فوق هام السحب ( الشعر الشعبي) على متن القوافي

التوجد على الاهل
مناسبتها ان تركي قالها حين حصل وباء مكه ومات فيه جماعته ممن كانوا هنالك


ياسين ما من واحد قال : ياسين
شرارها ياسين قدحه زنادي

شوفي بعيني والخلايق ملبين
مثل الضحايا دنيت للعيادي

الناس زرع وجملة الناس غاوين
إصفر عوده واستعد للعيادي


تركي بن حميد

معركة مع الامام فيصل بن تركي

مناسبتها يتحدث الامير تركي فيها عن شجاعة قومه واستبسالهم في الدفاع عن مواقعهم في نجد
وقال عبدالرحمن الظاهري المؤرخ الكبير انه نظمها سنة 1247هجرية في غزوة الامام فيصل بن تركي آل سعود على الروقة من عتيبة ولم يحضرها تركي حيث كان ساعتها في غزوة على الطرسان من قبيلة حرب .


ذا قيل من غنى ومن هاض ماخفى
بدت لي وغيري جاهلن مادرى لها

إصحى تكن روع إليا شفت حادث
تزري تميز حرمها من حلالها

إليا اوجعك ضرسك خذ القاز واقلعه
وان كان في عينك فـ دور دوا لها

ترى حلاة الرجل لاشق يرفا
دربن يميز فـتلها وانحلالها

عيبن على اللي بدل الهدر بالرغا
ولا كل من يبغي المراجل ينالها

وانا ما بلاي الا سباعن تقانبت
تناطف ملاكمها وجر العوا لها

ومن شب نار الحرب للنار يصطلي
كثر مقابيسه وزاد اشتعالها

كم غارتن منا على فاقة الضحى
يشبك على روس المعادي ظلالها

غزينا على الطرسان من دون صارة
اخذنا مغاتيـــر نذبح عيالها

كم جادلن من غبنا تذهل الغطا
ترفع صليب الصوت تبكي عيالها

وكم مهرتن قبا تجينا قلاعه
رمينا براكبها وفاخت حبالها

اقوله وانا من لابة تنثر الدما
مناة الحرايب دايم في قتالها

ذقنا حلاويها وذقنا مرورها
ولو هي صفت يوم سريع زوالها

ولاتفرحوا ياشامتين من العدا
ان طالت الدنيا يجيكم بدالها

حق علينا الهجن تمشي مسيمه
وخيل اصايل معتبـين الحذا لها

عيناك يانجد المسمى بفعلنا
والا منازلنا فلا احد ينالها

إليا قالوا الحكام رزوا بيارق
ننسف على شيب الغوارب ثقالها

ولا عندنا في حلتن عند حاكم
على الراي حكام طوال حبالها

هذا وصلوا ياحضور على النبي
أزكي قريش وكلمة الحق قالها


تركي بن حميد

يتوجد الامير تركي على فرسة المصابة في ساقها بعد احدى المعارك، وينهيها بتوجيه النصيحة لابنه عبيد ويقول :


من يوم صندوق الحشا بالخفا بان
والعين سهرت بين هم وهوجاس

البارحة جفني عن النوم سهران
كني عليلن مسهره بعض الاضراس

على جوادٍ ضالعٍ غب الاكوان
فيها اختلط حبل الرجا هو والاياس

جندرتها من صوف سلكٍ وريمان
وانا لها عن لذة النوم حرَاس

ماني مجندرها على زود الاثمان
إلا ليومن فيه الارياق يباس

لاجاء نهارن فيه روغات الاذهان
باغي عليها بأول الخيل نوماس

عرجن إليا ما طبَـحن خلف الاظعان
والسوق مابين الاجاويد مقياس

ياعبيد قيَـس ما على الروح ضمَـان
رزقك مع اجلك خـطَ في طلح قرطاس

ماخط لك مافات شوفٍ بالاعيان
وبعض الأوادم مامعه ميز وقياس

لاحاسـدٍ يمنع ولايرزق انسان
إلا بتدبير الصمد والي الناس

ثم أنصح الباقي ترى القصر خربان
ما اعتزَ قصرن مايوثَـق على ساس


تركي بن حميد

ياراكب من فوق حر ذعيري
سبق الظليم اليا تقافى بمرواح

يسرح من الطايف ويمسى البصيري
دار العمور متيهة خلف ولقاح

كعامة العايل بحد الشطيري
بمسلبات مع معاطيب ورماح

سلم على ابن هنود راعي القصيري
قل له قصيرك يا ابيض الوجه هو راح

إما تقاضى فيه ولد الاميري
والا تقاضى فيه ياظبي الابراح


تركي بن حميد

ياراكب اللي مايداني الصفيري
هميلعن من نقوة الهجن سرساح

أمه نعامه وضربوها بعيري
جا مشبهاني على خف وجناح

عليه خرج من سلوك الحريري
وسفايفه مثل الغرابين طفاح

يسرح من الطايف ويمسي البصيري
والسوق والبصرة دهجهن بمرواح

مزهبك ياراعيه تمر ومضيري
واحذر تشب النار يجفل من الضاح

واليا ورد يشرب ثمانين بيري
غرافهن تسعين ودليهن ماح

رجليه بالحرة وصدره يسيري
ويشرب براسه من على جمة رماح

ياويش هو شي طويل قصيري
يسبق زعاجيل الهوا يوم تنداح


تركي بن حميد


وقد تعجب الشيخ محمد بن هادي بن قرمله ولم يعرف ويستوعب ماقاله الامير تركي ولكنه رد عليه بجدية متحديا :

ياتركي بن حميد وش ذا البعيري
ماتجلبونه كان تبغون الارباح

لاعاد له خف وجناحن يطيري
انا اذكر الله راكبه كيف ما طاح

أنا لقيت الكذب في كل اميري
ويا حلو كذب مروية علط الارماح

كيف النعامه نوخت للبعيري
أقول ذا كذب على الناس فضاح

سرنا لينبوع الصخا مكرم الجار
اللي سعى لرعيته بالصلاحي

نقاض مايفتل حيولن ومكار
يصمت ولو هو يسمع العلم صاحي

جبنا له اللي كنها ظبي الاقفار
مركوب من يروي شباة السلاحي

لافين عنه عند ماقلط النار
ولاني على اللي ينتوي له شحاحي

واقبل لنا بالعلم واقفى الدويدار
وجانا من الفندي جواب قراحي

قالوا جوابن لاحكي به ولا صار
الله يعين اهل العقول الصحاحي

جانا بعذر وقلت انا الرب ستار
رزقي على مذري هبوب الرياحي

الرزق يأتي مثل هتاش الامطار
ما له مصك ولاش دونه سلاحي

إن كان تسمع من هل الكذب والعار
ودَع بنا رازق خفوق الجناحي

وعدنا على هجنن من البعد ضمار
من القفل يشدن النعام المداحي

تودع حصا الرشراش بالدو طيار
الا ونقدع روسهن باللواحي

خذوا عليهن ساعتن وقم مغوار
وعن الوعر عطوا بهن السماحي

كم ليلتن سرنا على هجن ومهار
نطلب من اللي خزنته ما تباحي

حنا كما حر مرابيه الاوعار
يشهر أليا شاف الجفا عنه راحي

وحنا مسقية العدو كاس الامرار
ومعشية بالضيق برق الجناحي

ياما نزلنا منزلن غب الامطار
السبر ينطش والجهامه ضواحي

كم ذود مصلاحن على راعي الاقفار
ناخذ قلايعهن بروس الرماحي

والطرش جاك مشوح عقب ماذار
هج الحلال وغثبروا بالصياحي

وفزوا من المجلس على شبة النار
تناولوا سلم القوايم صحاحي

ولحقوا عيالن ماتمالوا بالاشوار
ضارين في نثر الدما بالرماحي

كم خيَرن في مطرد الخيل قد عار
وبيضه عليه يكثرن الصياحي

ياما حديناهم على الميسم الحار
هدات حرَن تعجب اللي يناحي

وجاني جوادن مارجن زينه وسار
بأيمان ربعن يبعدون المناحي

كان الخطا منكم تقبلنا الاعذار
وان كان منا طالبين السماحي

ما ابيع ديني بالدراهم والافجار
المال يذهب وآخر العمر ماحي


تركي بن حميد

أدى الامير تركي بن حميد العتيبي سنة 1279 هجرية مناسك الحج وهو هنالك بلغه مقتل أخيه الاصغر علوش بن صنهات بن حميد في إحدى المعارك فقال هذه القصيدة في رثائه وكانت بنت علوش تؤدي الحج برفقته ، وتتضح تأثيرات اجواء الحج على اسلوب تركي بالقصيدة التي يغلب عليها النصح والتسليم بالقضاء
وانشد يقول:


ذا قول من هوجس ومن باح ماخفى
من عبرةٍ بالصدر بيَـح كنينها

من عبرةٍ كنَـيتها تفرك الحشا
محال حضرٍ في يدي شاغلينها

تدور الدواير بالليالي وغـرَني
سريعٍ ترددها وصكَـة سنينها

دنياك لو هي ساعفت يوم كدَرت
غيورٍ تحلَ الحيل ومفارقينها

على الرغم ماهي بالتمنَي وبالهوى
جري المغربل والعرب عارفينها

على مسايرها كثيرٍ همومها
وعلى شين جيرتها العرب عاشقينها

عمن شاف في جبر الليالي وكسرها
هي المنجل الخافي جفاها ولينها

مخلوطةٍ عسر الليالي بيسرها
صروف الليالي دقَـقت في طحينها

دنياك لو رادتك يومٍ بطربة
صفق موج بقعا لين تملا جرينها

تجدَد مكاويها على الغيظ والرضا
ولاتعذَرنا ولا عاذرينها

كم خيَرٍ يجلي الصدا عضَـه البلا
تضحك له الدنيا وتخفي رطينها

ياطالب الدنيا فـ هي تستغرَك
كم فرَقت من مرضعٍ عن جنينها

جرَبت من حلو الليالي ومرَها
وازريت اميَـز هزلها من سمينها

أنا حالفٍ لابيعها بيع مرخص
معيفٍ ولو غيري حدٍ راغبينها

مخيفٍ معيفٍ من عناها وهمَـها
كما تركة ايتامٍ حضر مستدينها

حرَج محرَجها وجاها زبونها
على سملها البالي حريصٍ ضمينها

سوى مهرةٍ قبَـا وسيفٍ مجرَب
وشلفا لقوات العدا محتسينها

ومناسفٍ يعدا بها كل ساعة
بأمر الولي يلقونها محترينها

ومن صنع بغدادٍ دلالٍ نظايف
مهاريسها بالليل يسهر دنينها

على جال نارٍ للمسايير دايمه
وثلاث حاجاتٍ لها معتبينها

رسمٍ لعطران الشوارب على القسا
خصَ مروَي حربته من مكينها

واللي جمع مالٍ ولا أدَى نوايبه
لعل ماله غوشةٍ وارثينها

هذاك مثل الديك يذَن ولا سجد
ينفع بها غيره ونفسه يهينها

وبالقلب دقَاقٍ تعومس به الدوا
تاه الطبيب بعلَةٍ ناقلينها

انا هاض مابي تالي الليل بكرة
في ليلة الجمعة تزايد حنينها

تجر صليب الصوت مما جرى لها
تجرَه من الوجلا وفرقا ضمينها

تشبَ السعاير في الضماير وتعتلي
كما هيش قصبا بالضوا مولعينها

تقرَحت عينٍ سفوحٍ تزايدت
كالمزنة الغرَا حقوقٍ غشينها

على اخوي ماشفت الغضب في حجاجه
يقدم لها قدَام يقدم ذهينها

عبدٍ ليا ارسلته عقابٍ ليا شهر
نمرٍ ليا جا الخيل فرَق ضنينها

وش خانة الدنيا ولو به رغبنا
حنَا وناسٍ قدمنا جاربينها

زبنت من يمنع ولا عنه مانع
ربي عن الزلاَت نفسي يعينها

ياغافر الزلاَت تدمح لي الخطا
لابد ملايكة الرضا حافظينها

حاسب محاسبها وعطيت كتابها
بشمالها والا جعل في يمينها

ياقلب هوَد واطرد الهم بالنجم
الافراج من عند الولي مرتجينها

طلبت من يمنع ولا منه مانع
إلاهي وباقي اسبابهم عايفينها

لزمت حبل الوالي الواحد الصمد
ليا خاف رعب القلب وايقن ذهينها

والفتل من قبل الامور الحوادث
ينقض لوالب قالةٍ فاتلينـها

إليا صرَت الاقلام ما فاد من حكي
فاتت على طلاَبـةٍ طالبينهـا

من لايصافي مايصافي صميدع
صبَـار في عسر الليالي ولينها

ومن لايغالي لا خذا بنت طيَـب
يكفيه عن ظيم الليالي جنينها

ومن لايخاشر بالقليل ابن عمه
يجيه من ظيم الليالي سنينها

وصلوا على خير البرايا محمد
وقوموا بتقوى الله وتقويم دينها


تركي بن حميد

عبيد الخيل الفارس الشهير هو ابن الفارس والقائد الامير تركي بن صنهات بن حميد العتيـبي يوصيه بمكارم الاخلاق ومصاحبة الطيب فيقـول الوصية :

يا ماحلا ياعبيد في وقت الاسفار
جذب الفراش وشب ضو المناره

مع دلة تجـذا على واهج النار
ونجر إليا حرك تزايد عبـاره

في ربعتن ماهي بـ تحجب عن الجار
لا من خطو اللاش ما شب ناره

النجر دق وجاوبه كل مرَار
ما لـفَـه الملفوف من دون جاره

وأخير منها ركعتين بالاسحار
لاطاب نوم اللي حياته خساره

تلقاه في يومن يضيعن الافكار
يومن على المخلوق ما اطول نهاره

وقم في قصير البيت حشمة ومقدار
لو جار فأدمح له ولو به خساره

ترى النبي وصى على الجار لو جار
خذ الحذر ياعبيد عقب النذاره

رافق قوي الدين حفاظ الاسرار
ينفعك في يومن يجي به كراره

ترى الهوى والغي هن شر الاشرار
ومن داس عار الناس داسوا لعاره

جنَـب ردي الكار مافيه تعبار
مافيه من فعل المناعير شاره

جنَـب عنه خله لقصاف الاعمار
واحفظ وصاتي يا رفيع المنارة

واسلم ودم بالخير ياطير غيمار
وصلوا على المختار ما غار غارة


تركي بن حميد

من الوصايا والحكم التي قالها الامير تركي لابنه عبيد ونصحه بمرافقة الفارس الشجاع موضحا ان صداقته هي المغنم الحقيقي
حيث قال :


قال الذي بيَن من القلب مكنون
في حنكتن بالصدر ما بان لحذاك

إترك عشيرن عشرته يوم او دون
ثم يبدل بك عشيرن وينساك

إشتف قطامي على السد مأمون
درع القفا ماينهض الراس لحذاك

اللي ليا اوحى فيك ناسن يقولون
حامى على عرضك ويدمح خطاياك

أنا رفيقي لو يجي دونه الدون
ما انساه لو اني على حوض الادراك

يستاهل البيضا والاخيار يوحون
والا الردي خله يباري بيسراك

شم للعلا واترك هوى كل مزيون
لاتعتني بالغيَ يازبن من جاك

ترى الهوى ضرب المعادي بمسنون
ورَد على التالي إليا قام ينخاك

وترى الهوى في يوم طاعن ومطعون
بيوم تغاب الشمس من كل الافلاك

هذا الهوى يعتز ربعه ضحى الكون
فعلن وبه نعمن إليا قيل يقراك

ياعبيد خذ مني من القول مازون
واسلم ودم ما غرد الورق بالراك


تركي بن حميد

القصيدة هذه يبين تركي ابتعاد ابناء عمه آل هندي طلبا للمرعى لحلالهم ويذكر فيها زوجته بنت هندي التي رحلت معهم وذكر الفهيد انها في التغزل بفتاه اخرى من عتيبه رآها عندما كان مدعوا لدى أهلها :


لا والله الا اقفوا وساع النحايا
ماهللوا ولهم على الحزم معلوق

يتلون من تبدي عليه الخفايا
عقله رزين ومغلقن له بصندوق

يبون براق صدوق العشايا
تشبع رعاياهم بعرفج ورقروق

أقفوا بغرو ما يطب القرايا
تجيه حاجاته وهو مايجي السوق

أنا مريض ودوروا لي دوايا
من ما البرد والا ترى النقع مطروق


تركي بن حميد