اخترنا لكم شعر نبطي وفصيح

أفعل الفعل المجمّل ولا تبحث جزاه
‏ المقام اللي يجمّلك ما يبغى شُكـر

.....

‏بعض البشر لـــو يطلب الروح تفداه ‍
نرخص غـلانا في غلا شخص نغليه

لان الوفـاء والطيب والصـدق مبـداه ‍
وكـل الصفات الطيبة تنوصف فـيـــه

.....

البنت يكمل زينها في حياها
ماهو بلبس الماركه وزود مكياج

في تربيتها ودينها ومستواها
تنحط فوق الرأس وتصير له تاج

.....

‏خلك مع اللي لادرا بضيقتك ضاق
‏وابعد عن اللي لادرا بضيقتك صد

.....

‏اعظم حمول القلب حمل الكلافه
‏يومـك تدوس النـار صـابر و حافي

‏وأكبر هموم القلب هم الحسافه
‏لاصرت مع كل البشر حيل صافي

.....

بعض العرب لا ضـاق جوك يسليك
وإن جـيت له زعــلان عـــودت رايق

هذا صحيح اللي عن الناس يغليك
واحد ويكــفي عن جميع الخــلايق

.....

قال لي ودعتك الله قلت روح دربك اخضر
رافقك قلبي وفكري يالغلا قبل السلامه

الفراق اصبح ضروري واللقاء ماهو مقدر
ما نقـول الا وداعاً نلتقــي يوم القيامه

والنصيب الله يعينه كم مفارق به تعذر
بينما وجه النصيب ابيض تعداه الملامه

كلنا نرمي خطايانا على الوقت الموقر
في الكبيره والصغيره تم ظلمه واتهامه

من تأمل في طباع الناس واتمعن وفكر
تتضح له صورة الواقع وتتجــلى امامه

من يضيع من يده فرصه ثمينه ما تكرر
بيجي له يوم يذكرها ويشعر بالندامه

الغلط لو يدمحه من كاهل المخطي مبرر
ما وعد بكر ابن وائل بالفنى عم اليمامه

وفي النهايه ما نفع صيته وسيفه والمشهر
طاح واصبح تحت رحمة سيف خيال النعامه

.....

يقولون مبطي من بغى الدح ماقال احّ
وهذي حكمةٍ ذا الوقت ماهي مرغوبه

علي بالحرام ان العقول تعطس و تكحّ
وعلي بالحرام ان كلمة الحق مضروبه

يدنق حكيم الراي كنه يقطع جح
ويفرض ردي الراي رايه و مطلوبه

ابرجع على شعر الغزل مثل قرطب قح
اسلوبي وكل أنسان يرتاح لاسلوبه

.....

خذلك من الدنيا تجاريب وادروس
ودروبن ترى فيها الردى لا تجيها

واصبر على حظك ولو كان منحوس
وحاجه بيد اللاش لا ترتجيها

خاوي سنافي فيه شيمه وناموس
الخوه اللي تنشرى فا اشتريها

ولا تصحب اللي خوته خوة افلوس
ربع المصالح في الحياه ما نبيها

.....

تبسّم لعنبو من لا مني في ضحكتك ورضاك
‏تبسّم واخذني من عالمي في عالمٍ ثاني
‏
‏تبسّم لي فداك اللي مضى واللي بقى يفداك
‏ترى لولا غلاك وضحكتك ما بعت خلانـي
‏
‏ولا جيت اتدارك ما بقى من فرحتي و ألقاك
‏وابيع العمر كله لا ابتسم ثغرك على شاني

.....