فوق هام السحب ( الشعر الشعبي) على متن القوافي

تدري اني شخص ماني سريع اعجاب
‏ولا كل حاجه عابره تكسب اعجابي

‏غلبت الهوى فتره لكن الهوى غلاب
‏تمادى ووقف في طريقي وانا مابي

‏دخلت ف حياتي عرض من اوسع الابواب
‏وانا للحبايب ماني مشرع ابوابي

‏وعطاك الله من الود والحب والاعجاب
‏مايجعلك دايم نبض قلبي واحبابي

.....

انتي شموخك عظيم ويجذب الاهتمام
وانا ماقلّط عليك الفكره البايته

جيتك مجيَّ الكرام اللي تحب الكرام
واخترت دربٍ توقف عندك نهايته

أن كان جيتي مجيَّك فوق صدري وسام
وان كان رحتي فمان الله ورعايته

.....

حنا الوفيّ من صافـي الود نسقيه
ومـن زادنـا باالطيب حنـا نـزيده

واللي طـرانا ساعة الضيق نطـريه
ونكون عـونـه بالظروف الشديده

نغليـه واللـه راعي الجـود نغليـه
ونصـون قــدره لـو ديـاره بعيــده

.....

أغرد ويبقى الشعر في حقك شوي
أبني حروف الوصف وتطـيح دونـك

يا جعـلني فـدوة عيـونـك وأنا حي
وإن غبت جعل الكون يفدا عيـونك

.....

كلنـــا فالزمن على مفــارق طرق
‏وكل واحد عليه من الشقاء ماعليه

‏وكل واحـــد يخــايل بــارقه لا برق
‏في حيــاته لزوم او حــاجة ٍتحتريه

‏بالشغف يسرق الايـــام لو ما سرق
‏والزمن يسرق اللي ماسكه في يديه

.....

أحرص على درب النقا والطهارة
‏فـا الآخــرة لا مـال ينفع ولا جاه

‏ودايـم تذكـر في حيـاتك عبـارة
‏الآدمـي مكتـوب له كـل ماجـاه

.....

الـحر حـر ولـه مـواقـــف وينـــهـاب
‏والـلاش لاش ولا حســبـنا حســـابـه

‏ماكل صاحب ندرجه ضمن الاصحاب
‏ما نـدرج الحـصنـــي بصـف الذيابـه

.....

شد عزمك كل مااشتد وقتك شد شد
الشدايد مالها الا اولي الباس الشديد

في دروب العز ناضل وكافح واجتهد
مــــــا ينال العز غير المكافح والعنيد

.....

‏ليت الذي جالي من الشوق جالك
وتحــس مافيني وتقـــــرا شعوري

كانك معـــي مايـوم تبقى لحالك
ولا تخلينـي وتجهـــــل حضوري

حرام تحـــــرم من ترجــا وصالك
وحرام تبعـــد من حياتي سروري

صعبه عليا مــوت اجهل خيالك
يعنى وجودك في حياتي ضروري

.....

اثر الجمايل في بطون المجانين
اخير منها في بطون الصحاحي

على الاقل الى انكروا فعلك الزين
لك حق ما تشره على غير صاحي

.....