الالفية للشاعر علي بن محمد القحطاني

أ- ألفـت القوافـي ونظمـت الـحـروف
مـن بعـد ترتيبهـا اطبعـي يـا مطبعـه
ب- بديت القاف وإحنا على بابـه وقـوف
في هوى مدعوجة العيـن ابيهـا تسمعـه
ت-تعلمت الهوى لين سبب لـي ظـروف
والهوى راعيـه يبكـي ويجـري مدمعـه
ث- ثلاثة ايام في بيـت منبـوز العـدوف
ليت من يقضي حياته وهـو عايـش معـه
ج- جد الجد والعين يـا عيسـى تشـوف
ثم جرّد شيلتـه....لا رحـم مـن برقعـه
ح- حَمَار الورد في وجنته عنـد الكشـوف
يا إلـه الكـون مـا اجملـه مـا اروعـه
خ- خدر جسمي وقلت اسعفيني يا هنـوف
لا تروح الروح من مات مـا احـد ينفعـه
د- دار الراي وابدى لي اسباب وظـروف
والعزيز النفس من جاب لـه عـذر اقنعـه
ذ- ذاك الشخص خلا المولع فـي نحـوف
بالهوى والشـوق واللـي دفعنـي يدفعـه
ر- رماني بالهوى قال فرصه مـا تطـوف
خل ذاك الشخص لاجيـت راسـي يقطعـه
ز- زهمته قلت له يا بعـد كـل الخشـوف
حبل حبك لو يطـول الزمـن مـا اضيعـه
س- سيف الحب يقضي على كل السيـوف
ما يبالـي صاحبـه لـو يلاقـي مصرعـه
ش- شعره يوم فله على امتان الصفـوف
ابتلش بـه سيـدي يـوم حـاول يجمعـه
ص- صدره جابني عندما شفـت الكتـوف
قلت قلبـي فـي يـدك لا تحـاول تمزعـه
ض- ضاع الحق بين المضيف والضيـوف
ضاقـت الدنيـا علينـا وارض الله سعـه
ط- طواني طي قرطاس بأطراف الكفـوف
قمت اشوف الواحد اثنين واثنيـن اربعـه
ظ- ظمني بالوفاء يوم لاف القلـب لـوف
صار مـن حظـي وعقـد المحبـه وقعـه
ع- عش عيشه هنيه ترى الدنيـا تحـوف
كم فتى عمره علـى غيـر معنـى ودعـه
غ- غامر في حياتك وعش من غير خوف
والحذر ما يحـول دون القـدر أو يمنعـه
ف- فعايـل للهوى يشتكيهـا كـل جـوف
كم محـب يشتكـي مـن فـراق مروعـه
ق- قبل النفس مـن لـذة الدنيـا تعـوف
دام نفسـك فـي جمـال الحيـاه مولـعـه
ك- كل العمر فرصـه تقضـى يالشفـوف
ما اسرعه يمضي شباب الفتى ما اسرعـه
ل- لو تشرى السعاده.. شروها اهل الالوف
والفقيـر يمـوت ويقولـون الله يقلـعـه
م- من جرب دروب الهوى قلبـه يـروف
يذكر انه فـي زمـان مضـى قـد لوعـه
ن- نورك يا قمر ساطع مـا بـه خسـوف
عقب ما زلت من الشهر عشـره واربعـه
ه- هوانا في البدايه مـع ظبـي الهفـوف
الغـزال اللـي جمـالـه عليـنـا دلـعـه
و- وايام مضت من قبـل عـام او ينـوف
لا طرت لي هزت القلب واخشـى تشلعـه
ي- يقول من بـدا بالقوافـي والحـروف
اكتمـل ترتيبهـا واطبعـي يـا مطبـعـه