فوق هام السحب ( الشعر الشعبي) على متن القوافي

عادتك ما تترك لغـيرك مجال
‏يختفون الكل اذا نـجمك لمع

‏يضربون بنـورك الطاغي مثال
‏منزلك عالي وشانك مرتفع

......

أحدن على كثر الصبر مالقى شي
واحدن وهو مرتآح زانت اموره

أحدن يموت وموتته توجع الحي
واحدن غيآبه مثل حزة حضوره

......

‏اللي يقــدر قيمتـــك يرفعـــــك فوق
واذا تكــدر خاطـــــرك جاك يرضيك

يسقيك من عذب السواليف والشوق
ومهما حصــل فـي دنيتك ما يخليك

وانا معك يا صاحب الحسن والذوق
لو تطلب انفاسي ترى النفس تفديك

وان حالة الدنيـــا ومـن غير منطوق
ابشــر بعـــزك لو تبي الروح اعطيك

......

جـادلٍ ربي عطاها الـزيـن كلّه
الجمال اللي عليها ما حصرها

كبر عين وحلو ثغر وزين طلّه
وكنّ نور البرق في لبّة نحرها

والشعر قصّه لحاله دون زلّـه
والله إنّ الليل كنّه من شعرها

......

أتمادى في حضورك وأتودَّد
يا بعد من يَنسِج الغيمة قلايد

فيك أمدّ الصوت والليل يْتمدَّد
لين أحبَّ الوجنتيْن أمّ الرغايد

كيف أبى أتخيَّر سناك وليش أحدَّد
والسنين مسيَّرة والعمر بايد

آه يا مِلْح اللّيالي لا تصدَّد
أنت صدَّك ما تخفّفه القصايد

......

ان جيت اصلّحها غشا الجو دخان
وان رحت اخربها لضى النار صالي

اما كسبت من البعيدين عدوان
ولا خسرت من القريبين غالي

......

قنعنا من الحب و قنعنا من الاحباب
و طحنا لنا في واحدٍ ردنا صوبه

غلبني الهوى وأنا ادري إن الهوى غلاب
معَ راعي أسلوب خذا القلب بـ اسلوبه

على بالي إن الوضع كله ما غير إعجاب
لكن يوم أخذت شوي لا الوضع ماهوبه

وأنا ماني بمن يترك الضيف عند الباب
فراش الغلا مفروش والضو مشبوبه

......

‏هنوف اللي تزين ولاتزينها القلايد
القلايد لابغيت الصدق تزها في نحرها

والله ان الشاعر اللي مالي الدنياء قصائد
كنها تربط لسانه مثل ماتربط شعرها

الغزل صار بنظرها عادةٍ ضمن العوايد
نادر اللي لا مدح في زينها يلفت نظرها

......

اشهد ان الله عطا وجهك قبول
كل ما اشوفه اشـوف العافيه

جيتك و صدري من اللهفه يقول
ممتلي شـوق و مشاعر دافيه

انت حتى الشعر في وصفك خجول
و كل كلمه في سمـوك وافيه

نصف ساعه فاهي بوجهك و اقول
اشهد ان وجهك يجيب العافيه

......

يا حروفي وين عذبات القوافي
ودي انظم له قصيده يا حروفي

يا حروفي له بقلبي حب خافي
ودي انظم له غزل و انساه خوفي

يا حروفي ودي اكتبه اعترافي
ان حبي له ملا اركان جوفي

و ان قلبي صادق بحبه و وافي
و اتمنى تعانق كفوفه كفوفي

......