فوق هام السحب ( الشعر الشعبي) على متن القوافي

كل القصيد اللي على حسنك قليل
عمدًا بعد سلهامة عيونك سقط

اذا كتبته في سنا ضوحك جزيل
لو أترك حروفه حروف بلا نقط

هذا فقط من باب مردود الجميل
اللي يجي من عينك النجلا فقط

.....

غيرك تطمن بالحشا مابعد داج
وضعي و وضعك للبشر ما شرحته

للقلب باب ودون الأضلاع مزلاج
عن حب غيرك قافلة مافتحته

.....

الا ياغزالٍ في عيونك سهوم الموت
وفي مبسمك جنه وفي شوفتك راحة

تغار البني من طلتك والقمر والتوت
يا مياسة الحسن الطبيعي ومصباحه

.....

مايلوي ذراع الصبر غير الاقدار
أو دعوةٍ نامت بمتن السحابه

شيٍ نبيه ويمشي العمر ماصار
وشيٍ يصير و ما حسبنا حسابه

.....

اناشــــــدك بالله يا شـــــوق باللهون
قلبي فقـد يا شـــوق كامـــل عزومه

على الحبيب اللي في الروح مدفون
الغايـــب اللي في خـيالــــي رسـومه

ياشـوق خـذنــي وين ماكان ويكون
ودي ازور الـزين واعـــــرف عـلــومه

حـتـى ولو قالـــوا لي الناس مجنون
انا اعـرف المجـــنـــون ماحـد يلومه

.....

تدري وش اللي تعتبرها غريبه
اذا فقدت انسان غالي وهو حي

وتدري وش اللي تعتبرها مصيبه
انـك تـضـحي والـمقابـل ولا شي

.....

فقدتك ما دريت إني بصير الفاقد المفقود
‏اشوف اشباهك توّزع في وجهي وين ما افرّه

.....

لـو هـو على كيفـي عزلتـك عن النـاس
ومـا فيـه عيـن غيـر عينـي تشوفـك

وحطيـت لـك بين الشراييـن مجـلاس
راعـي محـل وقلبـي آغلـى ضيوفـك

.....

ناسٍ تخوفها اقنعه وناسٍ يخوفها الوضوّح
وناسٍ على وضح النقى تبني شجاعتها صروح

.....

هزتني الذكرى وانا بين الاجواد
ساعة عرفت اللي لفاني ولدها

طمنت احبه والغلا فيني يزداد
شميت ريحه حبها في سندها

ضميته بصدري على جروح جداد
من غير ما اشعر احسب اني بيدها

رديت للماضي وهو بين الاياد
نفسي من الموقف اكابد جهدها

سألته ودمع الوله فاض وقاد
أسمك وشنهو رد لي من بعدها

مسمى على اسمي ما نست حب الامجاد
الله حسيب اللي حسدني وحسدها

مرت سنين كلها شوق تنعاد
بعيوني اللي عارفه وش عددها

صدفه وفيها الخير من الف ميعاد
لي ضاق صدري رحت اطالع ولدها

.....