فوق هام السحب ( الشعر الشعبي) على متن القوافي

حنا كذا صافين دايم ووافين
ما عندنا فالناس نية خباثه

الطيب والمعروف والصدق والدين
والجود والاخلاق فينا وراثه

اصحابنا سبعين مدري ثمانين
والصادقين ثنين مدري ثلاثه

....

طيب اذا قلبي انا مو مكفيك
وش ودك اكثر طيب الله فالك

وش ودك اكثر من محب يداريك
قلبٍ سفطته فوق راحت دلالك

قلبٍ وطا جمر البطا لاجل يرضيك
قلبٍ مولع في سواد برا لك

....

‏ماكل من طاب في رأيه بطبعه يطيب
ولا كل من يدّعي حق التساوي سوي

ولا كل من تعتزي به لانخيته يجيب
ياقل من هو لحمل الكايدة يحتوي

من عسرالأيام شاب الرأس قبل المشيب
ومن حر جور الليالي عارضي مشتوي

لقيت لي في غناة النفس وصفة طبيب
ولقيت فالمكتفي بالذات دافع قوي

....

‏لاحـد يكلمني تـــرى خاطـــري شين
ونفسي من الضيقات تعبت وتاهت

واوجـاع فينــي مختبيه وراء العين
من جورها ماعاد لي العيــن نامت

لاوين ياحـــظ الشقاء بــس لاوين
لاوين تاخــذنا قـــد الروس شابت

كل ما أنتظرنا للامــــل بيننا البين
حظـي تعثــــر بـي والآمـال خابت

....

‏ليت الهـوى ياشـوق يسمحلي القاك
وآخفيك من شوف البشر في عروقي

وآروي ضمــاَ قلبـــــي بطلة محياك
واذوب فـي لقياك ياشــــوق شوقي

والله انـــــي كــل لحظــــــه تمناك
والشوق لك فالروح محرق خفوقي

ودايم على بالي وطيفـــك وذكراك
يسـري بدمـــي يا الغــلا في عروقي

....

انـا مـدينه بـاالغلا والـوفا اســـوار
فـيها معـالم قيــمتك مــع غـــلاتك

انت الغـلا والحـب واشـواقي امـطار
وكـل الوصـوف النـادره مـن صـفاتك

وانـت ربـيع القـلب لاعــاد تحـتـار
ولا عـاد يـاروحــي تشـك بـــغلاتك

انت الوحيد اللـي لـه الجـوف مـقدار
وانـت الوحيد اللـي حيــاتي حـياتـك

تـعال بـمزونك عسـى تنـبت ازهـار
وينـبت نـباته مـثل منــبت نبــاتــك

انـت وقـلبك وسـط ذاتـي لكـم كـار
وانـا وقلـبي يـاالغلا وسـط ذاتـــك

زفـيت لـك كـل المشـاعر بالاشـعار
لاعــاد تجــهل عطـرها يـوم جــاتك

....

حيّ العــيون اللي بـكـتني وانا حـيّ
سـبة غيـاب وحين فرحـة حضـوري

ماهي من اللي دربـها الزيـف والـغيّ
ولا هي مـن الـلي للـولايـف غــدوري

اللي بصـدق احسـاس للولـف تـرهيّ
وتفتـح له ابـواب الفَـرَح والسـروري

يا فـرحــة الظـميـان اذا لـقي الـميّ
حي الحضــور اللي يـداهـم غـروري

....

‏مقباس نار الوفاء مضمون من زندي
والا الـفـتن نـارهـا صمـتـي يطفيها

الكلمه اللي في وجهي ردهـا عـنـدي
والكلمه اللي وراي في وجــه راعيها

بقلمي

‏سلام والمنطق من الله وهايب
لاتقوللي والله من الناس عانيت

الناس دايم بين مخطي وصايب
فيهم حكيم الرآي وفيهم عفاريت

خلك على ماقيل فوق السحايب
واترك طمان القاع ياطيب الصيت

عيش الحياه وفالك اليوم طايب
ماينفعك ياصاحبي قول ياليت

....

اتخيّل وجهك الزين وامسّي عليه
كل وجه غير وجهك مايغري ناظري

انت من حبّه خذاني من العالم اليه
وانت من شوفة محياه سلوة خاطري

....