ديوان قصائد لشعراء المملكة العربية السعودية (متجدد)☘️☘️

قصيدة رساله مالها عنوان
الشاعر: زايد الرويس زايد الرويس
#العصر الحديث
#المملكة العربية السعودية
0
87 مشاهدة

يعيش الشعر في عصر انحطاط الذائقة منفي

رسالة ما لها طابع! ولا ساعي! ولا عنوان

يشوفه من يشوفه ما يعرف أحيان وش يخفي

ما دام عيون من يقرا قوافي تلحق الأوزان

وانا لو قوّتي شعري.. أعرف انه بعد.. ضعفي

متى ما اوفيت له أوفى.. متى ما خنت لحظة.. خان!

أداري به جنوني.. أو جروحي لا ابتدى نزفي

وياخذني على رحلة مواجع ما لها سلوان

حبيبي.. والسما من غبت عني ضيّها مطفي

كأنك خذت مني كل شي! ورحت للنسيان

أحبك.. يا البعيد اللي معي والمحك في حرفي

وانا من غبت مدري ليه طالت غيبتك ل الآن!

حبيبي.. كم سنة من يوم غبت؟ أسألك: ما يكفي؟

ترى ما عاد بعدك لا طيور.. ولا بقت أغصان!

حبيبي.. باختصار الشعر: غبت! وصرت انا المنفي

حياتي مالها طابع.. وانا!! ما عاد لي عنوان!

قصيدة فاعل وفعله خيالي
الشاعر: زايد الرويس زايد الرويس
#العصر الحديث
#المملكة العربية السعودية
0
87 مشاهدة

أدور ف وجيه الليالي والأيام

أدوّر اللي ضيعته الليالي!

حلمٍ عشانه ما بقى عندي أحلام

حملٍ توتّر من جوابه سؤالي!

مليّت أجمّع حزني حروف وأرقام

ميّلت دمعي للجروح ورقى لي

أرعبتني في وحدةٍ كلها أوهام

أعربتني: فاعل وفعله خيالي

ماله مكان وكل ما حوله حطام

ماله طموح وذكرياتٍ خوالي

أكبت وجع دنياي وجروحي أقلام

أكتب مواعيد انتظاري لحالي

وأدور ف وجيه الليالي والايام

أدوّر إحساسٍ خذته الليالي

قصيدة تنهيدة قتيل
الشاعر: زايد الرويس زايد الرويس
#العصر الحديث
#المملكة العربية السعودية
0
87 مشاهدة

هيه يا اللي كنك الورد.. لامن مال.. مال

مال قلبي منك غير انكسارات الرحيل

تحسب انك يوم سافرت شديت الرحال!!

أنت في قلبي هنيا ولا غيرك بديل

يوم سافرت وتركت الحدايق للرمال!

ما تخيّل وش بقى لي مع الصبر الطويل

ضحكةٍ ما كنّها الا غمامٍ دوووب سال

سيّلت في وسط روحي جروحٍ ما تسيل

تدري انك كل ما ابطيت داهمني سؤال:

كيف صار البعد واقع! مع انه مستحيل!

بشروني عنك بين الحقيقة والخيال!

ورجعت روحي ل روحي مثل عابر سبيل

وانت يا اجمل حلم كان يتهادى في دلال

كلني لك شوق يا حلمي العذب الجميل

ودي اضمّك واغمّض ف لحظة من وصال

واحترق بك واحترق لك بلا نار وفتيل!

كل عرقٍ وسط قلبي ينادي لك تعااااال

ودي اسمع منك احبك ب تنهيدة قتيل!

بعدها سولف واسولف عن اللي ما يزال

يكتب اشعاره ب دمعِه وحزنه سلسبيل

وكان وردك مال قلي بأن الورد مال

كان ما ميّلت قلبي.. عسى حظي يميل!!

قصيدة خبر كانا
الشاعر: زايد الرويس زايد الرويس
#العصر الحديث
#المملكة العربية السعودية
0
87 مشاهدة

كم عام مرّت علينا.. ما تلاقينا

جانا الهوى.. بس ليش الوصل ما جانا

ذي قصة الأمس تبَكينا وتبكِينا

وهذي دموع السهر في وجه ذكرانا

الوقت من وين ما ودّه يوديّنا

وحنا نتفرّج ونسكت يوم ودّانا

ياما سهرنا وسولفنا وغنيّنا

الليل مركب ونصفه كان مرسانا

تشابك عيونّا ونشبّك يدينا

تذوب شمعة ونشعل شمع لقيانا

واليوم شوفي ليالينا تنادينا

قدّام لا نحترق من عز فرقانا

أضحى التنائي بديلاً عن تدانينا

وان طوّل البعد.. رحنا في خبر كانا!!

قصيدة اسئله وإفتراضات
الشاعر: زايد الرويس زايد الرويس
#العصر الحديث
#المملكة العربية السعودية
0
87 مشاهدة

صوتك مُثير لكل ما يمكن يثار

من أسئلة أو افتراضات.. أو.. أو

وانا بعيدٍ عنك تجلدني افكار

تبدا بكيف وتنتهي دايم ب لو

كيف اقطفك لا مالت غصون الاشجار

لو ازرعك واغيّر الجو ب الجو!

يا ام الحنان الممتلي عشق واسرار

يا ام الجمال الممتزج ضي.. مع ضو!

من وين ما سافرت بك شفتك انوار

كواكبك متقندلة ب اول النو

البحر ما يحتاج مركب وبحّار

يحتاج له عشاق باحلامهم جوا!

كل المداين وجنتك.. شفتك نار

مادام صوتك واصلٍ مسمعي تو!

أثار بي ف الحال ما يمكن يُثار

من أجوبة أو اقتراحات.. أو.. أو..

قصيدة هذا هو المطلوب
الشاعر: زايد الرويس زايد الرويس
#العصر الحديث
#المملكة العربية السعودية
0
86 مشاهدة

دفا حضنك وترنيمة هدبك الفاتر الجذاب

خجلك المنتثر لمسات يدّك عطرك المسكوب

سوالف عينك وفمك وشعرك الناعم المنساب

دلالك.. سكّر حروفك إلى من ذاب فيني ذوب

دقايق صمتي ودقات قلبي لا فتحتي الباب

إلى آخر ذكرياتي والشروق المنتهي بغروب

بقتْ فيني وخلتني على حطة يدك مرتاب

أعلّق رغبتي في دفتر احلامي بدون اسلوب

على بساط السهر نامت بك عيوني وله وعتاب

وطارت لك معه كل السنين ودمعة المحبوب

أحس ان الليالي مستبده والزمن كذاب

غلبت الصبر لكني على أمري معك مغلوب

أعيشك في حياتي قصةٍ ما قد حواها كتاب

على صفحاتها طاح الحنين بجذعه المصلوب

انا بسألك: توّه ما شبع قلبك دلع وغياب!

واذا صعب السؤال استسمحك باسترجعه واتوب

لأني بس ابي حضنك وسحر الفاتر الجذاب

وسوالف عينك وفمك.. وهنا.. هذا هو المطلوب!

قصيدة يارب حسن الختام
الشاعر: زايد الرويس زايد الرويس
#العصر الحديث
#المملكة العربية السعودية
0
85 مشاهدة

الصمت تنهيدة المجروح قبل الكلام

بعضه رضا! واغلبه تفكير ما له مدى

من يتقنه يستريح من العتب والملام

مادام نصف الكلام اللي نقوله سدى

قلت اشتري راحتي والحكي ألدّ الخصام

يجلب عليك العدا ويرد عنك العدا!

يا روح: لو فيه بعدك روح.. طاب المقام

في واحة العمر.. لكن ما توارى بدا!

إلى انتصف عمر! قل يا رب حسن الختام

وش هم!! لو بهجة الأيام كبش الفدا

يا رب: ما ضرّ عفوك لو يعم الأنام!

ويضرني صوت نزواتي ورجع الصدى!!

يا رب: عن نارك أنقذني ب برد وسلام

وقدام لا اموت أرشدني لدرب الهدى

عفوك وحلمك كبير.. اكبر من ايّة كلام

ورحمتك تاسع عبادك لو يطول المدى

قصيدة لهفة عصافيري
الشاعر: زايد الرويس زايد الرويس
#العصر الحديث
#المملكة العربية السعودية
0
86 مشاهدة

أنا اللي ورى باب الغياب انقتل صوتي

وماتت على ذمة سنيني مشاويري

بكت ضحكتي يوم انها شافت سكوتي

تغاضى عن احزاني ولهفة عصافيري

بداية فرح والا بدايتك يا موتي

علامة تعجّب ترتسم في مقاديري

قفص من ذهب والا ذهب وسط تابوتي

غرامٍ شكى من كثر خوفي وتأخيري

نعي قلب والا قلب مرسوم ف كروتي

هي شموع والا دموع تسكن تعابيري

عسى الوقت ما يقتل صدى صوتي وصوتي

إذا ماتت سنيني ب ذمة مشاويري

قصيدة فوق وساداتي
الشاعر: زايد الرويس زايد الرويس
#العصر الحديث
#المملكة العربية السعودية
0
86 مشاهدة

صب الجمر فوق معلوق الظما واترك

ملامحك تستبيح عيون شرهاتي

العشق ماهوب لا بامري ولا بامرك

لو كان قلبي عشانك ساق خطواتي

إن جيت بالوصل ياكبره علّي اجرك

فرّجت همي وكرباتي وضيقاتي

وان رحت عني تعب ما ضاق بي صدرك

يا ارحب من الحب واقرب من مسافاتي

إي والله اني أحبك حب لو تدرك

أقصاه ما اخلفت روحاتي وجيّاتي

والبارحة فاضت احلام الغلا عبرك

عجزت لا القى بعدها وين غاياتي

يا صبر قلبي على احلامه ويا صبرك

على سؤالٍ بداياته نهاياتي

يا طول ليلي قبل لا ينبلج فجرك

طاحت نجومه قبل ما اكتب لك الآتي:

والله لو تصب فوق وسادتي جمرك

لانام مرتاح واصحى وانت في ذاتي

قصيدة شعر ومواويل
الشاعر: زايد الرويس زايد الرويس
#العصر الحديث
#المملكة العربية السعودية
0
86 مشاهدة

ياصاحبي لا تشتكي لي من الوقت

هو فيه احد في وقتنا ما يعاني!!

كم مرةٍ ضاقت بوجهي.. ولا ضقت

تضيق.. لكن ما تضيق المحاني

وكم مرةٍ كني بحزني تفرقت

على الشوارع والشجر والمباني

ياما على حبل الأماني تعلقت

وياما انقطع بي.. ما قطعت الأماني

من كثر ما كذبت الأحلام صدقت:

إن التعب بحرٍ بليا مواني

ومن كثر ما طاحت دموعي توّرقت

شعر ومواويل وجروح وأغاني!

وان جيت لايامي بتلقاني اشتقت

ألقى مكاني مثل ماهو مكاني

والله لو في وجهي احيان دققت

في ضحكتي بتشوف طعنة زماني

لكن لأنه في النهاية هو: الوقت

تعال نضحك... كننا ما نعاني!!