مرّه تسرق القلب واطوّف

‏تخيلك عيون الناس كنها تخيل النوّ
‏وانا اللي عيونه تختصر كل متشوّف

‏تعاريج صوتك تعطي البال زينة جوّ
‏لا غابت تقول انّه من العالم امعوّف

‏لأن ما بقى في الوقت شيً مثل ما هو
‏انا اللي معك من كل الاشياء متخوّف

.....

‏الظلام اللي بصدره ودي ادري وش ينيره
‏كيف شاف البعد راحه والمفارق شي عادي

‏موتة الاحلام فيني كنها موتة ضميره
‏لا جميل ولا حنين ولا حياة لمن تنادي

.....

نجامل قلوبنا من باب بكره تزين
‏ونحمل صدورنا شي ما تستحمله

‏نداري شعورنا مخافة انها تبين
‏واظهارها مشكله واخفايها مشكله

.....

غفلنا عن الدنيا ودارت بنا بسكات
وضحكنا وأثر الأيام ماهي بضحاكه

.....

غلاك ما يحتاج توثيق وحلوف
‏الله خلق حبك من الحب فيني

‏عزفت نغمة عشق عن كل معزوف
‏وسكنت في قلبي وروحي وعيني

‏أغلى المشاعر جتك في شعر وحروف
‏قلبي كتبها قبـل تكتبها يميني

.....

‏أنا فدا اللي ما انتظر مني أعذار
‏وما لامني وأنا أستحق الملامه

‏ما غير ينشد عن علومي والأخبار
‏أخَّر عتابه لي وقدم سلامه

.....

‏صاحوا تناخوا دوّروا بي عذاريب
‏تجمعوا ليلة وزا سولفوا بي

‏أثري مسوي بالقلوب الأعاجيب
‏وأنا مثل وجه السماء نقش ثوبي

.....

‏وشلون مااكتب لك شعر وأرفع الصوت
‏وأنـت الـــوزن والقافيــه والمعانـي

‏تبينـي أكتـب بيـت راح أكتب بيوت
‏راح أشـعـل الليله قصيد وأمـانـي

.....

‏الغـلا والشــوق ما نخــفي شعـــوره
‏خص لا صار الوله في القلب واضح

‏ اخــتصر ما قاله العذب ابو نــوره
‏ كيف نخفي حبنا والشوق فاضــح

.....