يا باحثٍ عن خُوَّة اللي يخاويك

يا باحثٍ عن خُوَّة اللي يخاويك
ترى الرفاقة طيبها من رِدَاها

أحدٍ حزام لْضِيقتك يِعْتِني فيك
لْيا كِبْرَت القالة يِشَيِّل عنَاها

واحدٍ سِناد لْيا زَبَنْتَه يِذَرِّيك
مثل الجبل نفسه عزيزٍ نِبَاها

لْيا نِصيتَه قال لبيه وأَعْطِيك
يِمْناه تِسْبِق بالكرامة خُطَاها

بواردي في حزة الضيق يَحْمِيك
ما هو بْهَزْلٍ لْيا لِفَتْه وِقَاهَا

هذاك خلِّك به وشدّه بِعَلاوِيك
شروى النِجِم نوره يِزَيِّن سِمَاها

أهل الطيب بالوفا دوم تشريك
وفعلها دوم يسبق نبرة حكاها

وأما الردي يا عل ما الله يِبَلْوِيك
خُوِّته شلفا مِعْطَبٍ لك شَظَاها

وقت الرخا جَنْبِك ولا هو مِخَلِّيك
وإن ثقُل حِمْلِك فزعه ماتراها

مثل السراب اللي من البعد يِغْرِيك
تِطْرِد وراه وظامياتٍ لهَاها

لا جا اللزوم تِصيح له ما يِلَبِّيك
رماد نارٍ باردة في ضَحَاها

هذاك شِطّه لا يِجي في مَحَارِيك
شجرة هَشيمٍ ما تظَلِّل ذَرَاهَا

هذا الصحيح اللي من الراس نَاصِيك
وفرق الردي والطيب واضح نِبَاها

بن شملان الصلاحي الدهمي