فوق هام السحب ( الشعر الشعبي) على متن القوافي

كان يفخر فيك صبحك ويختال النهار
كنك أنت اللي لكل العباد تنوَّره

وغبت ووجيه الصباحات غاشيها سمار
مابقى صبحٍ يجيبك عشان أدوَّره

....

‏تعالي يا أوّل إحساس القصيد وباله التوّاق
‏معك ماجفّ حِزني لو تبلّل ضحكتك صمتي

‏تفزّ لْك الديار ويستفزّك للصباح إشراق
‏يداعبك النسِيم وذعذعاته وين ماكنتي

‏وتهادي كل ماضجّ السحاب وشدّ لك برّاق
‏على قلب بدويٍ مايعرْف إلّا الشعر وأنتي

....

انت وجهك زين ولا انا ماشفت زين
انا فكري من تأملت في وجهك دشر

كن ربي خالقك من فلك ماهوب طين
الجمال الي اشوفه ماشفته في بشر

فيك من نجم الثريا ونجم الفرقدين
وفيك من نور اول الصبح لامنه انتشر

لو يناظر فيك عالم فلك خبرة سنين
اعلن ان الارض فيها بدر خمسه عشر

....

‏يفرح اليا جوه النشاما مسايير
‏وكفه كريم ولا حسب وش وراها

‏في مجلسه تلقى الدلال المباهير
‏ونفسه خفيفه والمراجل رقاها

....

‏صلو مدام العهد بالله الصلاه
‏يامسلمين الي تركها قد كفر

‏لايغركم ماتملكونه بالحياه
‏ترا الحياه بكبرها سكه سفر

الحمدان

بالله لاترقص على جرح مغليك
الجرح نازف والمواجع دفينه

رغم الالم والبعد ماهو بناسيك
وأنته أمل عمره من أول سنينه

ولا تحسب انه في بعاده مجافيك
لا والله إِلَّا زايدٍ لك حنينه

والله ولا فكّر بلحظه يخليك
لكن على فرقاك ربّه يعينه

في كل يوم احساس قلبه يناديك
انصت توالي الليل تسمع ونينه

وان كان ودك تعرف احوال غاليك
اقرأ بقلبك ماتخطه يمينه

....

سوا اللي براسك ولا تذكر اسبـاب
لاصرت بايعني توكـل علـى الله

مابيني وبينـك مشاريـه وعتـاب
شف دربك اللي جيـت منـه تدلـه

مـاراح تـغـلـبـنـي لو الحب غلاب
من حـضـرتك عشان قلـبي تذله

في ذمتي لجعلك عبره للاحباب
لين الخليل يتوب عن جرح خله

....

بعض البشر اجمل من الشعر والبوح
واجمل من الوان الرسم والمعاني

بعض البشر ترد في نبضك الروح
من تبتسم لك يبتدى عمر ثاني

....

بعد حبك ماعرفت اعشق بشر
كيف اسوي لجل اغادر من هواك

لاقدرت اهوى ولاقلــبي قدر
ماحدن غيرك وصل لامستواك

ان نويت انسى نزل دمعي مطر
وان نويت البعد قلبي مانساك

وان نويت ارجع لحبك يانظر
احضن اللحضات واتذكر قساك

كنت احبك بس قلبك من حجر
كنت عايش في غرامك للهلاك

بعد هجرك قد تعودت السهر
كل لحضه تغمض اعياني اراك

من الوم الحظ او لوم القدر
او الوم القلب ذي ودف معاك

كلما شفت القمر قلبي ذكر
كل لحضه ذكرتني في حلاك

....

‏تناديني وانا اسمع لك ولكن للفراق عزوم
وصميم القلب من عزّم ترك حُبك وبدّاني

فمان الله يا اخر درب واول صدمة المقسوم
فمان الله يا اكثر من جرح قلبي وعنّاني

على خط الفراق الموعد الليله امر محسوم
توفى مابقى من حُبك الليله وخلّاني

اجامل لوعة الفرقا غصب عني وانا ملزوم
ومن بين الرضى والياس ادور ناتج احزاني

مثل ماقلت من حبك سحابة صيف صعب تدوم
تحقق ماتوقعته لذا صح الله لساني

ثقيله خطوة الفرقا اذا كان الامل معدوم
لكنّ العزه تخفف على نفسي وترعاني

كبير اطيح من عينك ولا اصغر في عيوني يوم
انا ماني على كيفك تدوّرني وتلقاني

عطيتك من رضى قلبي وصدّرته بدون رسوم
وقدّرتك على غيرك وعرفتك على احساني

هقيتك بالهوى ملفى هقيتك ضحكة المهموم
خساره خيبة الهاقي غرامك وين وداني

ادور بعدك المنفى واطيح بغيبتك واقوم
وادور راحتي دونك وابي منك تناساني

تبي تفقد تبي تنسى تبي تشتاق صح النوم
انا مثل العمر لارحت مابعد العمر ثاني

....