فوق هام السحب ( الشعر الشعبي) على متن القوافي

ابلجٍ بين الـكرامه ودول ام البهار
‏مرحباه تسابق ضيوفه بتسليمها

‏رغم فقره كل ليلٍ يقلط له فقار
‏وفيه هقوات المطاليق تاصل تيمها

‏للظفر فالرجل شاره وفي وجهه شنار
‏قبل ينوي بالعزيمه وفي تقديمها

‏لحيةٍ تكريمها العود الأزرق والوقار
‏ولحيةٍ غير ازرق الموس وش تكريمها

....

‏الصبر زين وتالي الصبر الافراج
وخلك على درب التصبر مبادر

واليا تصافق حلم قلبك بالامواج
الله على تحقيق الاحلام قادر

....

ياجافي الغصن لاتبكي على أوراقه
‏بعد البطى خل دمعك لانزل يرقا

‏خلّك مع اللي يحاول يصنع أشواقه
‏يتصنّع إن الهوى في خافقه يرقا

‏العام علمتك إن ماعاد لي طاقه
‏واليا افترقنا ترى الفرقا هي الفرقى

....

على الطريق اللي نهاياته بدايات انطلاق
‏يبدا الخيال يعيش جوه والقديم يجدده

‏خلوني اخذ راحتي وارتاح من ضيق الخناق
‏محتاج لي سجّه تعيد الراحه المستبعده

....

‏مايموت الشوق واغصانه نديه
ولايموت اسم يھذري به لساني

يشھد الله كل ماتطري عليه
تسرح افكاري وأعيش بجو ثاني

....

الله من ضيقةٍ في الصدر ما تنشكى
إلا على الواحد الحيّ السميع المجيب

أبا تذيكا عليها لو مامن ذكى
لاتنكشف ضِحكة العدا وحزن الصحيب

وإن زادت الضيقه اللي تاليتها البكى
ببكي لحالي قبل لايبكي أقرب قريب

....

يرتاح لك قلبي من بد كل الناس
فيك جذبني الشعور اللي أحبه

صعب أوصف شعوري والاحساس
كيف أوصفه مدري لكنّي أحب

....

‏طويت صفحات الهوى والتلاقي
وقلت اتسّلى واترك الجرح للوقت

والقاك في قلبي ولازلت باقي
قمت اتامل في رسايلك واشتقت

....

‏لاتوصي وأنت ماتحتاج في حبك وصايه
وين أروح ووين أوجه وأنت في كل النواحي

مايفرط فيك غير اللي معه قلة صحايه
مستحيل إنه يفرّط فيك مستبصر وصاحي

....

عن ماعجز فمي بدت فيه عيني
‏يامرحبا فيك وحكى العين مفهوم

‏خليني ازبن حضنك وعانقيني
‏اليا متى وانا زبن كل مضيوم

‏جيتك فرصة عمر جات بيديني
‏ومن لا استغلّ الفرصه يعيش محروم

....