ديوان قصائد لشعراء المملكة العربية السعودية (متجدد)☘️☘️

» بدر بن عبد المحسن » عطني المحبه

عطني المحبة ..
كل المحبة .. عطني الحياه..
عطني وجودي ..
ابغى وجودي .. أعرف مداه
املا شعوري .. بالحب مره
ابغى هواكم.. حلوه ومره
وأغلى الأماني .. عاشت في غربه
ياعمر ثاني .. عطني المحبه
عطني في ليل الياس شمعه ..
وبسمة نهار..
عطني في ضياع العمر دمعه..
وسكة ودار ..
واعطيك أمل في الحب غالي ..
يصعب على غدر الليالي ..
وأغلى الأماني .. عاشت في غربه
ياعمر ثاني .. عطني المحبه

» بدر بن عبد المحسن » عض النواجذ


أقوم بجبالٍ ولا أقيم في سفح
لو أطعموا لحمي لعوج المخالب
يابنت مابه ذنب يصعب على الصفح
كود الهوان وعيش سحم الثعالب
لاوالذي كرّم جديلك عن النفح
العز ماهو بين شاري وجالب
الله خلقنا .. تلفح وجيهينا لفح
حر السمايم في عزيز المطالب
سوى رضينا أوطفح كيلنا طفح
عض النواجذ طبع والطبع غالب

» بدر بن عبد المحسن » ظما الشمس

الله يعلم إني حاولت .. حاولت
أسند على كفي السما .. وأناظر الشمس
أشرب عن عيونك ظما
أشرب ظما الشمس
وقلتي عسى ... جفنك عسى مايحترق
حاولت ماأغمض عيوني
حاولت أنا .. ما نفترق
..آه لو تدرين لوتدرين
لاعوّد العاشق حزين
يمشي على جفن وجبين
عزاه يالقلب الشجاع
ضاع الأمل .. وما لك عذر
من لمست عيوني الشعاع
زندي أنثنى .. ورمحي أنكسر
إن لمسني حزنك الطاغي
بغطي وجهي الوجل بيدي
وجرحيني .. جرحي .. جرحي
ثم ابعدي
ريحي الصمت بكلام
آه .. لو كلمة ملام
إرجعي تحت الظلام .. عوَّدي
في سنا القلب اللي توه يحترق
غمضت أنا عيوني
غمضت أنا عيوني
ياإنت بنفترق
والله يعلم .. إني حاولت

» بدر بن عبد المحسن » قادر الله

قادر الله .. قادر الله ..
يالغضي ..قادر الله
نلتقي فـ وسط الطريق ..
خطوة مني ..وخطوه منك
شارع الفرقه .. يضيق
قادر الله ..
والمحبه .. هي من الله
حطها وسط القلوب ..
قلب يتهنى بشبابه ..
وقلب يتعذب يذوب ..
قادر الله .. قادر الله ..
لا .. ولا ياابو سن ضاحك ..
منك ما شفنا عبوس ..
ما تعودنا نشوفك ..
إلا بهجه للنفوس ..
قادر الله .. قادر الله ..
ليتني وانت في جزيرة ..
ما يجيها غيرنا ...
حولنا بحورٍ غزيره ..
نقضي فيها عمرنا ..
قادر الله .. قادر الله..

» بدر بن عبد المحسن » لاتنساني

خريف ..
اوراقك الصفرا .. خريف ..
والضحكة الصفرا .. خريف ..
ملت .. مواعيد الوله ..
قلبك دله ..
وقف .. النزيف ..
وش عاد .. لو تكذب علي ..
إكذب علي ..
ما عاد .. فرحني غزل ..
ما عاد .. عذبني امل ..
ياحب ناداك الرحيل .. رد الندا ..
إخترت عن عيني بديل .. وكان المدى ..
أعطيك .. وش عندي قليل ..
صرخة .. وصدى ..
اللي بيدي إني اذوب ..
واشتاق لك .. طيف وصور
ولو هو بيدي .. امحي الدروب ..
والغي المواني والسفر ..
وآه من السنين .. يا حبيبي ..
من اللي ما ينسى مين ..
واللي يعيش ينسى ..
ومر الزمن ليلة ..
ليله .. بعد ليله ..
اسهر .. وانادي له ..
وأحيا على .. باقي عطر..
فـ أطراف منديله ...
ويلاه ... يا ويلاه ..
قلبي أنا ويلاه .. أسهر أنادي له ..
وامر شباكه عسى .. تضوي قناديله
يا حبي اللي ذاب ...
ما للزمن أصحاب ..
صدقني ما أدري لمتى ..
إنت وانا أحباب ..
وآه من السنين
لا تنساني .. هذا الكلام اللي بقول ..
لجل المطر .. لجل الفصول ..
لا تنساني ....

» بدر بن عبد المحسن » ليل البعاد

ما أطولك ليل ...
ليل البعاد .. والإنتظار ..
ما اطولك ليل ...
سارق من عيون النهار ...
ناسي زمانك ...
زمانك .. يا شجوني ...
عارف مكانك ..
مكانك.. في عيوني ...
يا ليل .. يا ليل ..
يا ليل أنا ربعي هناك ...
وداري ورا الدمعه .. وراك ...
الله على شمس الأصيل ..
من ضيها مثل الذهب ..
الله على سمرا تقول ..
الى متى الفرقا .. تطول ..
في صوتها .. شوق وعتب ..
ما أطولك ليل .. ما اطولك ..
طال .. طال بي وجد ..
قلبي يا هواي ..
يا دفا نجد ..
في عيون الصبايا ..
ليتني نسمه .. على عالي عسير ..
أو على جده .. على الشط الحرير ..
ليتني نفحة أريج .. عطرت ريح الشمال ..
يا ليتني موجة خليج .. ترتمي فوق الرمال ..
ما أطولك ليل ... ما اطولك ..

» بدر بن عبد المحسن » فم الجروح

فم الجروح ..
نوافذ البوح ..
هذي الثقوب في الصارخ الحي ..
نوافير من ضي ..
وجدار ..
املاها بحديث النار ..
واكسرها على اقدام الاماني ..
مره أغاني ..
ومرها .. كلامٍٍ جارح ..
وهذا القصيد ..اللي كتبت البارح ..
اليوم .. انفاس الصباح ..
تلفح جروحي ..
آه .. ياصبحٍٍ لمحت في عتمته روحي ..
طفلةٍ تصدح على خشب المسارح ..
ياصوتها الغاضب المقطوع ..
بعض السواد .. شموع ..
ومحدٍ درى وش قلتي ..
خانتني الجوارح ..
مثل القصيد اللي كتبت البارح ..

» بدر بن عبد المحسن » كل ما دعاني الشوق


كل ما دعاني الشوق للقلب الأول
القى مكان القلب في الصدر تنهيد
وطيوف ذكرى في الحنايا تجول
تجمع صور وأوراق من باقي العيد
مدري سبقني الوقت والا تحول
أخلف ربيعي وادهرن المواعيد
أو هو الصبا .. نجمٍ رقى ثم حول
غاب وسما وجهي مشيب وتجاعيد
أحبابنا ليت الذي راح طول
وليت الذي باقي لما فات تجديد
انتم مثل قلبٍ عرفته امنول
وأصبح مكان القلب في الصدر تنهيد

» بدر بن عبد المحسن » لاوالذي سواك


لا والذي سواك ما اريد سلواك
ما أخبر به نفسٍ تمنت قدرها
وكان التفرق يا ادعج العين عناك
أنا الذي روحي عذابه صهرها
والله لو ما اعي .. نفسي برجواك
واجزم وَكاد إنه يهمك خبرها
لأطفي شعاع العمر .. لا غيّب ضياك
عميت عيونٍ ما يطولك نظرها
أغلي حياتي .. من ثواني بها ألقاك
لولاك ما تسوى حياتي كدرها
ودنيا خلت من صافي الود وياك
يا عل تكسف شمسها مع قمرها

» بدر بن عبد المحسن » لا تناظرين بعيد

تعبت اناظر فوق ..
واتعلق بشوفي ..
تحتي الثرى مشقوق ..
وهمك على كتوفي ..
ولاتناظرين بعيد ..
وبلادي في عيونك
توي قطعت البيد ..
لرضاك .. وبدونك ..
ماعاد فيني اعروق ..
ودمي على سيوفي ..
لاتمطريني ورد ..
مشقوقه كفوفي ..
مثل الثرى .. والقلب ..
قمح ونخل محروق ..
وجدراني حروفي ..
تعبت اناظر فوق ..
تحتي الثرى مشقوق ..
قمح ونخل محروق ..
ماعاد فيني عروق ..
ماتنزلي لخوفي ..؟