ديوان قصائد لشعراء المملكة العربية السعودية (متجدد)☘️☘️

قصيدة اطقها فالوجه
الشاعر: زايد الرويس زايد الرويس
#العصر الحديث
#المملكة العربية السعودية
0
76 مشاهدة

ماهو من اخلاقي ولا اخلاق الرجال

الكلمة العوجا ونكران الجميل

ولانيب من ربعٍ يطقون الظلال

أطقها فالوجه مُر وسلسبيل

وان كان زادت بين قيل وبين قال

مانيب اوّقف بين قال وبين قيل

يا صاحبي وان كان شديّت الحبال

أرخيت لك حق الخليل من الخليل

لك حق تزعل كان جيتك في خمال

وازعل عليك ان قمت في حقي تعيل

لولاي اعدك فالمواقف راس مال

ما سقت لك شرهة وانا بالي طويل

حقٍ علي امدحك لا جا لك مجال

وعيبٍ علي اجحدك.. واصلاً.. مستحيل

لو انها رفقة ثلاث اربع ليال

ما شلت من همي كثير ولا قليل

واكبر مصيبة تعتبر بين الرجال

الكلمة العوجا ونكران الجميل!

قصيدة طاروق طاروق
الشاعر: زايد الرويس زايد الرويس
#العصر الحديث
#المملكة العربية السعودية
0
74 مشاهدة

من وين ما هبّت علي الطواريق

رتبتها لحضرتك طاروق طاروق

والشعر لو بيبان حرفه مغاليق

فتحتها بالحب ومكابد الشوق

ياللي عيونك عن عيون المخاليق

كن الوله لعيونك السود مخلوق

يظماك قلب ويابسن المعاليق

وان مر لك طيف يتبلل به عروق

ياليت معك الحب: رجوى وتحقيق

على الاقل أو كل مطرود ملحوق

متعلّقٍ حبل الرجا فيك تعليق

وصوت الأمل من كثر الالام مخنوق

عامين مرّت والليالي توافيق

وثوب الصبر من ضيقة الصدر مشقوق

لوّ ان لك قلبٍ على شوقي يويق

ما كان بعض الوجد بالوجد مشنوق

تعال كلك.. ما ورى ضيقتي ضيق

معك السهر رايق ومحبوبك يروق

يفز لك وتفز كل الطواريق

يمدها طاروق.. طاروق.. طاروق

قصيدة غير مقصودة
الشاعر: زايد الرويس زايد الرويس
#العصر الحديث
#المملكة العربية السعودية
0
73 مشاهدة

ليل السهر والحنين المر يجلدني

بسياط الأشواق والأعصاب مشدودة

أحلامي البيض عن دنياي تبعدني

ودروب تحقيقها ماهيب موجودة

يا زارع الحب في دنياي ساعدني

تعبت وابواب هذا الحب موصودة

أحس كني وانا موجود فاقدني

بي فرحةٍ من سنين الحب موؤدة

أحاول انساك وطيوفك تطاردني

تغسل شراع الفراق وتكسر قيوده

كأنها من عدم ذكراك توجدني

تشعل فتيل الوله ملحه وباروده

يا زارع الحب! هالهجران يحصدني

وين انت؟ طوّلت! ما فكرت بالعودة؟

في داخلي شوق.. يا ليتك تقلدني

وتشتاق لي كثر شوقي يا اخر حدوده

شف دمعتي كيف عن خدي تراودني

شف نظرتي كيف بالحرمان ممدودة

ما ودي انك مع احزاني تعاندني

مع ان غيبتك طبعاً غير مقصودة

لكني احتاج بسماتك تساندني

واحتاج قلبك علي يميّل وروده

يا زارع الحب وطيوفك تواعدني

بالحب وتغني لذكراك أنشودة

ليل السهر كل ما حنيت يجلدني

بسياط الاشواق والأعصاب مشدودة

قصيدة أروح اصور معك في المنتدى العام
الشاعر: زايد الرويس زايد الرويس
#العصر الحديث
#المملكة العربية السعودية
0
73 مشاهدة

وشلون احبس المشاعر طول الاسبوع

عشان يرضى علي المشرف العام

يا عارف سرور كم تغتال مشروع

فكرة جديدة إلى من حان الالهام

في وقتها كيف ما اقدر فتح موضوع

وابقى معلق ما غير اعد الايام

شف كيف قلبي من امس الصبح موجوع

فوق الورق أرمي افكاري والاقلام

وانت تعرف دايم المرغوب ممنوع

والشعر حرية الشاعر فالاحلام

ولاهي طريقة ولا هو حل مشروع

وماهوب عصيان لامرك بس ما دام:

لي صاحبٍ ناعمٍ مترف ودلوّع

لو ما قرا من جديدي بالزعل نام!!

وشلون اجل لو زعل يا عارف اسبوع؟؟

أروح أصوّر معك فالمنتدى العام؟

قصيدة التويجري
الشاعر: زايد الرويس زايد الرويس
#العصر الحديث
#المملكة العربية السعودية
0
73 مشاهدة

وش اكتب والمُصاب اكبر من الشعر إن طرى قدره

فقيدتنا كبيرة.. والمصيبة فقد ه الرجّال

كبيرٍ في حياته وف مماته آآآآه يا كبره

طوى التسعين من عمره وهو تُعقد به الأمال

رفع نفسه عن الزلات من عقله... ومن صغره

وهو قد الحمول اللي تحمّلها ب طولة بال

يفز الصبح من وجهه قبل لا يبتدي فجره

حجاجه يضحك وعينه تقول إن الرجال افعال

بكته البادية وقلوبهم لو نازعت حضره

محبته يتساوون ف محبتهم بدون جدال

أديبٍ ما يعرف اللغو فيما فاض من نثره

ثقافته سبقت جيله لما بعده من الأجيال

عسى الله يجبر قلوب التواجر فيه ويغمره

بجنة عرضها عرض السما والأرض والأطوال!

قصيدة لا تشكي اليتم
الشاعر: زايد الرويس زايد الرويس
#العصر الحديث
#المملكة العربية السعودية
0
72 مشاهدة

غنيت لك يا الزمان المر من حزني

تنهيدتين وسحابة ضيق تغشاني

لا تشكي اليتم يا صدري ويا حضني

عصفورتي لو تطير بعيد تلقاني

مادامها تعرف ان عيونها سجني

من وين ما رفرفت بتعود لاغصاني

معها الحنين يتوّرق لين ياخذني

والشوق شوكٍ كثر ما امشي به أدماني

وانا التحف صبري المهزوم يقتلني

كثر التعب والسهر من قلب يقراني

أشكّل طيوفها في عيني وجفني

وعيونها السود تامرني وتنهاني

وان جيت ابعزف لها نبضات من حزني

تغيب والقى سحاب الضيق يغشاني

قصيدة خمسة عشر ماتوا علشان صندق
الشاعر: زايد الرويس زايد الرويس
#العصر الحديث
#المملكة العربية السعودية
0
72 مشاهدة

يا ذوق كلك ذوق لو ما حصل ذوق

لو ما حصل لي منك روحه وجيّه

دايم مشاويرك من البيت للسوق

على الأقل مرّي عليّه شويّه

نجلس نسولف ننبسط ندفن الشوق

شاهي منعنع قهوةٍ شاذليه

الله وكيلك ما طرى لبالي يروق

ما دام يدّك ما غفت في يديّه

كني على شان السهر بس مخلوق

ما عاد عندي للسهر قابليّه

بديت احس اني كذا صرت مخنوق

من لهفتي من رغبتي يا صبيّه

ودي لو اصبر بس صار الصبر فوق

ما يحتمل قلبي ويصعب عليّه

عيد الفطر كنّه على الوجه مصفوق

من دون شوفك لين صرت الضحيّه

خمسة عشر ماتوا على شان صندوق

وانا باقدم لك حياتي هديه

قصيدة قبر النبي لا يدنس
الشاعر: زايد الرويس زايد الرويس
#العصر الحديث
#المملكة العربية السعودية
0
71 مشاهدة

الوقت يامر علينا غصب ونطيعه

والعولمة دخّلتنا في مخابيها

تغير العالم وكثرت مواضيعه

والناس ما عاد تمسكها مباديها

الشرق الاوسط توّمر به جرابيعه

وذيابته خايفة من حر ما فيها

بين السلام وملفاته وتطبيعه

أعدائنا ما لنا الا نبوس اياديها

صهيون تعلن علينا الحرب وتذيعه

وحنا نقول ب براءة ما تسويها!!

نضحك على بوش والجزمة وتوديعه

وحنا امريكا توطتنا برجليها

ما بين نجاد تهديده وترويعه

فالرمل ندفن ملامحنا ونخفيها

يا ضعفنا كان ما نقدر على الشيعة

في طيبة الطيّبة كثرت دعاويها

والشق ما عاد ينفع كثر ترقيعه

لا صار ما عندنا حاجة نسويها

تكفى يابو متعب بما تلزم البيعة

قبر النبي لا يدنّس وانت راعيها!!

قصيدة سيجارة فوق طفايه
الشاعر: زايد الرويس زايد الرويس
#العصر الحديث
#المملكة العربية السعودية
0
71 مشاهدة

قدام لا اغيب وتغيبين

وغيابنا يصبح حكاية

فتشت في مفرداتي لين

سلمت لاحزاني الراية

وجلست بين الفراق وبين

دهشة مشاعر بلا غاية

يا تاركتني بدون يدين

يضمني حزني ونايه

العمر تنهيدة المقفين

سيجارة فوق طفاية

تدرين؟ والا بلا تدرين!

غواية عيونك هداية

وانا حبيبك إلين تجين

يا سكر احساسي ومايه

وانا حبيبك إلين يبين

شيب الأحاسيس جوايه

إلين ما اموت وتموتين

ونصير للعالم حكاية

قصيدة جرحي المصباح
الشاعر: زايد الرويس زايد الرويس
#العصر الحديث
#المملكة العربية السعودية
0
71 مشاهدة

نويت اركض على درب السهر وارتاح

من اوجاع الزمان وضيقة المجروح

وابشعل في ظلامي جرحي المصباح

واعلّق دمعتي في ليلي المذبوح

علشانك يابو رمشٍ صويبه طاح

تنطّحت الغموض ولا لقيت وضوح

كأن الناس في بعدك طيوف اشباح

وكأني من بعد ما رحت مالي روح

لو ان الصبر لابواب الفرج مفتاح

تركت اغلى الليالي بالحنين تروح

ولكن المصيبه شوقي الفضّاح

ترك لي دمعتين وقلت له مسموح

احبك وان بغيت الصدق سدي باح

على وجهٍ حزين وناظرٍ مفضوح

كثير من الوله في وحدتي يجتاح

تسلل داخلي في صمت يغري البوح

إذا كان السهر متعب تعبت ارتاح

من اوجاع الحنين ولهفة المجروح