فوق هام السحب ( الشعر الشعبي) على متن القوافي

الـتـجـربه يـاذيب لا شـيـب الراس
تكشف لك الايـام مــافــي خـفـاها

لولا احتياج الـنـاس ياذيب للناس
محدن عرف طيب الرجال ورداها

......

‏الله هو اللي وزع الرزق بقياس
‏ومن دنيتك ما تاخذ الا نصيبك

‏ان زاد رزق الناس لا تحسد الناس
‏الله حسيب الناس والله حسيبك

......

ليه المساء عوق الشقاوي وطبه
وليه الهبوب تصحي القلب لا بات

وليه القمر يدعي جريح المحبة
ويقول له ياهيه ما فات ما مات

جرحك ظهر لو قلت للوجه خبّه
وللحزن في ضحكك رسوم وعلامات

وليه المطر بالذات ريحه وصبه
كنه رسول بين الأحباب بالذات

اشتاق فيه لشوفتك واتنبه
للي نسيته من مواقف ونظرات

......

‏يا بشير الخير حي الله نباك
مرحبا بك عقب مابطيت الغياب

شوقنا لك و الجديد الي معاك
مثل شوق الأرض لمزون السحاب

بقلمي

فقير الدم ماهو ناقص الدم
فقير الدم ذا له دم بارد

ثلاثين الف غزاوي تيتّم
وهو لا زال وسط البيت راقد

إذا قد طاعنه في السن تدعم
من النرويج رغم انف التباعد

ومليارين مسلم ما تكلّم
ولا فيهم مناصر أو مساند

مصير المسلم الصامت جهنم
وكافر حر في الفردوس خالد

سكوت الناس عن غزة محرّم
ويلعن دمّها وجه المحايد

......

يشتاق لك قلبي وينشد عن الحال
ياللـي عليـك الحـال واصل لحـده

الـود جـوا الـقـلـب لازال.. مـازال
قلبــي علــى كيفـك تتـل وتشـده

لك داخله منـزل وبالعرق مدهـال
يوفـــي لك العهـد مـاباح ســـده

اسقيتك من الحب يا قلب فنجال
وبهاره مـن العشق صـدق ومــوده

......

يطربني إجتماع الكلمتين "عسى ، فدا" في بيت واحد مثل:
‏عسى حروف الكلمة اللي تودّيك
‏فدا حروف الكلمة اللي تجيبك
‏
‏وعسى ليلةٍ فيها من الشكّ والتبريح
‏فدا ليلةٍ فيها مجيّك ومعوادك
‏
‏وعسى الضيقه اللي كَنّ ماني مع الجلَّاس
‏فدا الضحكة اللي ما عرفت اتصنّعها

والله إنها معجبه والقصايد معجبات
‏ما يقنّد راسها إلا القصيد النخبوي

‏مستعد أكسي نحرها بسبع معلّقات
‏كلها في مجدها والجمال الأنثوّي

......

وين الوعود اللي لها عهد بـــالله
اللـــي تعـاهــــدنا بها وفــــترقنا

ياويل قلبي صار يشتاق ويـــلاه
للي ثلاثه اشهور قلـــبه تــــركنا


...

احيان عـن معنــى المحبــة لـي ابيات
واحيان عـن شـوقي ولهـفــة ســروري

احيان اڪتب عن مدى الضيق حـالات
واحيــان همــي ينقطــع بـه حـظـــوري

......