ديوان قصائد لشعراء المملكة العربية السعودية (متجدد)☘️☘️

قصيدة حب الشرف
الشاعر: أمجد الدبيسي أمجد الدبيسي
#العصر الحديث
#المملكة العربية السعودية
0
342 مشاهدة

حب الشرف يانااس ماهو بعادي

اعط الثرى للكل وراح الثريّا

دربه عزيز النفس والرب هادي

هو ارتواء الذات والخلق ضميا

ماهو بشبة نار عقبه رمادي

حييته بصدقي وبالصدق حيّا

معزوفتي طفله تحقق مرادي

باسبابها الارواح تسكن بالاشيا

هي صوت ابو نوره وريشة عبادي

يطرب له الخافق ومنها تفيا

يومي لها قلبي وروحي تنادي

ماهمها مْهند ولا حب يحيا

باسبابها قام يتهنا رقادي

وعين البشر عن درب هالصدق عميا

احدٍ على الشينه يحث الهدادي

واحدٍ عقب ماذل للعز عيّا

ياناس ياللي حبكم شي عادي

وش جاب حبات الثرى للثريا

قصيدة مغشا بدويه
الشاعر: أمجد الدبيسي أمجد الدبيسي
#العصر الحديث
#المملكة العربية السعودية
0
343 مشاهدة

سلام يالبحرين يادار الاجواد

يا اهل الكرم واهل العلوم النقيّه

مْن الشمال ارسل وللغالي انقاد

اللي جفت من عام يده يديّه

مشتاق له شوق الطفوله والاعياد

وشوق الشيوخ لرشفة الشاذليّه

لايابو تاله ماعلى البعد نشاد

والوصل له بين الحنايا مطيّه

حاولت احايل ماضي الوقت ولافاد

عليك ساقتني علومٍ قويّه

وغير الغلا وشلي على سرد الاعداد

ياواحدٍ فيك الليالي هنيّهّ

اخوك يامحمد على الضيق يرتاد

ولولا الحيا ساق الدموع الشقيّه

على الهنوف اللي لها القلب مقعاد

اهديتها عمري واخذت المنيّه

فيها الحلا طاغي وكل يوم يزداد

وانا ازيد مْن الحميّه حميّه

إليا مشت بالسوق بالعين تصطاد

حتى المقاضي لاخذتها هديّه

ولاشفت ليلٍ شقه الجمر وقاد

ذيك الشفايف تحت مغشا ابدويّه

غابت وانا رجواي للوصل ميعاد

وابطيت انادي والليالي خليّه

ماعاد لي رغبه على الشرب والزاد

ولاعاد افرّق بين صبح وعشيّه

لاعدت ياوقت المفارق ولاعاد

قلبٍ بدا نبضه بليّا هويه

كن الضلوع تحايل النفس بعناد

وكني ازيد مْن الخطايا خطيّه

يامحمد الحاله من جهاد لجهاد

واشيب عين اللي خذتْه اجوديّه

اخوك ماهو للغنادير طرّاد

ولا له على سفح المعالي رديّه

تقدر تقول انه على الثقل معتاد

مير اصطفق مابين هذي وذيّه

وامسى بهمٍ ماله حدود وابعاد

ويذكرك ياذخر الخوي لخويّه

قصيدة خارج السرب
الشاعر: أمجد الدبيسي أمجد الدبيسي
#العصر الحديث
#المملكة العربية السعودية
0
337 مشاهدة

يامدلله توّك صغيره على الحب

وقلبك رهيّف مايتحمّل عذابه

كانك تربيتي على المزح واللعب

اللعب في هذا الزمن للذيابه

ابنصحك نصيحة الأخ والأب

ومن قبل ماعمرك يضيّع شبابه

خلّي رقيبك بين هالعالم الرب

حنّا بزمان اتقل فيه الرقابه

وان كان نهج الغيد في متعة القلب

خلّك على نهج النبي والصحابه

ثم غرّدي يا مدلله خارج السرب

دينك غريب وزوّديهم غرابه

من يتبع الأهواء بالنآر منكب

غير النقا.. لايفتح القلب بابه

وكانك فهمتيْ النار وشلون تنشب

خلّي السؤال اللي يضرك جوابه

تبقا الوقايه خير من جرعة الطب

ويبقا العنا لإنسان مغرم صبابه

يا مدلله تعبت من سيرة الحب

وماعاد فيني حمل اجاري عذابه

قصيدة كلن يكلم بجواله
الشاعر: أمجد الدبيسي أمجد الدبيسي
#العصر الحديث
#المملكة العربية السعودية
0
330 مشاهدة

سجيت بالبر ورمآله

مع رفقةٍ تشرح البآلي

والجمر من فوّح دلآله

اقفوا حسآفه عن دلآلي

كلٍ يكلم بجوآله

وآنآ اقلب بجوآلي

والله يآشينهآ حآله

كنّي وانآ معهم لحآلي

الفكر من شآل موآله

سمّعت للكل موآلي

احدٍ ضحك منّه وشآله

واحدٍ تلقّى الخلآ الخآلي

مآلي جدآ كود برسآله

وبالشعر خطيت مرسآلي

ومن مآل فكره مع عقآله

عدّلت له فكرة عقآلي

قصيدة غربه وجن
الشاعر: أمجد الدبيسي أمجد الدبيسي
#العصر الحديث
#المملكة العربية السعودية
0
326 مشاهدة

مليت من غربه وترحال وهموم

ومليت من فكري ومن حال جاير

حتى المكان اللي انا فيه ملزوم

مل التعب كنه يهل العباير

احيان اخاطب ماكويته من هدوم

واسمع صداها بين لعب الستاير

اسكت وعيني شافت علوم وعلوم

ناسٍ تجي وتروح وسط العواير

مشيتها ياما على بالي حلوم

لين اتضح مابين وجه وضفاير

لاياصديق القوم لاتعلم القوم

خل الذي صاير ولاكن صاير

هذا المطر ينزل وحنا له غيوم

والخوف ماله دار بين الزراير

خلك كذا انسان بالحس معدوم

والا تذوق من الدواير دواير

حنا رفاقة درب محتاج لعزوم

ولانحسب حساب العنا والخساير

الصبح كنه من قسى الليل ملطوم

والناس ماعادت تحب البشاير

ياصاحبي مجلاسنا كله نجوم

وذاك القمر واقف ولاهو بحاير

واللي تشوفه صدق لا مانت موهوم

سولف ترى مافيه ضيق وعزاير

ديارنا غربه ومجلاسنا هموم

بنعيش ولو هالوقت بالحيل جاير

قصيدة اللي يشوفك يحبك
الشاعر: أمجد الدبيسي أمجد الدبيسي
#العصر الحديث
#المملكة العربية السعودية
0
322 مشاهدة

اللي يشوفك غصب عنّه يحبك

واللي يحبك غصب عنّه يصونك

واللي يصونك وسط قلبه يصبك

واللي يصبك.. يسكب اللي يجونك

وانا ياسيد الحسن..!! قلي بربك

وش موقفي لابعت كوني بكونك

صحيح قلبي ساع سفتك نشبك

لكن بعد حبيت صادق ضنونك

شفت القصيد اللي كتبت.. انكتبك

إلهامه.. احساسك وشكلك ولونك

وكانه مثل ماقلت لحنه لعبك

انا اتعبتني بالمحاسن لحونك

اتكلم وخل المشاعر تهبك

ابسمعك واشوف حبك بنونك

ان قلت نار الشوق دايم تشبك

انا رخصت العمر يازين دونك

ورضيت في داء المحبه وطبك

واعطيت لك عقلي مقابل جنونك

وباسباب كل من شاف عينك يحبك

قررت اذكي من يناظر عيونك

قصيدة عيون السهر
الشاعر: أمجد الدبيسي أمجد الدبيسي
#العصر الحديث
#المملكة العربية السعودية
0
316 مشاهدة

يابونبيل البارح بحزني اردفت

متى على الله يرسي الخير مرساه

الحظ يطلع ثم ينزل كما اللفت

والعقل ينزف ضيق والنفس تنهاه

متحوله من دون آلتٍ ولاشفت

هذي لغتها هم وللزين عزاه

كني على مهوى المقادير وقفت

وقفة يتيمٍ حاير العقل بخطاه

واقلب الماضي ولاقد تحسفت

لن القمر ماناله اللي تمناه

ومن حظ غيري لو بيدي تسلفت

واسلي الخاطر بغروٍ تسلاه

ياليتني شايب عسا اقول خرفت

لكن شباب وشكوة العمر شكواه

دربي يمين ولابه من العرب شفت

كني وحيدٍ مالقا شخص شرواه

يابو نبيل النوم ماجاني وعفت

من طاري الاحزان والبين والآه

لو عندي طيور الهوى كان ولفت

زوجين تنجبلي سلاطين الافواه

ماكنت انا بالهم وحدي تكلفت

لكن يظل الضيق يلعب بشلفاه

ياباشة الاخلاق فيني تشرفت

واخذت كل العلم بأقصاه وادناه

ومشيت في عرض الحياه وتعرفت

على مريض يدوّر بقلبه دواه

من حالة الميؤس حنيت واذرفت

دموع المعاني والورق صار يفداه

بكتب من ابياتي ولو قالوا اسرفت

اقول من هذي حياته عذرناه

سرابي ماسرى فيه واخلفت

وراحت نصيب البهذله والمعاناه

انا الذي فيها سطيت وتلقفت

اكتب بليلي والنهار ارجع اقراه

لو كانه امرٍ غير هذا تصرفت

لكن خصيمي دوم يسرقني حماه

حماه الفؤاد وبصبع الشوق طرفت

عيون السهر واعميتها خوف مسراه

ونقصتها مع مانقص مني وضفت

اشيا كثيره تذبح لشوفته شاه

قصيدة خلف الكواليس
الشاعر: أمجد الدبيسي أمجد الدبيسي
#العصر الحديث
#المملكة العربية السعودية
0
294 مشاهدة

وجيه العواذل ياحبيبي معابيس

والا انت وجهك نور ليلي وبدره

الحب ماله في حياتي مقاييس

يزيد في شوف المحبين كبره

فيك اكتب ابياتن من اول محابيس

وشعري بوجودك زاد بالحيل عمره

لا صرت وحدي تجتمع بي وساويس

كنْها تقول الزين موجود فطره

احدن بنومه شال هم الكوابيس

وانا بنومي تاخذ العين نظره

وهذا بحياتي مثل خلف الكواليس

محدن يشوفه لكن يشم عطره

فيه القصايد مثل دق المراويس

يطرب لها قلبن تغنى بعشره

وشمس الوفا ماهي بحول الدحاليس

يبقى الوفي شامخ ولا يضيق صدره

والجاهل اللي كل اموره معاكيس

ماهي غريبه ينفجر فيه صبره

بعدت عن دربن يجيب المناحيس

ما ابغى احس بشك مثقال ذره

ربي خلقت من الاوادم اباليس

ومن ضمن خلقك ناس بوجيه سفره

والخل نوره مثل نور الفوانيس

في ليلتن فيها القمر جاب عذره

ليله سعيده دون هم الجواسيس

ياناس خلي معتلي فيه قدره

والعين ياعيني عيون النواعيس

وشلون لو كشّف عن الوجه ستره

قصيدة اطراف المدينه
الشاعر: أمجد الدبيسي أمجد الدبيسي
#العصر الحديث
#المملكة العربية السعودية
0
287 مشاهدة

من كذبة اطراف المدينه تحطمت

ناح الحمام ولكن بدون الاغصان

وبيدينك الخجلا نعشت وترممت

اصبحت كني حاكمٍ كل الاوطان

لضيف قلبك فضت مصخر واكرمت

وانا بضمى بعَدك وهالحين رويان

ان شفتني ساكت وملزمك بالصمت

اعرف تراني فيك هايم وسرحان

اضيع في صوتك ولو ماتكلمت

اسمعك دايم مع نسانيس خلان

لاجلك في بحر الشعر ياكم انا عمت

وتوجتك بقيفان وفاضت بك اوزان

ما اختار غيرك دمت او كان مادمت

لأنّك وحيدٍ مالفت مثله ازمان

باحلامي اشوفك واشوفك اذا قمت

من عزها واعانقك طيف ولهان

لو قلبي اتقفل وللباب حكمت

يفتح لك احساسي من اقصاه روشان

ما ألوم انا العالم ولو يوم انا لمت

ألوم شخصك لو تنحا ولا بان

جبت الجنون وحضرت الفكر وألهمت

حبرٍ يشوفك بين هالناس سلطان

رجعتني للخلف والناس وقدمت

فرعون قلبك وابتدا هول الاعيان

مجرم محبه بين الاضلاع تمتمت

واتصخّرت لك عوجت الدرب بألحان

انا الوحيد اللي لاجل ناظرك صمت

وافطرتك بعشرت زمن قلب جوعان

خطي انحرف حبري صرخ مير ماشمت

عزّمت اجيبك شكل حارت به ألوان

معذور ياحرفي اذا به تلعثمت

لن الفؤاد بنظرت العين طربان

ماتشوفني سارح وبسكوت سلمت

ناحت حمامه وافيه فوق الاغصان

قصيدة برد الكرك
الشاعر: أمجد الدبيسي أمجد الدبيسي
#العصر الحديث
#المملكة العربية السعودية
0
279 مشاهدة

الموقف اللي نمرّه حَرج

ياكيف ابطلع من احضانه

البرد خل العظام ترج

من ساع مد الهوى لسانه

حتى الستاير تسوق الهرج

واحساسي الشمس بردانه

لا يا اهْل مؤته واهل المرج

ما بالكرك للدفى خانه

وخيل المسا مالقا له سرج

لين ابتلاني مع ألحانه

خلك ياقمرآي وسط الدرج

بالبرد ما انتي بسهرانه