فوق هام السحب ( الشعر الشعبي) على متن القوافي

‏مشتاق لك واحســاس قلبي يناديك
وعينــي على شوفك تخايل بصـرها

الروح ذابــت يابعـــد روح مغليك
والنفس تعبت مـن غيابك كسرها

يا كم سهر قلبـي وشوقــه يناديك
يحاكي السما منك ويسـال قمرها

وينك قسم نفسي ترى ذايبه فيك
والروح مشتاقه وبُعــــدك أسرها

......

‏ارحـب على خشمـي تراحيـب الامزان
يا اللي غـلاك بداخـــــل الروح ماكن

قلبي وروحـــــي يا غلا الروح ميدان
اسرح وامــــرح في جميــع الاماكن

مادام قلبـــي مارضي غيــرك انسان
خليك واثـــــق في المحبــه وراكن

انت الوحيـد اللي خفوقي له اوطان
وانت الحبيب اللي في القلب ساكن

......

‏ماكنــت متوقــع جمــالك بها الشكل
ولاكنـت اظــن انك مـلاكــن سماوي

كنت احسب انك مثل ماباقي الخلق
اثر البشر فــي الزيـــن مو بالتساوي

سبحان من افرق جمـالك على الكل
واطغا جمالك عـن جميـع النساوي

وجمـلك بأوصــاف ماشفتهــا قبل
مثل القمر في الليـل لحظة يضاوي

......

‏دايـم افكر فيــك واعيــش الاوقات
في يآس يحـــرق يا حياتــي حياتي

ياكيــف مااحبــك وانت المسرات
وانته في الاعمــــــاق كـل امنياتي

ياللي بنيت بداخـل القلب ميقات
وزرعت حبــك في كيانـــي وذاتي

وحدك تربعت الحشا انت بالذات
يابلسم اجراحـــي وبسمة شفاتي

‎......

‏يا غلاي الرووووح ولهـانـه عليك
ياغلاي النفس واحساسي معاك

ياغلاي القلب في قبضة يديك
ياغلاي ارحـم متيـم في هواك

ياغلاي العقل مالحظه نِسيك
ياغلاي البـااال والله مـانساك

ياغلاي بخافقـي مالك شريك
ياغلاي بخافقـي مالي سواك


......

‏اناشــــدك بالله يا شــــوق باللهون
قلبي فقـد يا شـــوق كامــل عزومه

على الحبيب اللي في الروح مدفون
الغايـــب اللي في خيالـــي رسومه

ياشوق خذنـــي وين ماكان ويكون
ودي ازور الحـــب واعــرف علومه

حتى ولو قالـــوا لي الناس مجنون
انا اعرف المجنــون ماحــد يلومه

......

‏يا ما كتبـت اشعـار وابيـات وحــروف
ونشرتهـــــا ماشفــــت اي استجابه

وقلت في نفسي يجــي يوم ويشوف
اشعـــاري اللــي قلتهــــا في عتابه

اشعار تحكي قصـة انسان مشغوف
في عشـق من احــرق فؤادي غيابه

دونتها من شوق واحساس ملهوف
وقلب قاسىَ فــــي غرامــه عذابه

......

‏يا نــوم صارحنـي وقـــول الحقيقه
ويـش المشاكـل بينـك انته وعيني

متفارقيــــن وكل مــن في طريقه
ومرت على ذاالحال عدت سنيني

يانـوم!! عينـي زوجتك مو طليقه
ليش الجفا والحقد هذا الدفيني

إتصالحو كثــر السهــر ما اطيقه
والله حـــــرام اللي تســووه فيني


......

‏يا ليـــل لي موعــد مع النوم يا ليل
لاكن عيونــي ساهــــــره ما توده

راح المساء ماعاد لي بالسهر حيل
وكثر السهر للجســـم ياليل هده

ياشوق سابق بالحشا صهوة الخيل
هدي على الاضلاع يا شوق هده

انت السبب في سهرتي لاخر الليل
والي وقف نوم الهناء عند حده


......

‏علاقتـــــــي بالناس مثــــــل الاخوه
محال افرق بين الاخـوه والاصحاب

طبعي اذا صاحبـــت اصاحـب بقوه
وانصح في الصحبه ولاهُم الاتعاب

واقــدر الصاحــــــب وقــدر سموه
وارفع مكانه واحفظه بين الاهداب

......