اخترنا لكم شعر نبطي وفصيح

‏صحيح ما عندي سبب للحزن لكني حزين
‏احس بالضيقه وانا والله ما اعرف اسبابها

‏مدري بدايه ياس ولا شوق ولا قل دين
‏ولا ان نفسي من عيون الناس شيٍ صابها

‏قلبي غدا مدينه اشباح وبقايا راحلين
‏مدينةٍ ما تسمع الا صوت صفق ابوابها

‏اللي خذا منها غرض واللي ترك فيها حنين
‏واللي رمت للريح سبحتها على محرابها

‏يا نفس مدري اسوي بك ولا ادري وش تبين
‏اتعبت عمري فالامور اللي مغير اسعى بها

‏ان جتني الاحلام اقلطها على سمن وسمين
‏وان كأنها ماجات لابوها لابو من جابها

.....

‏كانه سأل قله انا بكل الاحوال
‏طيب عسى ما شافت الهم عينه

‏ولو ما سأل لا تنتظر مني وصال
‏بيعينني ما كان قبلي يعينه

‏من يوم هان الدمع في عين رجال
‏ما عاد للقياء والأحلام زينه

‏ما إخترت نبعد يوم الحق ينقال
‏ما اختار للفرقى دروب ومدينه

قولو له اني ما تكلمت وان طال
‏كل الكلام اللي يعز ويهينه

‏في لحظه ما وافقت حال بحال
‏وكل مشى دربه وقلبه بيدينه

‏لا لا تضيق صدور ولا ينشغل بال
‏راح الزمان ان عاد فيني حنينه

‏ما كان يسوى فراقنا بكل الاحوال
‏لو هو ذبحني دمعه بوسط عينه

.....

‏والله من قلبٍ من الوقت مفجوع
‏والله من نفسٍ تزايد وجعها

‏متغيرٍ حالي من أسبوع لسبوع
‏والناس كني كارهن مجتمعها

‏بلا شعور أجلس مع الناس وأفوع
‏وأكتم جزع نفسٍ تزايد جزعها

‏فقدت لي حرّ على الصيد باتوع
‏والأرض عقبه ضاق بي متسعها

‏ما كني الا اللي على الوجه ملفوع
‏أقدار والأقدار محدن منعها

.....

أون ورياح الليالي توِّني
والبرد في جوفٍ كما الغار خاوي

ما كن لي قلبٍ ولا عقل كني
جذع وقف في وجه الايام ذاوي

وبي عبرةٍ محبوسةٍ تمتحني
في عيني وحلقي وصدري شكاوي

وبي من قديم الوقت جرحٍ مكّني
وبي من جديد أيام وقتي مكاوي

إن قلت زانت خالف الوقت ظني
وإن قلت هانت عاجلتني بلاوي

أجامل أيامي ولا جاملني
هامت بي الدنيا هيام الخلاوي

الوقت جاير والليالي اسهرني
والحزن ما بين الضلوع متلاوي

أون وكلٍ يحسب إني اغني
عليل وكلِ يحسب إني مداوي

.....

الشِّعر الانسان كسر انسان متسوّي
عشان يجبر خواطر ناس مكسوره

راحت ثلاثين يا عمري و انا توّي
طِفل يتلمّس على سطح الورق صوره

أضوا من الشمعدان و شمعهم ضوّي
و اصدق من الشاعِر المتواضع غروره

شوفي وانا ما كتبت احلاك متبوّي
عَرش اعذبه وانتي بشاعِرك مغروره

......

إن كان ما قدّرت لحية بناخيك
ما أنته محشّم وجه غيره بلا شك

خلاص ماأنته حول هاذي ولا ذيك
يا صاحبي لا عاد يكثر نقاشك

كبّر فراشك و أنسدح لين يأتيك
الموت و أنته منسدح في فراشك

خل الغنايم من نصيب الصعاليك
قوماً تطل بربع نظره معاشك

.....

حتى الورود تغار من وجه شادن
في كل حال أجمل من البدر واغلا

أموره أغلى من نفيس المعادن
أحلى من التفكير في كلمة احلا

.....

لو إن السعاده والآماني تجي بفلوس
لكانت بسيطه كل واحد يدبرها

على الهون يادنيا تدوس إبن آدم دوس
لو إنه يعرف أسرارها ما يعمرها

لكنّ السعيد اللي عطته الحياة دروس
أخذ ما يكفي حاجته ثم يهجرها

.....

اللي نشوفه في نفوس الأكثرين
يدمي العيون ولا يبشر بالسعد

مثل المحبه في قلوب الضرَتين
حقد وحسد لا بارك الله بالحسد

أشوف هاذا في كثير المسلمين
رغم إنهم بأعز حال وفي رغد

والله ماهي من صفات الغانمين
والحقد ما يترك لخلق الله سند

.....

ابوي وصّاني قبل تثبت أخطاي
من عرض ما وصّاني الله يثيبه

علمني إن اصل السعاده بدنياي
لا صار نفسك من صلاتك قريبه

وأهتم في ربعي ولا أكثّر أعداي
ربعي حزامي بالليالي الصعيبه

إن كان مدة كأسة الطيب يمناي
لا تنتظر لا عوّدت ويش تجيبه

.....