سلام يا شمران

سلام يا شمران من رأس رجال=يعرف حقوق الطيبين ويجي بها
نقولها وكم واحد(ن) قبلنا قال=شمران عز وحظ من يعتزي بها
أهل الكرم والجود وكبار الافعال=صعب(ن) على الشعار تعداد طيبها
جبال ياشمران في قمة جبال=الا نجوم في السما تعتلي بها
كل أبلج(ن)منكم على الطايلة طال=والطايلة ما كل واحد يصيبها
وصميدع(ن) (دعوة) على كل عيّال=يخشى منه نمر القبايل وذيبها
بيوتكم للجار والضيف مدهال=كل الكرم فيها ومنها وقريبها
جيراننا شمران ذربين الافعال=هل فزعة(ن)يوم اللقا يندري بها
يوم القبايل كانت حروب واهوال=قليبنا تشرب ونشرب قليبها
وكم واحد(ن) منّا وله عندكم خال=وانتم قبيلتكم تشرف نسيبها
وأنا من أكلب، وأكلب زحول وثقال=أجدادنا زحول(ن) وحن نقتدي بها
حنا بني تغلب على روس الامثال=هل قالة كليب التي نعتزي بها
أول عيال تحط للخيل خيّال=وشبانها تمشي على درب شيبها
مجد(ن) قديم ومجد حاضر ولازال=المجد في مستقبله من نصيبها
حنا لنا بين السماكين منزال=ودعوة بني خثعم ترانا نجيبها
وحنا هل الوديان والغرس والمال=يوم كانت الغرثان يسمع نحيبها
وحنا هل البل لاتقولون ما قال=بالخيل نحميها ونشرب حليبها
وحنا سوالفنا لها ذوق وجلال=من قال منّا كلمته يعتني بها
هل أرحبوا لاشافوا الضيف في الجال=حفاوة(ن)بالضيف منا حضي بها
ولنا معاميل وفناجيل ودلال=ولاباحت الدلة دفقنا سريبها
قد قالها القناص شاعر وهيال=له كلمة في الكيف ياطيب طيبها
يمنى عدو أكلب كذا تعود شمال=أكلب هل الردات يتعب طليبها
واليوم كل(ن) في ذرا طيب الفال=ابن الامام اللي علومه حكي بها
من الكويت أعمل لها هجنه اعمال=تسمع مع جرد البلاقع خبيبها
ومدت له الجزيرة يمينها ونال=حبيبة فرحت بمقدم حبيبها
وتوحدت في ظل عدله ولا زال=العدل فيها والملك يرتقي بها
هذا هو الواقع وهذا هو الحال=والله يكفينا الليالي وغيبها