فوق هام السحب ( الشعر الشعبي) على متن القوافي

‏فقدنا وجيهٍ بالثرى جعلها الفردوس
معاها طراة العمر شدت ركايبها

فقدنا زحازيحٍ تدوس النوايب دوس
تشين المجالس لأنفقد صوت شايبها

متعب البيد

‏لقيت فالتسبيح ساعه من الليل
مع ركعتين اعلاج همي وخوفي

شفي من الدله ثلاثة فناجيل
وشفي من الدنيا صلاتي وشوفي

فلابد من فرقا الاهل والمداهيل
وفرقا جماهيري وفرقا صفوفي
'

زامل السبيعي

‏الفجر يسأل عن صفوف المصلّين
يامقاطعين الفجر ليش القطاعه

إلى متىَ ياغافي القلب والعين
ماكنّ عندك للصلاه استطاعه

لو قيل لك موتك بعد يوم يومين
ماظنّي بتغفي ولو ربع ساعه

بتصلّي يامسلم أو بتنتظر لين
تموت وتصّلي عليك الجماعه


ابو فهد

‏لابد ماتصفي عدود المشاريب
ويبين من عقب السواد البياضي

الرجل يركض مثل مايركض الذيب
ويصير عنده للحياه آنتهاضي

و لا ينسدح مثل البنات الرعابيب
ويربض سوات الي تحب الرباضي


محمد بن هضيب

‏لاقست سود الليالي على مستور حال
ينعزل بهموم وقته عن الخلق اجمعين

العرب ماعاد فيهم على الصبر احتمال
والليالي ماتقدّر ظروف الطيبين

....

انا ويش بـ ابدي من ضميري وويش اكن
ولي وجهٍ ابيض واحد ونيةٍ وحده

اغيب ولا ادري وين اسج وادوي كن
بي علة فـ الصدر ماهي بـ منجحده

انا في رجا من قال للشي بإسمه كن
من الانعزال وتكة الصدر والوحده

....

يامساء الشعر في حضرت جنابك
لاكتبته واعجبك حـبكه وسبكه

يامساء الـشـوق دام الشوق جابك
في خـفوق اللي لاشافك جته ربكه

....

تمهـل تمهـل ياحبيبي شـوي شـوي
على ويش مستعجل كذا هدئ السرعه

تراني من البارح لامـيت ولا انا حـــي
مابين الحياه والموت حـــالي كذا وضعه

ومن قال لي وش بك اقل له ولا بي شـي
أحـــاول أكابر مــير تفضـحــنـي الدمـعه


....

أضحك وأسـولف وآتواصل مع الناس
والناس ما تـدري عـن اللي بـ صـــدري

وأخفـي حزن قلبي ولا أبيّن إحسـاس
خـايف عـيون الناس بـ الضيــق تـدري

بغيت افض الصمت هوجاس هوجاس
وقلـت ياصــدري على البـوح بـدري

ذاب الكـلام اللـي في الصـــدر والراس
مـدري وش اللـي غــيّـر الوضــع مدري

....

لاينشغل بالك ولا تكون حـساس
هاذي حياتك ما لـ احد خص فيها

عشها على كيفك ولا تجعل الناس
تجبرك تفعل حـاجت (ن) ما تبيها

....