الزمن الجميل🌹

الزمن الجميل


على هامش الذكرى بعيدا عن النسيان
سقى الله زمان مرنا وانتهى دوره
يوم أعلى بنايه فالبلد عندنا الخزان
وكثير الضواحي قفر ماهيب معموره
والاحياء هدو والناس ماتقفل البيبان
زمان البساطه يوم الأحوال مستوره
ننام العشاء والفجر الأول لامنه بان
من احد البيوت الديك أخذ طول حنجوره
وبعده على المسجد تقافا خطى الجيران
تشوف الولد والشايب اللي بباكوره
وطلعاتنا ثنتين في غالب الأحيان
نزور الشميسي والحديقه لها زوره
وتلفزوننا عادي وبثه بدون الوان
وحنا معه فالحوش نجلس على نوره
ولا اقابله معجب بلاعب ولا فنان
ولا أحرص على السهره ولا أتابع الكوره
ولا شدني بنت تمثل وراع أحصان
لو الدور فارس قوم والبنت غندوره
أتابع مقدم حلقة العلم والايمان
وعدها مساء الاثنين والنفس مسروره
مازلت اذكر الناي الحزينه مع العنوان
تقول استمع فالصوت واناظر الصوره
ولازلت اذكر الساعه ونظارة الاعيان
وطريقة حراكاته وتسريحة أشعوره
يحلق بنا في عالم الخلق والاكوان
نجوم الفلك والحوت في غبة بحوره
كلامه سكن فالعقل واستوطن الوجدان
وزاد اليقين وشوكة الشك مكسوره
يفسر لنا الدنيا وقدرة عظيم الشأن
تحت منطق الاعجاز كم طاح باسطوره
وجود التواضع فيه مع فطرة الانسان
من العلم يوم اكثر هل الجهل مغروره
لعله على ماقدمه جنة الرضوان
على سكة الرحمه خطاياه مغفوره


شعر/ خالد البقمي