ديوان قصائد لشعراء المملكة العربية السعودية (متجدد)☘️☘️

قصيدة إلى أختي
الشاعر: زايد الرويس زايد الرويس
#العصر الحديث
#المملكة العربية السعودية
0
90 مشاهدة

ما ورى هالدمع دمع ولا ورى هالضيق ضيقه

خففي هالحزن ما انتي للتناكيد مخلوقه

اسألك بالله لا تبكين شوفي لك طريقه

غير هذا الدمع دام الوقت لحظاته سروقه

شي عادي فالزمن هذا أخو يطعن شقيقه!!

كم سمعنا عن مآسي وابتسامات مخنوقه

اسمعي مني.. وانا ما اقول عنك انّك صديقه

انتي اختي.. ما بها تشكيك وابياتي صدوقه

ربما الإنسان يحمل حمل.. لكن ما يطيقه

وواجبي آآآقف معك عن وقتنا هذا وبوقه

من عرفتك وانتي اختي صدق ب اثبات وحقيقه

لو تبين المر اذوقه ليش لا والله لاذوقه

بس ما ودي أشوفك ضايقه لو هي دقيقه

خففي هالحزن ما انتي للتناهيد مخلوقه

قصيدة 1000قلب
الشاعر: زايد الرويس زايد الرويس
#العصر الحديث
#المملكة العربية السعودية
0
90 مشاهدة

على كثر القصيد اللي كتبته فيك صبح وليل

أحس اني برغم اللي كتبته ما قدرت اكتبك

لأنك دايم اكبر من قصيدٍ قيل أو ما قيل!

أشوفك حولي اشياءٍ كثيرة واعجز آرتبك

وش اكتب بك وش آخلي؟ وانا اشوف السنين تميل

على بحة حروفك لا ابتعدنا وابتديت اقربك!

يا الذ من الرضا واصدق من الدمعات قبل تسيل

يا ارق من الدموع اللي تسيل ف لحظة وتتعبك

معك تاخذني احلامي واحس إن الخيال بخيل!

إلى مني رسمتك.. نهر يشربني.. قبل لا اشربك

معك تصبح شراييني قلوبٍ تعشق التدليل

واصير ب قلبٍ تشتهي خوخك وقطف عنبك

قصيدة العاشق الأكذوبه
الشاعر: زايد الرويس زايد الرويس
#العصر الحديث
#المملكة العربية السعودية
0
90 مشاهدة

نادراً ما كان قلبي ف الهوى يتهوّر

وكنت.. لامنّه تهوّر! أنجو ب أعجوبة

أتلّصص غيبة أحزان المدى واتسوّر

حائط الواقع عشان آآآمالي المنهوبة

أدري اني من ثلاث سنين وآنا أتضوّر

جوع للتنهيد فوق اللهفة المشبوبة!

وامطرت دنياي ليل.. وشفت وجهك نوّر

قلت لا يمكن أبد!.. لا!!.. يمكن الرعبوبة

شافت الوحدة ف عيني والعذاب مصوّر

وحست ان قلبي جفاف..وجاتني مصبوبة!

وازهرت كل العروق.. وخافقي لو دوّر

مثلها.. جته الليالي بالتعب مصحوبة

خايف افقدها... واخاف اكثر إذا ب اتهوّر

يمكن اصبح في نظرها العاشق الأكذوبة!!

قصيدة ترنيمة ورق
الشاعر: زايد الرويس زايد الرويس
#العصر الحديث
#المملكة العربية السعودية
0
90 مشاهدة

تصدّق اني بعض الاحيان اصدّق

إن الحقيقة كذب واحلامنا صدق!

لا صرت في جذع الزمان متعلّق

يمكن نخيل احلامك يمدّ لك عذق

وان شفت قلبك بالغرام متورّق

صب الفرح في عرق والحزن في عرق

كم حلم موته لو يصير متحقّق

لا مات.. دوّر جرّته في السما.. وارق

وما دام حظك فالسنين متفرّق

ماهو صحيح الحزن ترنيمة الورق!

شف كيف قلبي بالجروح متشقق

وعلى السما عيني ونجماتها الزرق

المشكلة والموووت لا صرت اصدّق

إن الصداقة كذب ما تعرف الصدق!

قصيدة ابن حزن وجروح
الشاعر: زايد الرويس زايد الرويس
#العصر الحديث
#المملكة العربية السعودية
0
89 مشاهدة

يستريح الحزين من الحزن

ثانية! قبل.. يرجع به عليه

ما يغمّض من اوجاعه جفن

ولا يوّقف عن الفركة يديه

وش يقول السجين عن السجن!!

لا غدت خطوته منّه إليه

صاحبي.. والغلا ما يندفن!

كل عرقٍ بقلبي يحتويه

الوفا شي ما يحتاج إذن

ولو سألني أحد! من غير ليه

قالوا انك مريض وقلت: ابن!

حزن وجروح هذا اللي يجيه!!

ما نساني واعرف انه يحن

ويدري اني أحبه! واشتهيه!!

كل ليلة.. على بالي يعن

واحدٍ فالبشر ماله شبيه

فرحته كنز! لكنّ الحزن

كل ما ارتاح يرجع به.. عليه

قصيدة الحنين يجر بعضه
الشاعر: زايد الرويس زايد الرويس
#العصر الحديث
#المملكة العربية السعودية
0
89 مشاهدة

صاحبي والحنين يجرّ بعضه

ذكرياتٍ تخون اللي نساها

وش يقول الغريب ان طال ركضه

لا استعاد السنين وما وراها

فيه قلبٍ تناسى صوت نبضه

رحلته مبتداها منتهاها!

عيني اللي تبي فالنوم غمضة

أسهرتني وقلت اتبع خطاها

ما سطع في ظلام الليل ومضة

من جبين اللي اشغلني غلاها

قصيدة ماتقبل السهره القسمه على واحد
الشاعر: زايد الرويس زايد الرويس
#العصر الحديث
#المملكة العربية السعودية
0
88 مشاهدة

يا طول ه الليلة اللي جوها بارد

بارد! وانا داخلي ما تطفي الجمرة!

يشعلني الشوق واحساس الغلا واجد

والمشكلة أقرب من الضمة الكسرة!!

حبيبتي صدقيني.. والسهر شاهد

أعدّ من واحد غيابك إلى العشرة!

واقول يمكن تجي في لهفة مواعد

تسبق خطاويه يم الموعد العبرة

أدري بشوقك.. ولكن! كل شي وارد

يجوز عني أخذك النوم إلى بكره!

يغريني النوم.. لكن قلبي معاند!

يقول نسهر.. واقول بخاطرٍ يشره

ما تقبل السهرة القسمة على واحد

إن ما سهرتي معي! وش هو له السهرة؟

قصيدة اسبوع
الشاعر: زايد الرويس زايد الرويس
#العصر الحديث
#المملكة العربية السعودية
0
88 مشاهدة

الله يعوّض صدق قلبي وطيبته

وتخف عنه مع الليالي مصيبته

واقلبي اللي ضاع واستاقه الهوى

وكل الظروف اللي تحيطه مريبته

اليوم تم اسبوع عن حالي النبا

وقلبي يعاني من مفارق حبيبته

اللي تساوي عندي الكون باكمله

قلبي يسامرها على طول غيبته

لوّ انها ماهيب عندي قريّبه

يسرح بها شوقي ويرجع بخيبته

هي وينها؟ لاحس جاني ولا خبر

وامسيت مثل اللي خذوا منه هيبته

يا روح روحي يا اقرب الناس كله

مترضين قلبي ينكوي في غليبته؟

تذكريني كل ما نسنس الهوى

تذكري طاري غرامي وشيبته!!

تذكري زايد الى من تواردت

هواجسك أو قلبك بدت فيه ريبته

يبقى غرامك لين ما تبعث الورى

والله يعوّض صدق قلبي وطيبته

قصيدة لا صرت
الشاعر: زايد الرويس زايد الرويس
#العصر الحديث
#المملكة العربية السعودية
0
88 مشاهدة

لا صرت اقدرك وانته ما تقدرني

ماهي غريبة إلى منّا تزاعلنا

ولاصرت ادوّرك وانته ما تدورني

باقول صدفة الى منا تقابلنا

ولاصرت اعبّرك وانته ما تعبرني

ما اظني اعني لك ان كثرت مشاكلنا

ولاصرت اسايرك وانته ما تسايرني

ما اظن الايام بتسهّل تواصلنا

ولاصرت اشاورك وانته ما تشاورني

الراي للوقت يقسى أو يجاملنا

يا نور الايام في دنياي نوّرني

حرام ننسى بعضنا في مشاغلنا

بعدك خسارة.. عسى الله ما يخسرّني

محبتك لو ظروف الحب تخذلنا

قصيدة تمتير
الشاعر: زايد الرويس زايد الرويس
#العصر الحديث
#المملكة العربية السعودية
0
87 مشاهدة

الغلا وام الحلا وش تقولين

فالشوق لا من صار في هيئة انسان

هذاك انا عايش معه بين قوسين

إن خفّ: زلزلني واذا ثار: بركان

وانتي على كيفك تجين وتروحين

وتمتّرين القلب شريان شريان

ما اقسى من الحرمان.. وانتي تعرفين

ما يجتمع فالحب وصلٍ وحرمان

والحب وش هو: غير نشوه وقلبين

إلى التقوا تشطب سوالفهم ازمان

عامين مرّت ما تسمى بعامين

ما ضمّت يدينك يديني بتحنان

روحي اسألي وشلون وضع المحبين

لا طوّلوا عن بعضهم جاهم جنان!!

والمشكلة ماهي ب قولتك بعدين

المشكلة بعدين ما جت إلى الآن!!