ديوان قصائد لشعراء المملكة العربية السعودية (متجدد)☘️☘️

قصيدة الفصول الأربعة
الشاعر: محمد بن عمار محمد بن عمار
#العصر الحديث
#المملكة العربية السعودية
0
266 مشاهدة

إن كان كل ما نشتكي ضرسٍ نروح ونشلعه

فهذي مصيبة لابغينا الزاد وش نأكل عليه

الصبر، به طب ودواء، للي يريد المنفعة

ولحمه ودمه له أمانة، في يده محدٍ يجيه

لوهو زرع في كل يومٍ بالفصول الأربعة

ما جاد له لو نصف محصوله لحولٍ مشتقيه

والحَبَ دايم يرجع لبذره حسب ما تزرعه

وترى الحصيف اللي يميز كل نوع وينتقيه

وإلا الولد،، مهما كبر باللين ممكن تقنعه

ما فيه أحد عايش بها لدنيا بلا عيب ونزيه

حتى العقول أرزاق، من عند الإله موزعه

واللي إنكتب له في جبينه، لازم إنه يلتقيه

ولكل إنسانٍ، بعنقه طائرٍ، ملزم معه

من وين ما يمشي يراقب كل دربٍ به مشيه

وراعي النمايم والله إن ودك لسانه تقطعه

إذا نقل، بين الولد وأبوه، هرجٍ مجتريه

ياما أبو من عقب فرقا ابنه تهامل مدمعه

وياما عجوزٍ ساهرة طول الليالي تحتريه

وندري بأن الحر مهما طار، وكره مرجعه

وإلاّ أبرق الريش إن تبعّد في مطيره بيتيه

والرجل ما ودّك يجي صلفٍ ولا هو بإمّعه

ما بينهن، يروز نفسه لا لذيك، ولا لذيه

وكل من تواضع عن كبر حقٍ على الله يرفعه

في مركزٍ مرموق بين الناس وحالٍ يرتضيه

قصيدة وطفاء الحجاجين
الشاعر: محمد بن عمار محمد بن عمار
#العصر الحديث
#المملكة العربية السعودية
0
227 مشاهدة

مفهوم حبي، له نظام، وقوانين

مبني على ساسٍ مكينٍ قراره

مع الحبيب، اللي بكل المضامين

من وين ماوجّهت، حدّد مساره

أغليت شخصه مرخصٍ كل غالين

والروح بين ايديه رهن الإشارة

وأقول أنا، ياللي، تلوم المحبين

ترى آخرة مسعاك ذل وخسارة

في صاحبٍ تفداه وطفا الحجاجين*

من جملة أهل البادية والحضارة

أقفا وقلبي منشطر، منه نصفين

أتلف سراجيفي، بجور إنشطاره

مصهور من نارالغلا بين ضلعين

ذوّب عظامي من شديد انصهاره

من بعد ما كان الحشا به بساتين

اصفرّ زرع القلب عقب اخضراره

على زمانٍ، مابقي، به موالين

أقرب قريبٍ لك، كثيرٍ هذاره

من كلمةٍ يقلب جميع الموازين

وهو غشيمٍ ما يصيغ، العبارة

وأنا على هالحال لولي جناحين

أطير مثل الطير، وأسبح جواره

مدام طول الصد ، والبعد حادين

والقلب، ماله خيرةٍ فى اختياره

بأشوف خلٍ منتويني من سنين

من عقب ماشطتّ، علينا دياره

ولوالهدف إنه.! تمتع مع الزين

اللي سلب عقلي، بجد وجدارة

إن كان ماغضّّيت من نظرة العين

يوم الهواء يلعب بقرضة خماره

ولاعذلت القلب من بادي الحين

ومليت عيني منه، بأول زيارة

وسلمّت نفسي والعقل للشياطين

وأخذت شفيّ منه في عقر داره

قصيدة ياحيلة الله كيف
الشاعر: محمد بن عمار محمد بن عمار
#العصر الحديث
#المملكة العربية السعودية
0
226 مشاهدة

البارحة ليلي قضيته بهوجاس

من شيئٍ بنفسي وحالي وطاها

ماذقت حلو النوم والبال منحاس

والعين طاولها السهر مع بكاها

تنثرغزير الدمع من غير مقياس

وتعبت مع قلب الخطأ من شقاها

وأصبحت في بحر الهواجيس غطاس

وهموم قلبي طوّلت في مداها

فرقا هلي ما قد طرت لي بالأتعاس

لاشك عافوني، وهذا بلاها

عشرينٍ شهرٍ كاملاتٍ بلا أوناس

وأنا أدراي حالتي في خفاها

حتى أبوي اللي سنيدي من الناس

ماهمتها فرقاي يومها نواها

ياحيلة الله كيف؟ ماهو بحساس

ماحس باللي سمّ حالي وطواها

ياوالله إلاّ حال من دونه الياس

وأصبحت عقبه هايمٍ في دجاها

كل السبب هرجة عذولٍ وبلاّس

وبأمرٍ من الله نفترق في مساها

حيلي تردّى قمت أنا أباري الساس

وأقدام رجلي ثاقلاتٍ خُطاها

مهوب رخصٍ للشرف يوم ينداس

لاشك سوّاها عدوٍ بغاها

مالي رفيقٍ أشتكي له وجلاّس

إلاّ ولي العرش عالي سماها

عيا القدر لانجتمع قلت لاباس

سيوّر عيني تجتمع مع مناها

غصون قلبي، هايفاتٍ ويبّاس

والحال مني، قرّبت منتهاها

والله وحق الله، قطّاع الأنفاس

اللي فرض خمسٍ علينا أداها

إني فلا مرّيت في درب الأدناس

والخافية، فوقك رقيبٍ يراها

وأبي السموحة منك ياعدم الأجناس

ترفا لي الزلة وتدمح خَطاها

ماهوب والله قول حبرٍ بقرطاس

لاشك من شيءٍ بنفسي حداها

وأختم كلامي عدّ ماهبّ نسناس

على النبي صلوّا عدد من قراها

قصيدة بانت خطة الملعوب
الشاعر: محمد بن عمار محمد بن عمار
#العصر الحديث
#المملكة العربية السعودية
0
214 مشاهدة

عرفت القصد ياشاطر
وبانت خطة الملعوبودورّ واحدٍ جاهل يصدق واهي أعذارك
وهذا درس للحاضر
وللآتي، يجي محسوبنواياك الردّية وضّحت لي خافي أسرارك
بتلقى في البشر سافر
وطبعه محتويه عيوبمن أحلامه بنى أوهامه لوكرٍ يشبه أوكارك
لأنك شفتني صابر
لجرعة، علقم المشروبتهيألك، سكوتي ناتجٍ من زايد إصرّارك
تعاسة حظك العاثر
ومظهر، لونك المشحوببه أظلم يومك وطفىّ بدربك واهج أنوارك
أنا وإنّ متّ ياغادر
من أسبابك فهو مكتوبنهار الحشر نتلاقى، وأرجّح كفة أوزارك
تصدق أنت لي صاير
إذا جاز الكلام ذنوبمحّملني على حملي ومسرف لي بمعيارك
تماطل بي وأنا خابر
نهاية، دربك المنكوبتهاوى له مشارف عزّك وينهّد به دارك
بوضعٍ يكسر الخاطر
وفعلٍ ناقص الإسلوببرت حالك من أفعالك ومعها قل مقدارك
يجي لك يوم ياباير
بوعدك لي كما عرقوبتحسّ إن الوفاء دربٍ طويل فيه مشوارك
تغنىّ داخلي شاعر
على بحر الشعر مسحوبمواويل القصيد اللي حواها يانع أزهارك
تمنىّ والمنى نادر
ولا أحدٍ بالشقاء مغصوبتصاريف الزمان إن أبعدت بك تقصي أخبارك
بها كف القدر قاهر
متى، ما واجهك مغلوبيجي بأقسى الظروف ويعترض دربك ويختارك
إذا عندك ذكاء باهر
وفي بعض الفرص موهوبفميزات الذكاء عقلٍ رزينٍ يدعم أفكارك
تأكدّ، إن في الخاطر
تلاشى كل شيئ مشطوبلتداعي قصرك العاجي تهاوت عالي أسوارك
تصوّر جرحي الغاير
من طعون الحشا مصلوبينازع كل يوم ويحتضر من جاير أضرارك
لذكراك أجلس أعاقر
نديمي المالح المسكوبمعاصر ناظري تملأ القدح من مزنة أمطارك
وخذ كلمة على الطاير
بها فيك المثل مضروبلقينا الحلو في الماهج بديل لأعذبّ أنهارك
ألا يانجم ياسامر
بليلٍ والقمر محجوبدخيل الله يعذبني شجن عزفك على أوتارك
على شان الغلا ساهر
وفانوس الفكر مشبوبلأجل عذب الكلام اللي تغنى فيه بأشعارك
أحلّق لا، سجى الساتر
بشوق شّدني وأذوبوأهيم بهمس عشاقٍ يعبر الطيف لأقمارك
وأطفيّ شوقي الثاير
بمحبوبٍ بدل محبوبوليد التوّ، واللحظة مداره يسبرأغوارك
بدأ لي طيفك مجاهر
بحسنٍ ما حوى العذروبوقلت لكل شخص حاضر لا تبدي أشوارك
غزال بسنك وقاصر
شبابك باديٍ يادوبعلى موتي ورغم أنفي أوّقع محتوى إقرارك
شهقت وقلت ياساتر
لأجل عينك أنامندوبزميلك قال لي أشغلت فكرالضيف بهذارك
وهذا تاسع أوعاشر
شهر يمضي وهو مخطوبوروح أرجوك وإتركنا وغض بدربك أبصارك
بديت بهرجي مبادر
بأنشطّ فكري المتعوبوقلت الحب من نظرة رماني بسكة أقدارك
بعد مارمشك الجاير
طعني، بقلبي المصيوبكتمت بونتي الله يكافيني من أشرارك
دلالك والحسن آسر
بطبعٍ صارلي مرغوببأول يوم تدعيني حضرت لحفلة إفطارك
وهدى دمعي الفاير
مسح نزفه بكم الثوبوقال أرجوك هدئ الجو لأحبابك وسّمارك

قصيدة ماكل من يجهد مصيب
الشاعر: محمد بن عمار محمد بن عمار
#العصر الحديث
#المملكة العربية السعودية
0
211 مشاهدة

أهلا هلا يامرحبا، وألف ترحيب

باللي نهار السبت أبدى المودّة

الصاحب اللي مرسل القاف ترتيب

حقٍ علي ماوصلني، منه أردّه

ما شفت في ممشاه ميلٍ وتعييب

الجود ورث أبوه، من جد، جدّه

الطيب من مجناه، ما فيه تكذيب

كلٍ على أصلّه دوم يرجع مردّه

في الجوف مايحتاج جرحه لتطبيب

وفي القلب حبه ما خذٍ كل حدّه

ملتني، الأ يام، عَدٍ وتحسّيب

الله، من شهرٍ مضى له، أعدّه

لو حدّت الفرقا على شقّة الجيب

غلاه، شيءٍ صار، مامنه بدّه

في غيبته لوهو كسا راسي الشيب

من ودّنا في الله،، لا زم نودّه

كلٍ يقول الصدّ، والبعد تعذيب

لاصار من شخصٍ تمادى بصدّه

وأقول أنا ما كل من يجهد مصيب

بُعده ترى ياناس،، ما هو بودّه

بعض العرب هرجه لباقه وتهذيب

لا من هرج، ما عاد ودّك تهدّه

وبعض العرب يحتاج علمٍ وتأديب

لا من هرج، ودّك طراقٍ تلدّه

وكلّش بها لدنيا، يجي له تسابيب

بالك تقول الحظ، والوقت، ضدّه

قصيدة الصافنات المساريج
الشاعر: محمد بن عمار محمد بن عمار
#العصر الحديث
#المملكة العربية السعودية
0
202 مشاهدة

سج الفكر واهموم قلبي معاريج

والنوم جافا العين، وجدد سهرها

غدت طعون القلب مثل الخراريج

من شاف حالي في شقاها عذرها

يرجف رجيف الصافنات المساريج

يوم الطلا يب، جامحاتٍ بأثرها

إذا عدت تطوي، فيافي الزراريج

في ليلةٍ، مفقود،، فيها قمرها

يدكني الهاجوس،، دك البواريج

والروح من جوره، تزايد قهرها

أعوي عواء ذيبٍ بعالي المداريج

دمعي على الأوجان،هل وغمرها

إنشل فكري،، من عيونٍ تباريج

للي بسهم الموت، يقدح شررها

تلت خفوقي،، مثل تل الدراريج

لرشاء الدلو، والصوح جاله نثرها

حبي لها ماهوب حب الخواريج

حبٍ ضنى حالي، ونفسي دمرها

على النقاء ماهيب تمشي بهاريج

عن كل دربٍ شين غضّت نظرها

ماعمرها تسمع، لحكي الهراريج

وأهل النمايم، يوم شاعوا خبرها

نزّهتها، عن موجبات التحاريج

وقدمت روحي، والمشاعر مهرها

جاعد شبيه، امعرّجات الكراريج

فوق المتون، امجدلينٍ شعرها

الصدر زامي فيه بيض الفراريج

والقد غصنٍ ها زعٍ به ثمرها

والخد يشعل، مثل نور السراريج

والجمر يوقد، في مجامر ثغرها

والوسط مطوي مثل طي الكواريج

والعقد مفتولٍ،، يطوّ ق نحرها

راعي الهوى، ماظن يلقى مخاريج

مهما عن الغزلان، نفسه عسرها

يصبر عسى ربه يجيب التفاريج

وترتاح نفسه، من تزايد كدرها

قصيدة كفيّ طوّ قت معصمه
الشاعر: محمد بن عمار محمد بن عمار
#العصر الحديث
#المملكة العربية السعودية
0
196 مشاهدة

ياصباح الورود اللي حوت مبسمه

وياصباح الجمال، اللي بدأ وإحتجب

من نضارة محيّا ، بالصبا مفعمه

مع بوادر شباب وغايةٍ، فى الطلب

مطلقٍ له جديلٍ، واصلٍ محزمه

ومجهده ضيق ملبوسه وطول الكعب

بكنترول الفكر قمت أجمعه وأرسمه

صورةٍ في الخيال مطرّزه بالذهب

لدّني بنظرةٍ،، أهدافها، مبهمه

صار من عقبها، حالي، نديم التعب

أمطرتني سحايب دمعي المرزمه

من مضيق المحاجر تنثره، وإنسكب

والمشاعر بصدري، نارها مضرمه

ألهبت خافقي والصدر منها إلتهب

هالني، وآعساني بالعمر مااعدمه

مرهيٍ بالجمال، وقمةٍ في الأدب

عين ترعاه، وعينٍ لا ابتعد تزهمه

من غلاه بعيوني، ما تعدى الهدب

قلت ضيفٍ، وحقٍ يالغلا تكرمه

قال يامرحبا، والضيف، حقه وجب

مدّ يمناه، وكفيّ، طوّ قت معصمه

مال! وساعة جذبته، إنثتى وانجذب

حلّ، حبل النقاب، وكرّرالسلهمه

عشت لحظات أحس العمر فيها إنكتب

بان نورالبدر، من غيمةٍ معتمه

وشفت شيءٍ سبا قلبي، وعقلي نهب

بدّد النور صفحة هاجسي المظلمه

وهمت في عالمٍ ثاني وشفت العجب

لاعج الشوق ثار، وما قدرت أحكمه

عامل الوقت وفكري للإ رادة سلب

لوملاك الجمال، وحايز الأوسمه

شاف ماشفت خلاّ العرش له وإنسحب

شفت طلع البشاير، معتلي ميسمه

غض وسط السداة، وبالغصن مالعب

قلت معقول مثمر من قبل موسمه

وإلاّ بعض الأراضي خصبةٍ في الجدب

لوهو سحرٍ حلال، فبيّنٍ طلسمه

ينخرالعظم ويسطي باللحم والعصب

ينعرف لاحوى، جوف الفتى ينهمه

يآكل الجسم مثل النار، لأكل الحطب

كل عاشق وحبه في الهوى نعلمه

من تعابير وجهه،لا إعتراه الغضب

إلاّ، حبٍ سكنيّ، لو ظهر له سمه

صار مضرب مثالٍ للعجم والعرب

زاد جوره عليٍّّ، وما قويت أكتمه

قلت ماذي، بشوفة، غاليٍ تحتسب

الغلا، لوتمعّن، مقصدي وافهمه

كان، مالي مشاريهٍ،عليه وعتب

منه نور النظير، وللشعر ملهمه

ومكسبٍ للمغامر، لو جلا وإغترب

دام عهدٍ،على نفسه، لنا مبرمه

إنتقض منه وجمّ الصدق غار ونضب

يطلق اللي أسيرٍ في هوى مغرمه

مشرفٍ بالهلاك،، ومنه موته قرب

كيف طب وطبيب، لجرحه وبلسمه

وكل ما جاه عطشانٍ رجع ماشرب

الزمن لا ضحك لأحدٍ كسب بأسهمه

ولو يكشرّ بوجهه يخسر اللي كسب

حتى قافي عصاني، فيه وأنا أنظمه

قام يرجع خلافه، ماعرفت السبب

يوم فكرّت بأمر القاف وجيت أحسمه

قال لو فيه خيره، كان غيرك غلب

قصيدة نكّست الأعلام
الشاعر: محمد بن عمار محمد بن عمار
#العصر الحديث
#المملكة العربية السعودية
0
188 مشاهدة

عز القصيد، وجف ينبوع الإلهام

وتداعت حروفي،، تخالط دموعي

تكسرت فوق الورق روس الأقلام

وأطفت ليالي الحزن ضي الشموعي

وإنهد قصرٍ قد،، بنيته بالأوهام

جرايد سقوفه،، حطبها، ضلوعي

ونكست أنا من عقب فرقاه الأعلام

وأعلنت يوم الحزن وسط الجموعي

عفت البقاء من جور صكات الأيام

وأنا أحسب إن الدهر يرحم خضوعي

لاوآهني، اللي به الشوق ما هام

ماهو بقلبه، مثل، قلبي،، جزوعي

ليمن طرالي لوهو بأضغاث الأحلام

من عز نومي، أنتهض له وأفوعي

ويقفي وهو يرفع لي إصباع الإبهام

وعيني تراعي له،، وكبدي تموعي

الله من ليلٍ، غشى الطرف ماانام

سهران وراسي،، مرتكي له بكوعي

جالس أعدد،، للكواكب والأجرام

وأرقب خيوط الشمس وقت الطلوعي

قصيدة نايف الطاروق
الشاعر: محمد بن عمار محمد بن عمار
#العصر الحديث
#المملكة العربية السعودية
0
182 مشاهدة

سرى الهاجس وهيّض معه نايف الطاروق

على اللي هجرني وأشغل البال بفراقه

شكيت السهر والوجد من حرّ، نار الشوق

ولكن صروف الدهر، للخلق، سبّاقه

ذكرت الذي لأجله ستار،، الحشا مشقوق

ذبحني بهجره، والحكي صار بشفاقه

وعندي خبر، إن الهوى، كاتبه من فوق

إلهٍ كتب آجال، خلقه، مع أرزاقه

ترى اللي مثل شرواه، له مركزٍ مرموق

عزيزٍ وهرجه، لا نطق، كله لباقه

بنى له بجوفي منزلٍ بالحشا مطقوق

ضلوعي كما الأطناب وصدري له رواقه

قتلني حسين الدل، بأخلاقه اللي ذوق

وطرفٍ كحيلٍ صفتّ رموشه، دقاقه

إلي من خزرني طحت في موقفي مصعوق

خطف ناظري من صفحة الخد برّاقه

وحالي برت واللي بقا دم! وسط عروق

برت مثل غصنٍ مورقٍ نشفت أوراقه

ضربني برمحٍ، إخترق حدّه المعلوق

تخطىّ، ضلوع الصدر، من قوة إطلاقه

ولاعاد دون الموت إلي صرت أنا مخنوق

سوى الكف أداري به عن الحلق خنّاقه

طلبته.!على وضح النقاء، كلمةٍ برفوق

يبّرر جفاه، أو يرحم القلب، بإعتاقه

أنا دايم أخشى، هرجة العاذل المطفوق

ومثله صديق المصلحة، أحذر، نفاقه

وشيءٍ طبيعي في دروب الهوى مسبوق

سبقني الهلالي لاعج الشوق قد ذاقه

وأعزّي فؤادٍ به همومٍ، تسوقه سوق

على شوفة المحبوب زادت به أشواقه

أنا إن مت، من شانه ترالي عليه حقوق

حقوقي عليه، إنه نقض عهد ميثاقه

عسى مزنةٍ تسرى، تكاشف رعد وبروق

مراويح ذعذاع الهوى، نوّها ساقه

تعل الشعيب، وينبت الزرع والزملوق

وتسقي الديار، وخالق الطير رزّاقه

وهذا سلامي له، عسى الله يجيب وفوق

تحية محبٍ قالها له، من أعماقه

قصيدة الغريق
الشاعر: محمد بن عمار محمد بن عمار
#العصر الحديث
#المملكة العربية السعودية
0
181 مشاهدة

ياجماعة عطوني رايكم في غريق

طاح في غبّة بحورالهوى والغرام

عذبّه مركبه والبحر يصفق صفيق

ساعةٍ غاب فيها النور وحلّ الظلام

يزبد الموج وبصوته فحيح وشهيق

يحسب اني أباارفع رايتي للسلام

قمت أنادي وحلقي جفْ مافيه ريق

ليه! غدّار، باللي في أمانك ينام

ياجماعة عطوني الرأي علمٍ وثيق

كان في الناس مثلي واحدٍ مايلام

الشكاوي على الله كلما حل ضيق

يفرج الهم والضيقة ويجلى الغمام

من ينزّل مقامه، عند من لا يليق

ينتقص منه قدره عند ناسٍ غشام

شور ياللي على باقي حياتك شفيق

لاتنزّل مقامك وأنت عالي المقام

عاشراللي ثبت أصله،بجذرٍ عريق

واللي جذره بسطح الماء فعرفه عدام

خل عنك المشاعر والفؤاد الرقيق

لايغرّك بلحن القول وعذب الكلام

يبتسم لك بوجهٍ في بشاشة صديق

وفي عيونه إلا لدّت،حراب وسهام

بك يرحب وهو من شوفتك مستضيق

ودّه إنه يدّس السمّ لك في الطعام

يبرق بوجنته، سيف الخيانة بريق

وريحة الغدر! تظهرلو تلثّم لثام

ماحدٍ ايتقيّد عقب ما،، هو طليق

وماحدٍ غازيٍ غزوة، بليّا مرام

لازم إنه مفكرّ له،، بفكرٍ عميق

ودارسٍ العواقب بالوفاء، والتمام