فوق هام السحب ( الشعر الشعبي) على متن القوافي

‏ما فيه ثانــي ولا ثـــالث ولا رابع
‏أنت احبَب أحبابنا واقرب قرايبنا

‏عزالله إن الهوى والحب له طابع
‏وا لشوق لو نسفهه جايبنا جايبنا

‏قام يحــدانا لقربك شوقنا النابع
‏الين ناخــت على بابــــك ركايبنا

‏ترى فراغاتـنا اللـــي بين الأصابع
‏ما خلقت إلا عشان أيدي حبايبنا

......

أسر يالليل القصير اللي تفاصيلك طويلة
‏العوض في ليلةٍ ما تظلم الدنيا بختها

‏في رحاب الأرض ساعاتً دقايقها ثقيلة
‏يتساوى عندي اللي فوقها باللي تحتها

‏التظاهر بالفرح غير التظاهر بالفضيلة
‏أتركوني مثل مااعرف نفسي اعرف مصلحتها

‏ودي أبعد عن جدال و ودي أقرب من جديلة
‏لين أجدد في زوايا البال ذكرى راعيتها

‏و العيون اللي ما شدّ أنظارها ، برق المخيلة
‏ما تحب من الدروب الا الدروب اللي مشتها

‏من يبي يخلي سبيل الشوق من يخلي سبيله
‏والمشاعر من يجاوبها على كثر اسألتها !

‏كل ما هامت بوجه مستحيل القى بديله
‏قالت اجمل مرحله فالعمر كانت مرحلتها

‏وصلها اللي ماقدرت انسى لياليه القليله
‏ليت ربي قاسم له طول من طول رقبتها

‏بين رغبات الحياه الممكنه والمستحيله
‏العبر من يعرف اولها سلم من تاليتها

‏مامعي لك حيل يا قلبي ولا لك معي حيله
‏صبرك اهون من مشاوير ماتحمد عاقبتها

‏لا انت ميت من هوان ولا انت ميت من فشيله
‏ما لك الا موتة وحده متى ماجتك متها


......
‏

ياسيّدة بيض العذارى والسمر
‏سبحان من كملك يالغض الفتون

‏من يوم شفتك ابتداء فيني عُمر
‏وأمنت بأن الحب من نظره يكون

‏انا دخيل العيون والنظرات
‏والعقد والفستان واطياب الدخون

‏والجادل اللي تحت ردفك انهمر
‏همار شلالً على سفح المتون

‏الوجه ذا مخلوق من طين القمر
‏ولا خلقه الله من اطراف المزون

‏والريق هذا من لبن ولا خمر
‏ولا عسل مسكوب من بين السنون

‏هاتي شفاتك واغمري شفاتي غمر
‏بسكر وانا ماني من اللي يسكرون

‏ضمّي ضلوعي واقطفي ضلعي ثمر
‏ضمّت ضلوعك ازهرت جرد الغصون

‏واخذي عهد مني وانا عهدي امر
‏ماهان فيني لو على غيري يهون

‏اني ما خونك لو هنى حبّك جمر
‏وان كان خنتك ياعسى حظي يخون

......

ياوجودي كان مايفرق وجودي
‏في عيونك ياصفى البال المعكر

‏واقف بمرجلتي وطيبي وزودي
‏وقفة الراجي ورا الباب المسكر

‏ياملامح رحلتي واصدق وعودي
‏ ماني بنـاسي)؛ على شان أتذكر

......

‏ماني بناشد عن الي مانشد عنّي
‏والي نشد عني انشد عنه و امره

‏من طبعي اواصل الصاحب : ولكنّي
‏لاشفت ماهو جدير ألغيه بـ المره

‏له مني الطـيب لا شفته وله منّي
‏اذا نصاني بـ حاجه فعلٍ يسره

‏اما اتعنى وهو ماهوب متعنّي
‏هـذي تنقص على الرجال وتضره

......

‏يا كم تمرّ ظروف وتعدّي ظروف
‏ما نزعل من أقدارنا لا ابتلينا

‏تعدّي الأحلام وعيوننا تشوف
‏وبما كتب ربّي علينا رضينا

‏نطيب مانرجي من الطيب معروف
‏ونتجاهل أخطاء الخلايق علينا

‏واذا تجاهلنا ترى ماهو بـ خوف
‏اللي منعنا تربية والدينا

......

يا رعاك الله ترى للوعي ..قصه
‏والتجارب في الحياة اكبر رسالة

‏احلم وحافظ على قولك .. ونصه
‏الوعي لا تهرج الا من خلاله

‏كل يوم هذب انفاسك بحصه
‏الصبر محمود في جوهر مجاله

‏العجل ضيع على شرواك فرصه
‏والفرص مره ورجعتها محاله

‏التجاهل خل في فكرك مقصه
‏قص به مايزعجك في كل حاله

‏من يبي يحجز مكانه في المنصه
‏يصحب اهل الطيب ورموز الشكاله

‏يارعاك الله إترى فى البال غصه
‏والجواب يكون من مطلع سؤاله

......

‏الكريم اليا عطا شي مايذكر عطاه
‏راهيٍ جوده وعنده على الطيب رهوه

‏والبخيل ان كان قهواك مره فالحياه.
‏كل يوم يقول سويت لفلان قهوة

......

احاول اكمّل عمري الجاي بـ النسيان
‏من اوّل ما شفتك لين ليلة م ودّعتك

‏فقدتك وأنا أكثر شخص خايف من الفقدان
‏كثر ما أتمسّك فيك بالوقت ضيّعتك

‏الأيام زحمتها مُخيفه على الإنسان
‏لو أقدر أرجّع شيء في العمر رجّعتك

......

‏تبختري بين التواضع والغرور
‏وأخذي من أبيات الغزل ماتشتهين

‏ومري على قصايدي مثل البخور
‏لين اتنفس شعر مهوب اكسجين

‏الحب إذا ماكان لك ماهو شعور
‏والشعر إذا ماكان لك ماهوب زين

‏وكل الكلام اللي على بالي يدور
‏يضيع في ضحكه وفي غمازتين

......