فوق هام السحب ( الشعر الشعبي) على متن القوافي

‏مع العزله احس بقناعة رضى وشعور
‏لو اني من الايام فيني وما فيني

‏وادور على كسَب الجمايل بدون قصور
‏ولا اعطيت ما ادور من الناس تعطيني

‏واسامح واعذر الناس لو مَاني بمعذور
‏وعسى الله عن الناس وعطا الناس يغنيني

‏عسى راسي بطيب الوفا والنبا مذكور
‏وعسَاها على الماجوب ما تقصر يديني

....

‏الصبر زين وعزت النفس تغنيك
‏عن منة العربان قاصي وداني
‏
‏أن ماعطاك الله فلا احدً بمعطيك
‏أقنع بمقسومك ترى العمر فاني

....

‏لاتامن جميع اصحابك الله يبارك فيك
‏من اسباب فقـدان الامن يـوم تامنها

‏ترى احيان يطلع راعي اقدرك واغليك
‏هـو اشر عدوانك على الارض والعنها

‏ورفـيق ٍمهوب يناصحك كنه معاديك
‏لو تعيش معه افضل لياليك واحسنها

‏مامثل الرفيق اللي مثل لمبة التشييك
‏لياشاف عندك مشكله حـذرك منها

‏
سليمان النصيف

‏يالله عسى فالامر خيره ومقسوم
‏عن ماتعاف النفس واللي تحبه

‏ارزاقنا تاتي على غير معلوم
‏العبد يسعى والعطا عند ربه

....

‏دام راسي بخير ونجدتي من ذراعي
‏شرهتي بالضمير وصدتي عن قناعه

‏من يخوض المعارك لازم يكون واعي
‏الهزيمه سريعه والنصر صبر ساعه

‏والخزى والله اني عنه طاوٍ شراعي
‏ودي اني بسوقه ماتجي لي بضاعه

‏ماحتمل شرهة الطيب حميد المساعي
‏لاسمع مني اللي مايسره سماعه

‏
خالد ماطر

‏لا بد من عقب المطاريش معــواد
‏ولا بد من عقب المواجع عوافـي
‏
‏ولا بد من عقب السهر لذة رقــاد
‏ولا بدمن عقب الكدر جو صافي
‏

....

‏كل ما شانت وجيه الناس وسّع صدرك
‏لا تحسب إن في يدين الناس نار وجنّه

‏القريّب لا تكدّر خاطره وإستدرك
‏سامحه وإن جيته بزلّه تسامح منه

‏ولا تعلّق خافقك باللي ما يحفظ قدرك
‏كثر ما تقدر توخّر عنْه وخّر عنّه

....

‏النعم مايطلق على كل رجال
‏ولا كل من يبغى المديحه وجدها

‏ولا كل رجلن للثقيلات شيال
‏ولا كل من يزرع زروعن حصدها

‏النعم للي لـ الصعيبات حلّال
‏ولا شانت القالات حلل عقدها

‏لا جا مجال الطيب يضربه امثال
‏على اسمه الخفره تسمي ولدها

‏ماهوب ملقوفن على الربع شيّال
‏معطيه ربه نعمةٍ ما حمدها

....

‏ما يجحد حقوق الرياجيل رجال
‏ولا يحقر سلوم الصداقه سنافي

‏لا خابت الهقوات في بعض الاشكال
‏ماخابت الهقوات في كل وافي

....

‏ماتكنّ القلوب وماتشيل المخابي
‏بوحها يلحق الرجّال شكه وريبه
‏
‏بين هرجة عذول وبين شخصً حكابي
‏العرب صدقوا وانا دفعت الضريبه

‏لو نواياي تستر ما انكشف من ثيابي
‏المجامل ب من لايستحقه مصيبه

‏
محمد مريبد