فوق هام السحب ( الشعر الشعبي) على متن القوافي

‏الله الله في وصال اللي يحبّك ي حبيبي
‏لاتعودني على قطع المواصل واتعوَد

‏ادري إنك تدري بشوقي وتدري ويش عيبي
‏لو يعاقبني الحزن من غيـبتك ماقلت عوّد

....

‏تجد المحب يستدعي سماع اسم من ويستلذ
‏الكلام في اخباره ولا ينهنهه عن ذلك تخوف
‏ان يفطن السمع ويفهم الحاضر وفي هذا السياق

‏يقول راشد بن قطيما:

‏اجيب سالفتين حولك حواليك
‏لعل ياتي لك مع الناس طاري

‏وإن جاء مجالك واستمرّوا بطاريك
‏قمت اتليهى كن ماني بداري

‏أحب من يملى ثياب الرجوله
لو كان ثوبه فاضياتٍ مخابيه

وأحب من تسبق كلامه فعوله
مزن ٍتدفّق ماه وأرعد مناشيه

وأحب رجل ٍجاك تجمح خيوله
من قبل تسرج له حصانه وتدعيه

وأحب من يستر خَضَاره ذبوله
وجه ٍطليق حجاج والهمّ حاديه

وأحب قرم ٍيوم ربعه شكوا له
قال النخل يفدا جريده سواقيه

....

‏ابعتذر واكتب على جمر الاوجاع
صدر الغلا تدفيه طعنة يمينك

الشوق رابط والجفا سيف قطاع
تصرخ حبال الوصل بيني وبينك

راح العمر في سكة الهم أوضاع
تاهت خطا ايامي وراحت سنينك

ارخصت لك قلب الغلا فيك ماباع
واهدرت اوقاتي الجميله لعينك

....

والله اني بخير وخاطري مستريح
‏ومؤمنًا بـ التجارب والقضا والقدر

‏ومنعزل عن مروجة الكلام القبيح
‏ماتقصر شبر ولا تطول شبر

....

‏تدلعي وأخذي القلب النزيه الغيور
‏يالفتنه اللي زمام الأمر في يدينها

‏اليا غشاك الكبر ولا غشاك الغرور
‏هذي من حقوقك اللي تستحقينها

....

من يحسّ بـ قيمة حضوره يغيب
عادة الأحباب في هذا الزمن

كلّ ما فارق أحد قلنا نصيب
وبـ الأخير قلوبنا تدفع ثمن

....

إن كان ودّك تقضي العمـر مرتـاح
‏ويرزقـك ربك بالحـيــاة الهـنــيـّـة

‏استر عيـوب الناس لا تصير فضّاح
‏وعامل جميع الناس في حسن نيّة

....

‏لقيت في الجلسه لحالي فوايد
‏سلامة ٍ للقلب مع راحت البال

‏ان ضاعت الرفقه بوقت الشدايد
‏وقت الرخا كلٍ سنافي ورجال

....

‏لاخابت الهقوه ترى مابها عيب
‏قلّطتها واشره على اللي فهقها

‏النّيه اللي كانت تصيب وتخيب
‏ضاعت مثل عمياً تغنيّ لـ صقها

....