اخترنا لكم شعر نبطي وفصيح

ترا الشده أول مرحله لـ إنتشال اللّين
‏على الهون لا تشكين يا نفس لا ضقتي

‏ظروف الليال تحطني بين زين وشين
‏لكن الفراق اللي خذا عقلي ووقتي

‏يا وجه الغلا مهما غيابك يطول سنين
‏تراني على حطة يدك كانك أشتقتي

‏رحلتي وخليتي لقلبي غلا بيتين
‏تعلّقت فيها يوم فيها تعلّقتي

ناصر بن مفلح

شعوري يوم أحس إن النصيب أقوى من الاهداف
‏شعور اللي تصيبه فالضلوع رْصاصة المحتلّ

.....

كنت ابيك تكون شي وصرت شيٍ ثاني
‏والخطا ماهو خطاك انا الخطا بعيونه

‏يوم اهيم بصوتك الفيروزي الرحباني
‏وآتخيل كل كلمة من فمك موزونه

‏خاب ظني ليت ظني فيك ماخلاني
‏ابني احلامي على حاجه ماهي مضمونه

‏وليت ماجاني من احساس الندم ماجاني
‏شيٍ يحطم صميم القلب قبل ركونه

‏الجفا اللي عقب لذة وصلك الإنساني
‏والسلام البارد اللي عقب طول المونه

‏اعتذر لك عن خطاب اسلوبي الوجداني
‏الآدمي مهما حصل يبقى رهين ظنونه

مزيد الوسمي

رهن للمتعبين من الحنين غوايته وخطاه
‏وصار اول مطاف لشرهة احساسه وغاوينه

‏يهيجن كل ما عنّا شعوره طرقه ومعناه
‏ما دام الشعر يجري في دماه وفي شرايينه

‏هو اكثر من يقول بخير واكثر من يحسّ بـآه
‏يبيّن ثلث من صدق الوجع ويدسّ ثلثينه

‏حياته غربته حزنه شعوره موطنه منفاه
‏دروبه سجته حلمه صدى صوته عناوينه

‏وهو يا هند يوم انّه يغنّي لك على ليلاه
‏تبنّي غربته يا هند وإلاّ لا تحبينه

نايف عبدالرحمن

مكبوت وشْعوري من الصبح مكبوت
‏والليلة من الخوف ليلة اخيره

‏مطر وليل ٍ أدلم وْوحشه وْنوت
‏واطراف ترجف برد واطراف غِيره

‏وانا احترق ماهو من الضوّ والكوت
‏قلبي يساومني على اخر ذخيره

‏الله يجعلني من جْروحه آموت
‏ولا آتعافى منْه وآحبّ غيره

نوف العثمان

‏تمثنَى روْض صدري واسترحْ يالخاطِر المرَّار
‏عسى ما يَجذب السُّود الوساع إلَّا مغاتيْري

‏أشدَّ الرِّيح لـْ غصون القصيْد وتستلذّ الدار
‏وأقدِّم لك عباير خاطري.. وأغلى معاذِيْري

‏معي مِنْ وِين ما هبَّت ظنونك فالحياة أسرَار
‏أشوفك بعد زلَّات السنين، وقبل تقصيْري

‏تبَعتِك وأنت تَقدِيْر المصيْر، وَسطوة الأقدار
‏مقادِيري كثيرة وأنت واحد من مقاديْرِي

‏فدى وَجهك مشاريه المدى، والحزن، والأعذار
‏وغصنٍ ميَّله صفق الهبوب، وفزّ له طيري

‏أحبَّك.. وأختلي في جِفْن عينك والحقوق كْثار
‏معاك أعذب مسافات الهوَى وأحلى مشاوِيْري

‏يا مِلْح الوَقت قلبي ما عليه من السكوت أسوار
‏لا زلت أشوفك فسانح هواي، وشرِّي، وخيْري

‏أنا بَيْن أتعلَّق في ديَارك.. والهوَى سيَّار
‏وبيْن تمرّ في عيني رضا، وتشدّ تفكيْري

‏أخافك كلّ ما هبَّ الهوَى وارتابَتْ الأشجار
‏مثل ما أخاف لا طال الوداع ألقاك مع غيْري

محمد السلطان

قلبي اللي مابعد ذاق للراحه طعم
يوم واحد والله اني ماخبره ذاقها

عايشٍ مابين همٍ شديد وبين الم
يالله انك ترحم الحال ياخلاقها

ارحم اللي جسم حاله غدا مثل القلم
تلعب الارياح به لعبها باوراقها

انبرى من مايرى من ظليمه من وهم
من هموم طاقها القلب محدٍ طاقها

لي ثمان سنين او اكثر على ساق وقدم
ترعد المزنه ولا لاح لي براقها

واتجبر واتصبر لاياصبر الندم
ضاقت الدنيا بعيني وضاق خناقها

جادلٍ سبحان ربٍّ خلقها من عدم
مع حلاوتها حلو خلقها واخلاقها

احسب إن القلب يسلم ولكن ماسلم
صابته واستبدلت وصلها بفراقها

محمد أحمد الناصر

لي ثمان سنين او اكثر على ساق وقدم
ترعد المزنه ولا لاح لي براقها

.....

آه من قلبي اللي دايمٍ في ذهول
والله انه ثقيلٍ لين جوه الثقال

ياقطاة العبيه ياهيام الذلول
ياعيون النداوي يارقبة الغزال

نور وجهك على من شاف منك القبول
نور صبحٍ تبسم في رهاد الجبال

كني اقرا على طُرّة جبينك تقول
انا قلبي يحبك ياحبيبـي تعال

المحبه جملها مرسلٍ ومعقول
لنعنبو من يقول ان المحبه خبال

كان قدمي حدٍ فالحب راح مهبول
والله انه خطيرٍ لايجيني هبال

والذي ليلة الاسراء عرج بالرسول
ان حبك لحال وحب غيرك لحال

سعد بن جدلان رحمه الله

ما كل من يضحك سعيدٍ بدنياه
وما كل من يبكي دموعه حزينه

أحدٍ بكى والكل يدري عن بكاه
واحدٍ مع الضحكه تحس بونينه

.....