اخترنا لكم شعر نبطي وفصيح

آتتقّى في ذرى امي كلّما خارت قواي
وارجع الطفلة ويرجع كلّ غايب لوطنه

قلت يمّه احضنيني واتركي العالم وراي
واسمحي لي آتذرّى بـ بيت حبّك واسكنه

آتحالى في كنفها الآه واحصّل دواي
من يلوم النفس لا ذاقت من الرفق احسنه؟

كلّ ربته من يديها الحانيه فيها شفاي
كفها الميمون سوّى المستحيله ممكنه

كلّما ظلّم فؤادي اشرقت تضوي سماي
في حياتي نورها البرّاق لا يُغنى عنه

كلّما ضاقت بي الدنيا لها انساقت خُطاي
هي جهاتي الأربعه لا ضاق صدر الأمكنه

وحدها اللي تدري بحالي قبل تنطق شفاي
من عيوني تعرف احوالي لو الغيبه سنه

غالي الأثمان يرخص لجلها بدافع غلاي
عقد الألماس بنحرها كم تشاويت ثمنه

ودّي اني ألحق المعروف واسرف في عطاي
صادق شعوري لها واجب عليّ آبرهنه

راهنه احلامها واغلى ذهبها لمبتغاي
ما بقى الا قلبها لو هو بيدها؟ بترهنه

لجلها يا كم سعيت من الصفر رايح وجاي
واستمدّيت الأمل من كلّ ذكرى محزنه

المدى هذا مداها والمدى ذاته مداي
مَا اختلف درب الأكابر باختلاف الأزمنه

الأمومه غيمةٍ هتّانها بلّل ظماي
جعلني للغالية مدهال بيتٍ تأمنه

.....

يا شبيه النور لا منّه تسلل
‏للمكان اللي تغطيه الستاير

‏أنت رمشك مثل ما يذبح يظلل
‏فيه ميلاف الحنون وفيه ثاير

‏والجديل اللي على الغض يتدلل
‏كان ما له ذنب وشلون يتطاير

‏السماء تمطر والأزهار تْبلل
‏لا ضحك وجهك عقب هل العباير

‏حتى دمعاتك تسلي ما تملل
‏ما تخلي من عطاك القلب حاير

‏أنت ما ينقال لك إلا : تدلل
‏الدلال اللي تغذيه الضماير

‏كل حبٍ ما عدى حبك تحلل
‏ما بقى مكشوف منه ولا سراير

‏يوم أكبر لا أنكشف وجهك وأهلل
‏كنّي المهموم لا جته البشاير

ناصر مناحي

يالغاليه من خطّت يدينه رثاك
ماقال فالفقد اعذب الشعر اكذبه

ياما دعيت الله لا يبيّن غلاك
لين اعتنقت الحزن واصبحت اكتبه

قلت امسح التاريخ لو مرّه نساك
وعقوبتي صارت قصيد وموهبه

اثر الرحيل اللي بلا عوده: هلاك
وشلون لو كنتي لهالدنيا هبه؟

يومك هنا معشوشب العالم معاك
ودونك سنين العمر مرّت مجدبه

اشتقت اردّ الصوت وآلبّي نداك
فقدك يبي لي عمر لجل استوعبه

ياعذبة الأطباع صبري ما خفاك
حتى الحزن عقبك قدرت استعذبه!

و لاني بحثت ف ذكرياتك بانهماك
لقيت لك فوجيه خلّاني شبه

لامن سألني الناس عن دنيًا بلاك
قلت السؤال المُفتقد للاجوبه

وشلون تصفى لي وانا قلبي هناك؟
تحت الثرى شخصٍ مضى العمر ارقبه

دارٍ سكنتيها عمارٍ من شذاك
وأرضٍ دفنتي في ثراها معشبه

.....

احبّك وأجنّب غلطتك رغم تقصيرك
‏عشان العمر في قربك العذب ما ينعاف

‏معي قلب ما يبغي حدٍ يسكنه غيرك
‏على كل نقّاضة جدايل ما هو مضيّاف

‏لا تبدي علي عذرك وتسهبّ بتبريرك
‏انا معك لو صابك بهذا الزمان خْلاف

‏اجيرك وسط قلبي وفي وجهي اجيرك
‏معي جيرةٍ تشهد مواقيفها الاشراف

مبارك بن وافي

معي قلب لا هبّت عليه الهبوب يحنّ
‏ياويل القلوب القاسية من عذاب الله

‏يقولون عيش العمر وأضحك وسوّ وغنّ
‏وأنا أقول كيف أعيش والقدس محتلّه

‏‌
مشاري بن محمد

في عيونك موت عشاق وجفونك ضريح
‏بس فيها مصرع العاشقين أجمل مآل

‏واللثام شلون يستر ضيا الوجه الصبيح
‏دامك ان شلته قمر وان تلثمّته هلال

‏الجمال بلا نظر يفقد المعنى الصحيح
‏والله اعطاني نظر والله اعطاك الجمال

‏انت لوّ مخلوق من قبل يوسف يا مليح
‏سِلمت كفوف النساء وقِطعت كبود الرجال

سعود مهدي

إن كان حبك تقضية وقت ومزوح
‏قلها على المكشوف واطلق سراحي

عبدالله بن زويبن

كل مانسنس من الشرق صوتك ياجفول
ترتعش في الصدر غيمه وتضحك سنبله

ويعترك حق التراجع معَ حق الوصول
آه من حق أرجعه وآه من حلم أوصله

سعد علوش

آه من وجهٍ تجهّامه مسرّه
‏وضحكةٍ ما ودّك إلّا تلتهمها

‏مرّةٍ تتهمه ظنوني ومرّه
‏أنقلب على ظنوني وأتّهمها

مشاعل عبدالعزيز

قربي لي لين احس انك بروحي
‏لا تخافين الدجى والقرب نور

‏إلمسيني يوقف النزف بجروحي
‏كلّ جرح بلمسة ايدينك طهور

‏يا عظيمه زاد بوجودك طموحي
‏إن وصلت الغيم قلت القاع بور

‏لا تظنّين الطمع يسرق وضوحي
‏فيك حرصي ما سرق غير الغرور

‏يا ديار القلب ليه اعلن نزوحي
‏وانتي اهل الروح واوطان الشعور

فيصل القاضي