فوق هام السحب ( الشعر الشعبي) على متن القوافي

‏وجودي على اللي ماتهيأ على مشهاي
‏عليه الحسوف تجر روحي وتوجعها

‏حسبت النصيب مع الليالي يجيب مناي
‏وتردى النصيب وعزة النفس تمنعها

‏جحدت الطعون وصرت صابر على بلواي
‏من الياس حتى النفس عافت مطامعها

‏عليك الخلف ياعالم السر يامشكاي
‏لك إيديننا في حال رجواك نرفعها

....

‏تقولين انت من قدك واناظر قدك المياس
‏واقول اليا تمايل قدك المياس من قدي

‏ابي ليله ماغير انتي وانا والشعر والنسناس
‏بعدها مايهم ان وقفو كل البشر ضدي

‏خالد بن طفلان

العمر يبغى متونٍ ماتدحمها متون
ماهيب تمسي قوية وتصبح ليّنه

ادري إن الناس بتظن حسب اللي يبون
و الردي لاظن فيك الردى مابيّنه

....

يارفيق الذكريات ويا شريك فؤادي
‏كل ظنٍ فيك ظنيته تجي من فوقه

‏يتسلل صوتك من الذاكره وينادي
‏لين يفتق جوفي اللي كنت أخيط فتوقه

‏ايييه يالبيه ياموتي ويا ميلادي
‏جعل حزنٍ مرني ماتونسه وتذوقه

‏ياوقودي وإندفاعي بالحياة وزادي
‏ياحشاشة جوفي وقلبي ودم عروقه

....

يالليل الشتاء لاتكشف الخافي المستور
‏وتنّـجح طرف كبد من الهجر مستقّـيه

‏طواري غرام وفلم ذكرى ودقت زور
‏وروحٍ من صدوف المقادير مشتقيّه

‏مريض الهوى لايمكن يعالجه دكتور
‏ولا ينفعه فحص استشاري ولا رقيّه

‏يسولف وهو لاهوب داله ولا مسرور
‏وتقى رمش عينه دمعة الفقد متقيّه

....

‏اناظر فالسما واقول يارب السما والقاع
‏عسى اللي صار تكفيرة ذنوب وفاتحة توبه

‏غريبه كيف راودك الندم يابنادم الطمّاع
‏يادوب النفس نالت ماتبي والقلب يادوبه

‏صحيح ان الحكي بالفايته مايبري الاوجاع
‏لكن اقل شي يذكّر النسّاي بذنوبه

‏همومي واجد وزلّاتي كثيره وعمري ضاع
‏وصبري لايزال يطارد الآمال باعجوبه

‏تقول ان الوحيد اليا تضايق مالقى فزاع
‏وصدقتك وكثّرت اصدقاي وصاروا عقوبه

‏عزاي اني حفيد اللي عزاويهم على المطلاع
‏معاصير الدول يوم الإمام يجيّش شعوبه

‏ياكم مرّه يضيّعني التواضع لكن الاوضاع
‏ترد الطيّب اللي مستحيل يغيّر اسلوبه

‏واذا طاح المطر والبرق لاح وقرّب المرباع
‏ذكرت اللي تجيني راضيه وتروح مغصوبه

‏سلام الله على وجهٍ عليه الخاطر الملتاع
‏مايبرد لو نسانيس الشمال ملاعبه ثوبه

‏وجودي يوم راحت من يدي وانا طويل ذراع
‏وجود الشايب اللي برّ بعياله و باروا به

بدر بن ذنبوح

‏وين ابلقاك يا شهد الحروف
لين يرضى علي عذب اللما

جيت للشعر واتعبني الوقوف
عند بابه وبي جوع وظما

ماذبح لي مصابيح وطيوف
ولا سقاني الكواكب في السما

ان سألني حبيبي والكفوف
تضرب الغيم والاشعار ما

عن قصيدي تذكرت الظروف
وقلت شعري نسيته انما

ليتني قبل اشوفك ما اشوف
وليت قلبي قبل حبّك عمى

....

متني ماعاد يشيل خلوني ارتاح
‏وقلبي ماعاد يشيل ماشال متني

‏محتاج سجادة ومصحف ومسباح
‏افلها لامن همومي طوتني

....

أحِنُّ لِوَصلِكِ فِي كُلِّ حِيْن
مَتَى يَا بُنَيَّه مَتَى ألْتَقِيْكْ

بِكُلّ اتِّجَاهٍ أرَاكِ كَطَيفٍ
يُلازمُ عَينِي فَأرنُو إليكْ

فَليتَ الطُّيوفَ تَكُونُ حَقَائِق
وَلَيتَ الشُعُورَ يَكُونُ لَدَيكْ

وَيَا لَيتَ لَيلِيَ يَهنَى بِقُربِك
وَتَدنُو بِصَدْرِي عَلَى وَجنَتَيكْ

فَأنسَى هُمُومِي وَيَرتَاحُ بَالِي
وَيَا سَعَدَ قَلبِي بِلَمْسِ يَدَيْكْ


....

‏فَأَنْتِ النَّبضُ فـي قَلبِـي وأَغْلَـى
وَأَنتِ الـحُلْـمُ في طَيِّ الأَمَــــاني

وَأَنْتِ الرُّوحُ في جَسَـدِي وَأَشْهَى
مِن الأَحـلامِ في صَدرِي المُعَـانِي

وأنتِ الخُلدُ في عَدَمِي وبـؤسـي
وأنتِ الطِّيبُ في جُــورِ الـزَّمَـــانِ

....