فوق هام السحب ( الشعر الشعبي) على متن القوافي

نسدد فواتير الوفاء من غلا واحساس
راع الطيب مانجحد جميله ومعروفه

ابن عم والا من بعيد العرب والناس
رجالٍ ماتلحق طيبها من وحسوفه

يقولون بالامثال عرق النسب دساس
وانا شوف عيني مثل ماغيري يشوفه

وعروق النداء تنداء لو اوراقها يباس
على مختلف دورات الايام وظروفه

.....

والله اني الوقت ذا ملتزم في حاجتين
حاجتـــةٍ من وراهـــا لقيـــت المنفعه

السكوت اللي يوافق مع العقل الرزين
وابتعـــادي عن مناقش سفيه و امْعه

والتّجاهـل خبرةً تكتسب عبر السنين
والتســـامح عملـةً ما تحـــب الاقنعه

.....

في ذا الزمن كلن يحب البداوه
حب البداوه صار في الناس عدوا

اللي معه مال ولو كان جاوه
شرا له ابل من الحراج و تبدوا

.....

كانك خوي الغني اللي محد حوله
حنا مانطمع بخـوة من كثـر ماله

نخاوي الطيّب اللي طابت افعـوله
حتى لوانه فقيرن حالته حاله

.....

ليا بدا النقص في حالي وفي مالي
على كثيـر العـرب مانـي بمتجـري

اترك ملايين وانصـى واحـدٍ غالـي
اما قضى لازمـي ولا خفـظ سـري

سفر الدغيلبي

اليا أبليت بكملتن مالها علاج
عوجا وجاتك من عوج صد منها

دور لها يامحكم الشور مخراج
ولا تنشد اللي جابها عن ثمنها

مانته مكلف بين ناقل وهراج
أرفع مقامك يابيض الوجه عنها

.....

الصمت مكسب ليامن طاح سعر الكلام
قفل خزاين كلامك والمقام إحفظه

ماهو ضروري تزاحم عاشقين الزحام
للبيعة البايرة لا تفتح المحفظة

على المناكف وترديد الهروج السلام
لابد سقف الطموح المرتفع تخفضه

ماهي جميع السوالف تلفت الاهتمام
عليك تسجيل يرصد كل ما تلفظه

.....

بغينا العرب ترضا لكن العرب مرضا
تخلي الصغآر كبار وتدور الزله

وانا مالي ومال العرب تزعل وترضا
انا يالله بعمري وش ابغي بخلق الله

.....

صح الكرم يستر كبار العذاريب
والاّ الشجاعه تكفي الوضع كلّه

ومن لارقا في عاليات المراقيب
لا ينتقد خلقه على كل زلّه

الزين مافاد البنات الرعابيب
لاصار معتوهه وفي العقل خلّه

وقت ٍتعّوذ منه حتى اشهب الذيب
تغيّرت حتى النجوم المطلّه

.....

الرجل مايملى يده قول ياليت
ومايدرك الغايات لو ماطردها

غايتك لو هي في قلوب العفاريت
انزع بيدك قلوبها من جسدها

.....