فوق هام السحب ( الشعر الشعبي) على متن القوافي

كيف لامر السهر من دونك استعذب نعاسي
‏وأنت تدري مالعيني من بعد عينك مسرّه

‏كل ماطال السكوت بسور صدري طال باسي
‏كني اللي راضي التعذيب من قوّ المضره

‏والله إني ماتحلويت الجفى لو كنت قاسي
‏مير قلبي من كثر حبه عجز منك يتشره

.....

عن ضجيج الناس وأ حداث اللّيال المستمرّه
‏ودّي أبعد عن مدى الأنظار لو إني لحالي

‏ماورى كثر العلوم الدارجه غير التشرّه
‏يوم ترضي لك قريب ويوم يزعل منك غالي

.....

‏ماعليك من البرود وما عليك من المكابر
‏والله انك غاليٍ جدّا وفي قلبي لحالك
‏
‏انت في قلبي مقيم وغيرك من الناس عابر
‏وانت تامر ياحبيبي كل ماعندي حلالك
‏
‏وماعليك من الكلام وما عليك من المخابر
‏قلبي اعلن واعترف بان الغلا وان الولا لك

.....

‏أنت وحدك تستفزّ الصمّت وتردّ الطواري
‏ماقدرت ألدّ لك تقدير وإلا أصدّ شيمة

‏ماعليّ من الجفاف إن طالت ايدينه دياري
‏وين مالدّيت أشوفك نوض بَرق ووبل غيمة

.....

‏خذ ياسحاب الشوق من قلبي الشوق
وارحل جعل مسعاك درب السلامة

صـوب الذي له شآن ومكانته فوق
وسط الضلوع العوج ساكن غرامه

قله قسم قلبي من الشوق محروق
والنار تنهش في الخفوق إلتهامه

والجسم كامل صابه الياس والعوق
والقلب ينزف داخلي من سقامه

.....

للسوالف معك لذه وطربه وانتعاش
‏لو تخربط فالسوالف أَحب السالفه

‏في عيون اللي يحبك فهاوه واندهاش
‏والجوارح في وجودك غدّت متخالفه

‏من غلاك أَشوف ذا الناس في عيني بلاش
‏وكل من جاني يوالف عجزت اوالفه

.....

‏وين أنت ياللي تقدر ترجّع لعمري ساعتين
‏وأعطيك من باقي حياتي ما يسرّك حالها

‏رغم إنهزامي مع دنوّ الليل وابداي الكنين
‏إلّا إنّي أحفظ قيمة العبرة على منزالها

‏ليلٍ سرى في ظلمته وحشه وفي صدري حنين
‏وأحداث حربٍ في معاركها تموت أبطالها

.....

‏على وين رايح عاد عمري معك ماملّ
‏تعوشب معك واخضر عوده على نبته

‏يادربي الوحيد شلون اهدك وانا مادلّ
‏سوى وجهك اللي يهدي الرشد واتبعه

‏على دربك تقل الخطاوي وينبت فُلّ
‏هذا الدرب وهذي زحمة اهله وذا طبعه

‏عليك البشر تفتح شبابيكها وتطلّ
‏من يشوف وجهك شاف روحه على ربعه

.....

‏فمان الله عَسى مايردّك لقلبي وَلَه وشعُور
‏ليا هَبّ الحنين وجيت لك طيف وتغافلتك

‏تجاهلتك وانا ضايق شعور وخاطري مكسور
‏تخيّل قدّ ماني بحاجه وصالك تجاهلتك

.....

‏في سماء حضنك عن الدنيا وما فيها سليت
‏ياعوض ربّي على قلبي وجنّة مشتهاه

‏عوّدت روحي ومن لجّة بحر حزني نجيت
‏جيت لك غارق وجيتيني مثل طوق النجاة

‏لو بذلت الروح لجل أفدى عيونك ماوفيت
‏ ماعطيتيني حنان أنت ِ عطيتيني حياة

.....