ديوان قصائد لشعراء المملكة العربية السعودية (متجدد)☘️☘️

الـغـادة
( الغاده )


حبيبتي وانتي مواعيد الفرح واعياده
وافراح عمري والهنا في دنيتي واعيادي


يعود عيدك كل عام ويكتمل ميعاده
وانا بقربك ياحياتي يكتمل ميعادي


الزين لو في سيداته وآنساته ساده
انتي بزينك يالغلا متسيده الاسيادي


انتي الحلا والزين كله والغلا والغاده
من المحيط الأطلسي لين المحيط الهادي


يعني لآخر يوم شوقي والجنون زياده
يعني مشاعر ثايره واحساس ماهو عادي


يانبض قلب وروح عشق وحب فوق العاده
ياطيبي ويامسكي وياعنبري والكادي



عبدالله علي الشمراني

أوهـام
بسم الله الرحمن الرحيم

( أوهـام )


أوهام وأشباه حب وبعض اساطير
وأحلام ماتنتهي بيني وبينك


يوم ان شجرة سنيني والاعاصير
قصة صراع ولسان الحال وينك


وانتي وباقة ورودك والعصافير
ألحان تصدح بها شجرة سنينك


وش لون نمت وصحيت وكل شي غير
وانا يديني تعانقها يدينك


ابرجع لطول حزني والمشاوير
واقبل ايديك وآقبل جبينك


الله على شرك ايجازيك بالخير
والله على قلبك القاسي يعينك



عبدالله علي الشمراني

الضمير الحي

بسم الله الرحمن الرحيم

‏(‏ الضمير الحي )


السحاب الي ذخرته من سنين
حــن رعـاده وبـراقـه بــرق


يالضمير الحي بين الميتين
ويالمصير الي تجمع وافترق


في سنا نورك ونيران الحنين
إحترق قلبي وحبري والورق


واليدين الي تعانقها اليدين
كل ما بيدينها قلب إحترق


شفت بعيونك مظاليم وأنين
وأشعلت فيني مواعيد الأرق


شفت فيها كلمتين ودمعتين
وشفت فيها ألف معنى للغرق


شفت فيها موعدين ودبلتين
وشفت فيها عمر كامل ينسرق


لا يعيش الحزن في الطرف الحسين
ولا يضيع العمر من كل الطرق


والضما لا تقطعه من قطرتين
دامك أعذب من سما حلمي وأرق


ودام تدري إن الحقيقة وجنتين
مـسـتـحـيـل إنه يـغـطـيـهـا ورق !



عبدالله علي الشمراني

( هبوط اضطراري )


وين انت ياروح المفارق وانا وين
وين انت ماتطري عليك الطواري


سريت في ليل الهوى والمحبين
وسرى عليّ من الهواجيس ساري


قلت الهمام ومرحبا بالمقفين
هذا المفارق جرّته والمواري


الجود والموجود فرقا وبيتين
وانا كريم ودار الاجواد داري


حسافه ان كان اكثر الناس دارين
وانت بشعوري والشعر منت داري


عندي على حبك شهود وبراهين
من يوم حبيتك وكنت اختياري


شوقي جنوني لهفتي دمعة البين
موتي قبل موتي وطول انتظاري


مشاعري طول السهر والدواوين
ياجنتي بين الخلايق وناري


الي كتمت ايام وشهور وسنين
والي نشرته في خزامى الصحاري


واليوم صرت بعينك الزين والشين
ودك ولا ودك وبايع وشاري


اشلون كنت انسان طيب ومسكين
واليوم صرت من الوحوش الضواري


ما اقدر اكون اثنين وآعيش دورين
واخلي المشروع خيري تجاري


حتى لو الفرقا تعل المداوين
لجل الكرامه لازم آخذ بثاري


يعني غرامك صار ماضي من الحين
يعني هبوطك من سماي اضطراري


مع السلامه وارحلي لا تردّين
انتي مسارك يختلف عن مساري



عبدالله علي الشمراني

( فنجال دله )

فتنتك طايفيه وانا قلبي عراقي
الحذر في عيونه والخطر ما يزله

الخيار الوحيد الصعب كان انسياقي
كني اعيش هم وثورة الشعب كله

كيف ؟ مدري ! شهرت لك الولا واعتناقي
وانت يا للاسف من غير مذهب ومله

ما تصحي برودك ما تشوف احتراقي
آتغلى على وصلك وانا ميت له

آتعنى لشوفك لو على كسر ساقي
وأنت يا دوبها فله وفنجال دله

كيف أبنساك وأخفي لوعتي وإشتياقي
والهوى يفضح الرجال كثره وقله

رح وعود وتلقاني على العهد باقي
كل شي على حطة يدينك محله

بين علم الفراق وبين حلم التلاقي
ادرس الراي في وضعي وحله ومله

فضها سيره أما وصل ولا فراقي
لأن ياصاحبي وصلك وفرقاك عله

انه موضوعنا بفراق رايق وراقي
ولا عطني حقوق الوصل دقه وجله

عبدالله علي الشمراني

أنا والشعر
إسـقينـي الإبـداع وأسـقيـك الإبـداع
كـفّ الـظّـمـا طال الـحياه الـقـصـيـره

ما غـيـر رب البيت مـعـطـي ومـنّـاع
وقـسـمـنـا مـكـتـوب شـره وخـيــــره

بين الحروف أعيش لحظات الإمتاع
ونـشْـوتـي بـالـشّـعْـر والله كـبـيـــــره

مـا آقـول بأسبابه تخطّيت الأوجـاع
ولّا كـشـف عـن واقـعـي كـل حـيـــره

لكن عديل الـروح فـي كـل الأوضـاع
والـخـلّ الأوفـى والأهَـل والـعـشـيـره

يـشيلنـي وهـمـومـي أشكال وأنـواع
وأدوّر أصـحـابـي ولا شـفـت غـيـــره

لا شانت ظْروفي فهو زين الأطـبـاع
وهـو خـويّ الـجـنـب فـي كـل ديــره

هـو النفَس لا صـرت بالحيل ملـتـاع
ونـافـذة هـمّ الـلّـيـالـي الـخـطـيــــره

الكل ضـاع الّا الأمـل فـيـه ماضــاع
واخـتارني من قبل أحـدّد مـصـيــره

والكل بـاع الا ابيض الوجه مـابــاع
فـكـره وقـافـه واللّـحـون الـمـثـيــره

مـاعـاش بالحيله ولا كـان خــداع
يــســيــره الأيـــام ولاّ عــســيـــــره

يـفـداه خـلّان المصالح والأطــمــاع
ويفداه خـلان الـرّخــا والـسـتـيــــره

عبدالله علي الشمراني

بسم الله الرحمن الرحيم

‏(‏ الصراحة )



اطلق سراحك لحظه وفجر الصمت
واما قويت لحبي اطلق سراحه


صارحني وترتاح لامن تكلمت
نصف السعاده يختبي في الصراحه


لو انك لفوادك فطنت وتفهمت
ما كنت تجهل ضيقته وانشراحه


ولو انك لجروحي فطنت وتعلمت
ما كنت تجهل في دواه وجراحه

هواك طير وهام بك كثر ما همت
وأكبر مزايا الحر الأشقر كفاحه


أنساك ! لا والله تجنيت وأجرمت
لو مابقى لي من شقا الوقت راحه


هو خانك التعبير ولا توهمت
ولا تحسب ان المشاعر سياحه !


لا هنت كانك بعتنا يوم ساومت
تبغي تساوم طيرنا في جناحه !


موجود وأشعر فيك من وين يممت
وأشوفك أقرب للمسا من صباحه


صارحني وترتاح لامن تكلمت
نصف السعاده يختبي في الصراحه


اطلق سراحك لحظه وفجر الصمت
واما قويت لحبي اطلق سراحه



عبدالله علي الشمراني

يـا يـتـيـمـه
( يا يتيمه )









يا يتيمه


حتى أنا مثلك يتيم


وغربتي مثلي يتيمه


ليه جددتي جراحاتي القديمه


جدا حروفك أليمه


يا يتيمه







إتفقنا في الحزن والهم ودموع الضحايا


وإختلفنا في ظنونك والنوايا


خاب ظنك يا يتيمه


ليه جددتي جراحاتي القديمه


باقي في الدنيا بقايا







كنت أظن الحزن لي وحدي ولا يعرف سواي


في السفر والحل والغربه معاي


ولا يعرف انسان ثاني


رجعي حزني ودمعي ياتيمه


والدقايق والثواني


ليه جددتي جراحاتي القديمه







أنتي وحروفك ثلاثه


والحزن وأنتي وأنا صرنا ثلاثه


القدر ما هو بيدينا


والحزن صعب إجتثاثه


والدموع أكبر خساره يا يتيمه


ليه جدتتي جراحاتي القديمه


حتى أنا مثلك يتيم


وغربتي مثلي يتيمه


يا يتيمه









عبدالله علي الشمراني

بسم الله الرحمن الرحيم


( وحــيــد الــدرب )


على درب العنا والشوك أدوّر من شقاي ورود
وأدوّر للربيع الي رحل طاري يذكّرني


وأدوّر للظما موعد ويلقاني بدون وعود
ويسقيني عناوين السراب الي تجرّعني


وحيد الدرب لولا بعض همي والليالي السود
وباقة ذكريات من السنين الي تنكّرني


أسابق خطوتي وأزريت أسابق دربي المسدود
تلفـّت وعجزت ألقى الطريق الي يرجّعني


بعيد ومظلم وموحش وفيه من العذاب شهود
بقايا من فراق وغدر يجتاح الصبر مني


وفيه إحساس بالغربه يصورها بدون حدود
يترجمها شعِر ودموع من كبري تخلّصني


وفيه من الندم جلاد وسياط وسجن وقيود
وتأنيب الظمير الي قبل لأخطي يعذبني


وفيه من التناقض موج متلاطم بنقص وزود
ونفس(ن) عزمها لأبعد مراماتي يبلغني


ولو كانت علاقة بعضي وبعضي عرب ويهود
صمود العزم في وجه التردد يعتذر عني


وفيه الخوف ما يصدق معي ما يلتزم بعهود
من أول خابره خاين على موتي يشجعني


وفيه أكتب عن أول وآخرآلامي وأبيح سدود
عن الي قرر فراقي ولا قرر يودعني


عن أحزاني عن أشباه الفرح عن حلمي المنشود
عن أنصاف الوجيه الي تبعثرني وتجمعني


تعبتك حيل يادربي مشيت لبابك الموصود
بديتك وانتهيت من الطريق الي يضيعني


وأنا بين العنا والشوك أدوّر من شقاي ورود
وأدوّر للربيع الي رحل طاري يذكّرني


عبدالله علي الشمراني

بسم الله الرحمن الرحيم

‏(‏ عذرك والخطا )


أحبك وإحتمال الشوق يستعصي على التصوير
وتعجز مفردات الشعر لاتوصف لك إحساسي


يمر البال غيرك وأنت تستحوذ على التفكير
ولا يشرب فناجيل الهوى غيرك من الناسي


خطاك أفرش لها روحي خطاك أفرش له التبرير
على كف الأمل قدمت عذري عنك يالناسي


شهور من العتب تحتار في كلمة صباح الخير
وتتلاشي مثل حلم الفقير ودمعة القاسي


أصوغ إلك الرضى لو كان في صدري حروب الزير
وأصور هيبتك حتى على صفحات كراسي


قيود الهم ظلامه وظلامه خطا التزوير
وضحك العاذل الشامت مصيبه بين جلاسي


لذلك عزتي تقبل بهجرك عن حلول الغير
وعذرك والخطا سنه تشابه سنة أنفاسي


لعل الصبر يشفع لي وحبي يفرض التغيير
ويبقى قصرك العاجي ويبقى الشامخ الراسي



عبدالله علي الشمراني