اخترنا لكم

‏بعض المشاعـــر لوكتبنا بها ابيات
‏تعجز حروف الشعــر والقاف عنها

‌‏مهما كتبنا وابدع الحــرف هيهات
‏ينصف مشــــــاعر شاعرٍ قد رهنها

.....

‏فل الحجاج وخل نفسك خفيفه
ترى التواضع زين بين المخاليق

وخلك كريم وخل نفسك شريفه
ما دام عز النفس طبع المطاليق

.....

ماني وانا كحيلان هافي عرفتيه
انا الحصان اللي ينومس حضوره

لا تستفز اللي عظيمه مباديه
ولا لا تحاول تخرجه عن شعوره

صحيح شاعر واحكر القاف وابنيه
وارسم على حيط الزمان الف صوره

انسخ جزيل الحرف وابدع و اغنيه
واحرص على اللي يختلف في ظهوره

شعري كما حرا سما في مراقيه
يطرب له اللي مرتكي في قصوره

يبعد عن الهزله و ينبذ هل التيه
ويجاري الابداع لا حان دوره

حابس العطوي

راكب اللي لا همزته قام ثاير
وارد النيسان راحه ما تمله

اسوداً غيرت زيته و التواير
منوة اللي مغترب عن دار خله

عيني اللي حابسه زرق العباير
حايره والدمع عيّت لا تهله

من وليفاً مع ضروف الوقت جاير
ماخذاً عقلي و قلبي مستحله

حابس العطوي

هاذي تبوك الورد ماهيب باريس
وقمة جبال اللوز تفرق عن الالب

دار النشاماء جالبين النواميس
اللي غلاها ساكناً داخل القلب

حابس العطوي

يا راقياً رجم العنى يوم غنيت
قصدك تهيّض حين قافك بنيته

واللي يلوم اهل القلوب المناحيت
عله فدا للي طعنك و جفيته

لا هزني شوقٍ و ذكرى بتناهيت
افز و انطق باسمها ما نسيته

يا نور عيني وين عني تواريت
وانت الوديد اللي بغيت و هويته

والله لولا الدين قبل الهلافيت
لابكي على فرقاك عمراً رجيته


حابس العطوي

القاف لانه برز دوره
وانته حكيماً و متنبي

وتغوص في غبة بحوره
وتستخرج الدُر و تنبي

افهق عن اللي طفى نوره
وكر الخنا مابه الطبي

عشيق ليلي و ديجوره
مشرف على الضلع واشبي

ما همني فاقد شعوره
ولا هزني جاهلاً سبي

نفسي على العز مفطوره
مسلم على ماكتب ربي

اللي عن الذل مقهوره
يوم المقادير تلعب بي

اطيب و الروح مسروره
لو قاسي الوقت بي ذبي

اعلنت بالشعر لي ثوره
هذا صداها بدا يجبي

حابس العطوي

اقسى شعور يزيد فيك المواجع
صدمه قويه من قرايب و خلان

قلبك لهم اصبح شبيه المهاجع
يشفق عليهم من تردي وخذلان

و فرشت عينك فرش مثل المضاجع
جفناً مغطيهم و جفناً لهم لآن

تبغى تصارحهم و غصباً تراجع
صبرك على جرحك ولا يشمت فلان


حابس العطوي

من دمج بالذات في وقت الاصيل
اكتمل سحر الطبيعه الخارقه

الغروب بداية العشق الجميل
‏ليلي اللي كل عمري سارقه

جوك الهادي وكيف وحس خيل
شكلن صوره جميله فارقه

ذكرتني قسوة ايام الرحيل
يوم كانت شمس حبي شارقه

‏‌ حابس العطوي

وش بك تناحيت يالغالي
وابعدت عني مهي العاده

هجرتني يابري حالي
واشعلت بالجوف وقاده

ما دمت في دنيتك سالي
اذكر وليفا جفى وساده

عشقه عفيفاً ولا زالي
عايش مع الليل وسهاده

لك منزلا عندنا عالي
سبحان من ثبت اوتاده

اسمك غدا بوسط جوالي
شيخة عربها من الساده

عشيق ليلي و موالي
والعين بالدمع جواده

يا بنت لو الزمن طالي
والروح بالجسم منقاده

مانساك يامعرّب الخالي
يا شف قلبي و ميعاده

والحين ياسمح الاقبالي
ياخشف ريما مع ارياده

ببعد و لا زلت رحالي
نفسي عن البيض صداده

حلفت لا اميل عقالي
واشوم عن ناس نقاده

حابس العطوي