فوق هام السحب ( الشعر الشعبي) على متن القوافي

مو كل صدفة للبشر تجمع أحباب
ولا كل فرصة في حياتك سعيدة

يمكن يكون أحيان إغلاق الكتاب
أفضل ترى من فتح صفحة جديدة

....

لاتشتري ميزان توزن به الناس
الناس ما ميزانها إلا الشدايد

عند الشدايد كل مخلوق ينقاس
وترجّح الكفّات لأهل العوايد

....

‏⠀
ماتفعله يمناك في واجب الغير
تلقاه لاضاقت عليك الوسيعه

ابذل من المعروف وابذل من الخير
الرازق الله والجمايل وديعه

....

عشتوا وعشنا وشفتوا مثل ماشفنا
‎سبحان من يسلب الطّماع توفيقه

قناعتك في قليلك كنز لايفنى
‎وحسدك لغيرك يورث داخلك ضيقة

....

‏ياشين طبعٍ عند بعض المخاليق
‏يظن فيك السوء قبل الحقيقة
‏
‏على كلام الناس سريع تصديق
‏وينسى العلوم الطيبة في دقيقة

....

احترامك للبشر ماهو بخوف
بل دليل انـك أصيل ومحترم

لاتغير ميزتك لجل الضروف
عيش عمرك بالشهامه والكرم

كم ضعوف فارقوا الدنيا ضعوف
وكم نشاما ذكرهم فوق القمم

....

قصيدتي من فوق خصرك للاعيان
واللي وراه الله يغفر ذنوبي

اللي علي أرضيك لو كنت زعلان
وأنتي عقوبة كل غيداً لعوبي

تمايلي قدام عيني على شان
أميل للقاف الرهيف الطروبي

والله لا لبسك أجزل الشعر لو كان
أركي له من الفجر لين الغروبي

....

لجل الغلا الأوليّ وأحساسه الباقي
كل الأماكن معك تستاهل العنوه

لا زلت بـ أعماق من بمحبتك شاقي
ولا زال قدرك عزيز وشوفتك منوه

....

ابتسم للوقت واضحك للحياه
لا يروح الوقت .. في هم ونكد

عيش يومك واحتسب للي وراه
من يعد الوقت يبلش في العدد

....

الضامي اللي جف ريقه على ماك
اسقه من عدود الغرام المناضيح

معطيك روحه وانته أجزل عطاياك
جرحٍ مثل مضراب شلفا شليويح

....