فوق هام السحب ( الشعر الشعبي) على متن القوافي

‏اما عشقنا عشق مافيه تلفيق
والا هجرنا الحب مذهب ومله

اما غرام يشرح الصدر طاريه
والا عسانا ياعرب ماعشقنا

....

لاجيت طيّب قالوا الناس مسكين
وإن جيت أقشر قالوا الله يشيله

ولاحدّتك دنياك للفقر والدين
قالوا فقير وحمّلوك الفشيله

ولاضحكت أيامك وحصلت قرشين
قالوا ترى نصّاب ياويل ويله

ولاجبت غلطه حطوا العيب والشين
وزادوا على غلطتك قاز وفتيله

ولاجاتك الزلّه وتاهت عنوانين
قالوا ترى مجنون خلوا سبيله

ولارحت مقفي مع رجالٍ مقفين
قالوا ترى المقفي ندور بديله

ولاجيتهم بالجود وفعل الكريمين
قالوا يهايط كل صبح وليله

وان طحت خلوك العرب والمحبين
واللي يطيح ف هـالزمن عزتيله

قال الجمل لاطاح جتك السكاكين
وكلٍّ على ذبحتك بيشد حبله

هـذي حقيقه قلتها وسط بيتين
من شاعرٍ ساق البيوت الجزيله

جرّبت في الدنيا وشفت الكثيرين
وأشوف هذا الوقت مافيه حيـله

الناس ماترضى لو تسكن العين
وصعبه تحقـق حاجةٍ مستحيله


....

‏ياذا المساء روق وهات الطواريق
‏خل النفوس بروعة الجو تسلى

‏فنجال من دله وكاسه من أبريق
‏ونفس خفيفه مع قصيد محلي

....

‏خلوني ابعد عن الواقع واعيش الخيال
‏مع اني العاقل اللي عايشٍ واقعي

‏لكن من لايحمد الله على كل حال
‏اما ماعنده صبر والا ماعنده وعي

....

ستر المواجع داخل القلب راحه
‏لو يمتلي صدري بها ماتكلمت

‏ماهو جديد القلب يخفي جراحه
‏ولاهو غريب الضحك مهما تألمت

....

رسالتي لك....

إن شئت ألاتدور عليك الدوائر
فلا تفضح مستترآ
ولاتشمت بعاثر
ولاتسخر من مبتلي

ابشرك لا زال قلبي ينبض
بالحب لك والشوق لك يملاني

الروح تواقه وعقلي يرفض
فكره محبة اي واحد ثاني

والعين تسأل والمشاعر تلفض
رغباتها كلمات من وجداني

تعبير يشرح لك ومعنى يوقض
ضمير قلب احساسك الانساني

من اجل لاتجبر شعوري يفرض
واقع وينسا كل من ينساني

....

‏
‏يانجد ماني غريبه لو شعوري غريب
‏انا قصيده تغنت بك وصارت مره

....

‏هذا أنت ياللي مال حبّك نهايات
‏يستقبلك حاضر ويحضنك ماضي
‏
‏في زحمة العالم لو تمر لحظات
‏كنّ المكان إللي تجي فيه فاضي
‏
‏بس أنت من يجعل من الهم بسمات
‏يمرّك الزعلان ويروح راضي

....

‏كنا انا وياك والثالث الليل
‏ويضيع كل الليل بيني وبينك

‏حنا تعودنا على بعضنا حيل
‏هذا انا والليل بس انت وينك

....