اخترنا لكم شعر نبطي وفصيح

يا ناس خلّوني معه وإتركوني
محدٍ معوّضني غيابه إلا غاب

أغليه بس شلون لا تسألوني
الحب من ربي يجي ماله أسباب

شوفوه بعيوني قبل تعذلوني
شوفوا حبيبي ماهو بمثل الاحباب

ترضون ولا كيفكم تزعلوني
أنا حبيبي سيد تلعات الارقاب

مافيه مثله بالبشر صدقوني
مزيون متواضع وطيب وجذّاب

واذا مدحته قال لا تمدحوني
ماني من اللي يستحقون الاعجاب

يقول بس الزين فيني عيوني
وأقول أنا ذا بلا بوك ياعقاب

خالد المريخي

يا طبيب القلوب ان كان تعرف مرضهن
هن يداون جروح الوقت او ما يداون

الغريبه جروحي ما يدانن بعضهن
بس من طول مدتهن في قلبي تخاون

حسبي الله على الي وسط قلبي فرضهن
لين خلى اليالي في عيوني تساون

كل ما اونستهن قمت اشتكي واعرضهن
مير ذا الوقت في الشدات ما احد يعاون

.....

الحياة أحلامها تذهب أدراج الرياح
توهمك بأشيا تكوّن على البال وتبيح

أعذريني يوم أقابل طعونك بإرتياح
كيف لا والجرح مملوح والجارح مليح

أعذب من النسمه اللي يمر بها الصباح
لا أستقرت في فوادٍ من الفرقى جريح

.....

صدق الحياة تعلم اللي ما نفع فيه الكلام
وحتى القلوب الميته تبكي بوسط الزعزعه

مني سلام من أول القاعه إلى اخرها سلام
اللي يبي درس ببلاش يثمن اللي يسمعه

النور خدعه فيزياء واليوم كذبها الظلام
وما بقى من ظلم خلق الله ولا ضوء شمعه

الضيق ضيق القبر لا بالله بصدور الأنام
بالعكس يا بعض القبور انها لميتها سعه

.....

يا ليتها بين تشريقة وتغريبة
لا ضاعت المفردات البكر والثيّب

يا قلبي اللّي تمدّ النُبل والطيبة
ما ضيّع الطيّب الاّ قلبه الطيّب

.....

سقى الله يوم انا البس بشت ابوي وثوبه القيطان
واقلد كل شي ٍ فيه حكيه جده مزاحه

اشيل المسبحه مثله لياهوجس وهو سرحان
بيشعر واحسب ان اللي عطاه الشعر مسباحه

سقى الله بيتنا ذاك البسيط مشقق الجدران
شجاع ٍ يهزم الغدرا بقنديله ومصباحه

تكحلنا القناعه لا طمع لا هم لا حرمان
واذا جى الليل تكفينا ثلاث اخوان طراحه

.....

للترف خيل ٍ غدا مركاضها صدري
وطيور شوقي غدا مقيالها عيونه

لبا جفونه ولبا طبعها الخدري
ولبا سوادٍ رقد في خدري جفونه

اثره بضحكة سنونه حافر ٍ قبري
ولا كنت اظني باموت بضحكة سنونه

شرهة متونه على شلالها الخمري
وان نثرته الهبوب مردّه متونه

جيت اجبر الكسر لكنه كسر جبري
مجنون والحظ ساقه يم مجنونه

يتفنن بلوعتي واتفنن بصبري
حتى غدت لوعتي من اجمل فنونه

لا رحم ابوالحظ ساق الهجر من بدري
وشيّد جسور الجفا من دوني ودونه

واقفيت لاني ضرير ولاني ببصري
اليا منعني الحيا ساقتني المونه

وجهمت اسوق الخطا في الدرب واهذري
تكفون ياللي خذوا خلّي تردونه

ابطى وخلّى سؤال ٍ يلهث بفكري
مادري يصون الغلا مادري هو يخونه

ويوم اني اسجّ بين ادري وما ادري
عقب البطا جاء يقول الدار وشلونه

قلت انت دارك هنا واْشِر على صدري
قال انت دارك هنا واَشّر على عيونه

محمد الدحيمي