فوق هام السحب ( الشعر الشعبي) على متن القوافي

انا اتخذت القرار اللي يناسبني
وعن معظم الناس قمت اغيّر الوجهه

من يبدي الوصل لايمكن يعاتبني
ومن يقطع الوصل خليته على وجهه

.....

لاتخدعك دمعة ولا يخدعك بوح
بعض الغلآ أحيان ماله معاني

كم واحدٍ كنت أحسبه حسبة الـروح
صدّت به سنين الحيـاة ونساني

.....

‏سولف مع العالم مثل ما يحبون
واترك لهم على الهوامش مساحة

اثنين في هذا الزمن ما يعيشون
راعي الضمير ومن يقول الصراحة

.....

احلا مساء انك معي وين ماكنت
يسعد مساك يوم مسى بك الورد

واحلا مساء اني بمساك تكونت
منك مساء النور تدفي عن البرد

.....

ماسلمنا من سكـاكين القرايب
ولا سلمنا من اقـاويل الصداقه

ابشع الصدات صدات الحبايب
واشنع الطعنات طعنات الرفاقه

.....

أقبلـي يـا طب قلبـي وإرتياعـي
أقبلي عقب المسافات الطويله

واحفظيني يا جميله من ضياعي
الضياع اللـي مـاخـلا لي وسيلـه

مرحبابـك من ذراعي لا ذراعـي
جابك الله علم وأنتي حلم ليله

يا ثمر قلبي وشوقي وإندفاعـي
يا غناتي فالسنين المستحيلـه

.....

ماهو طمع لامن بغيت احتويك
ومالي هدف لكنه الشوق قاسي

تبي تعرف غايتي ليه ‎احتريك
أنت خذيت القلب وأفكار راسي

.....

قالت علامك قلت مدري علامي
بس المصيبه كن في خاطري شي

قالت تفضل بدي اسمع كلامك
قلت الصراحه فيك ميت وانا حي

.....

خذني بلهفة شوق وشعور واحساس
‏لين اتعدا بالشعور الغمامه
‏
‏واهتم فيني قبل تهتم فالنـااس
‏اهم حاجه فالحبيب اهتمامه

.....

خل البشر تذكرك بالخير والطيب
السمعه الزينه رصيد وغنيمه

ان جيت تلقى المسهلا والتراحيب
وان غبت تمدحك النفوس الكريمه

محبة العالم من اغلى المكاتيب
بعيونهم بتشوف معنى الحشيمه

.....