اخترنا لكم

لاشفت طيبي صاير اليوم ضدي
واللاش وعيال الردي تلبس البشت

صرت اتمنى عصر جدك وجدي
لو كان ماشفته تمنيت به عشت

.....

تدري زمان أول وش اللي محليه
إن النوايا في قسى الوقت زينه

وصدق النفوس وطهرها والمشاريه
وخوة شرف لأجله تباع الثمينه

.....

ترى شرهة البندق على وقفة الرماي
مثل شرهة الفارس على زرقة الحربه

.....

الزمان يدور والحية الرقطا تدور
وكل ضلعٍ نايفٍ تنطوي في فيته

وكان حنا ما دفنا الحيايا بالجحور
بعد بكره كل جحرٍ تجينا حيته

خليل بن هدلان

عـدوّك البيّن ابرك لك من الخافـي
اللي يعاديك ويِسمّك على الصامت

الوجه وجه الصديق المخلص الوافي
والقلب قلب العدوّ الحاقد الشامت

.....

الرفقه اللي مالها ساق وعروق
لو هزها صلف الزمن يقتلعها

واليوم لاتشره على كل مخلوق
خذ ماتيسر واكثر الناس دعها

والسلعة اللي ماتجملك فالسوق
بارخص ثمن عند اول السوم بعها

وعلاقتك بالمجتمع فوق لافوق
تبعدك عن عرف الهموس وطمعها

.....

يامل قلب ٍ يلوعه طاري الفرقا
كما يلوع الحمام الورق شيهانـه

إن حوّلن حوّلت وإليا رقن ترقـا
متعليّتهـن وهـي حدمه وجيعانـه

على وليفٍ نحا مع روق عن برقا
عليه عيني بصاف الدمع غرقانه

أبوثـمـانٍ رهــاف ودقــةٍ زرقـــا
موتي ولا صدته عني وهجرانـه

.....

مدري علام الوقت مايرحم ظروف الطيّبين
خلّى نواحيـه الرحيبـات وتركـني فـي نحا

وان جيت ادوّر عن مسيري في رياض الصالحين
كـني مـدوّر فالطحين اللي تـدور إبه الرحى

صدّيت عن مُجمل طموحاتي وقلت الله يعين
صـدّة فقيـرٍ لقمته عنـد اليتاما واستحى

.....

يارب تجعل حاجتي منك وإليك
ياخالقٍ سبع السموات والأرض

يامصرف الاكوان والرزق بيديك
يامن جعلت الخمس في ديننا فرض

يا واحدن ماخاب من كان يرجيك
يارب تستر حالنا ساعة العرض

لاجا نهارن فيه كل الرجا فيك
ولافيه بالأعمال سلفه ولا قرض

.....

نجـود من مايجـود ربـي علينـا
ونعين ونعاون ونحتـاج للعـون

إن سـاعفت مانـبذل الثمينـا
وان عاضبتنا حـالنا ما تشوفون

على سـلوم جـدودنـا الاوّلـينـا
والناس فيها خير وابليس ملعون

الله يديم أمن الوطن ويحمينا
لاقاموا اهل الشر للشر يسعون

.....