ديوان قصائد لشعراء المملكة العربية السعودية (متجدد)☘️☘️

قصيدة يكاد الشوق
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
131 مشاهدة

يَكَادُ الشُّوْقُ يُفْقِدُنِي صَوَابِي

وطَالَ الصّمْتُ فِيْ لَيْلِ اغْتِرَابِي

وهَمٌّ فَوْقَ هَمٍّ فَوْقَ هَمٍّ

فَهَلْ مِنْ هَاجِسٍ مَا دَقَّ بَابِي!

إلاَمَ الشَّوْقُ بِالتَّسْهِيْدِ يَرْمِي!

كَمَا الجَلاّدُ يُطْرِبُهُ عَذَابِي

أمَا يَكْفِي شُحُوْبٌ طَالَ وَجْهِيْ

وشَيْبُ الرَّأْسِ فِيْ عِزِّ الشَّبَابِ!

فَلَمْ أَخْتَرْ دُرُوْبَ البُعْدِ يَوُماً

بلَِ الأَقْدَارُ خُطَّتْ فِيْ كِتَابِي

ولَكِنِّيْ رَفَضْتُ اليَأْسَ دَرْبَاً

جَمِيْلٌ كَانَ صَبْرِيْ وَ احْتِسَابِي

يَظُنُّ النَّاسُ أَنّي مِنْ نَعِيْمِيْ

جَزِيْلُ الشِّعْرِ يَسْمُوْ فِيْ خِطَابِي

وكَمْ بَيْتٍ يُغَرِّدُ فِيْهِ شَادٍ

ويُشْجِيْ فِيْ قَرَارٍ مَعْ جَوَابِ

عَسَىْ أَنْغَامُهُمْ تَرْنُوْ إِلَيْكُمْ

وتَمْلأَكُمْ حَنِيْنَاً لِلإيَابِ

بِكُمْ دوماً سَمَاءُ العَيْنِ تَصْفُوْ

تَطِيْبُ بِوَصْلِكُمْ وَ يَطِيْبُ مَا بِي

قصيدة إلا الزعل
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
118 مشاهدة

إلا الزعل.. خلك معي هادي
صوت الفرح.. في الآخِر ينادي
نصبر ولو طال الصبر..
يا حبيّبي عادي
بعض البشر، بس قل لهم طيّب
ربك كريم ويعرف الطيّب
أنت الغلا.. لو يعرفوا قدْرك
إنسى ولا.. تحتار في أمرك
نصبر ولو طال الصبر..
يا حبيّبي عادي
لولا الأمل، ما للحياة معنى
لا بدّ يوم الحظ يجمعنا
وأقول أبيك.. ويديك في يديني
أضحك عليك.. والدمعة في عيني
نصبر ولو طال الصبر..
يا حبيّبي عادي

قصيدة لولا عيونك
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
115 مشاهدة

شقّ السِفر والقمر سافر ونوره غاب

حان السَفر والفراق اللي يسيّرني

وشلون أفارق عيونك يا اجمل الأحباب؟

أنا وش اللي عن عْيونك يصبّرني

زمان عشته غريبٍ غربة الأصحاب

أعطي خفوقي وليت النبض يشكرني!!

كلٍّ نساني تقولين الجميع أغراب!!

سنين محدٍ من الأصحاب يذكرني

الدار كانت قبر موحش عليه غْراب

زوّاره الليل ونْجومٍ تسامرني

اشكيها حالٍ وهمٍّ في ضلوعي شاب

وأحكام الأيام تنهاني وتامرني

وما بين صمتٍ سكن داري ونوح الباب

وخوفٍ منَ أشباح باكر خوف يسْهرني

جيتِ بفجْرٍ تناثر مع سناه اطياب..

من الخزامى وصوت طْيور تسحرني

جيتِ وداري غدت جنّة فرح جذّاب

جنّة فرح، فجْر بأنواره ينوّرني

جيتِ وْ طويت الشقى طيّ الورق ف كْتاب..

ماضي كئيبٍ يكسّرني وينهرني

جيتِ بْأمل في عيونٍ تسرق الألباب

جيتِ بْسعاده تلملمني وتنثرني

يا بنت لولا الأمل ما للحياة أسباب

ولولا عيونك حياتي ما تعبّرني

ومهما أسافر أنا وأركب نجِم وشْهاب

وازور كلّ الكواكب ما تحيّرني

راجع ووجهي ورى أهدابك أسير أهداب

فرحٍ بأسري ومن بالحبّ تاسرني

والناس مهما يقولون السفر غلاّب

محال طول السفر عنّك يغيّرني

قصيدة الدنيا ما تسوى
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
116 مشاهدة

صحيح الدنيا ما تسوى
تحب وتعشق وتهوى..
وتزرع في الحشا بستان.. وتسكن فيه أحب إنسان
تظن إن حبه المثوى
وفجأه ليل ماله فجر.. تنادي وين ضيّ العمر
رحل عنّك بدون وداع.. وترجع للبداية صفر
يطول الصبر ما تقوى
صحيح الدنيا ما تسوى
وش الحيلة..
أنا قدمت لأجله كل ما أملك
نسيت الأمس
قطفت الشمس.. وأنا أهلك
كان الحلم هو نزفي..
وظلال الفرح حرفي
ولا بينت له ضعفي
عسى المركب معه يسلك
وفجأه ليل ماله فجر.. تنادي وين ضيّ العمر
خذا المركب بدون وداع.. وغرق فيك الأمل للصفر
وحبك جذع من شكوى
صحيح الدنيا ما تسوى
حبيبي.. عاشقك ما أعتاد
صدودك يصبح أطول سوط
وصمتك يمسي الجلاّد
متى تجلي ضباب العشرة الحلوة
متى ترجع حبيبي وتقتل القسوة
متى تنزل من اعتابك.. كفاك عناد
ليل الصبر يا صابر..
مهما طال له آخر
الحق قبل موت الحب
وتكون إنته معي خاسر
تمر بليل ما له فجر.. تنادي وين ضاع العمر
ترك ذكرى بدون وداع.. جمر رمّد وأصبح صفر
عمر مثل الورق يطوى
صحيح الدنيا ما تسوى

قصيدة ليت السهر
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
114 مشاهدة

ليت السهر ضيفٍ خفيفٍ على العين

ما يقْفي إلاّ عقْب ما تشرق الشمس

يسجّ بك دايم معَ ناس مقْفين

وإنت بْمكانك ما تحرّكْت من أمس

وليت القدَر يطْلق لسان المحبين

أصواتهم تصدح ولا تعرف الهمس

يا حظّ من هو فاز في نصف هالدين

مع من يحبّ وْ شبّك الخمس بالخمس

وليت الدهر ينْصف بكلّ الموازين

يكرّم الطيبة وأهَلْها عن النِّمس

ما عمرها زانت لنا غير يومين

هم يغرفون أكثر وحنا لنا اللمس

هي فضفضة للّيل والناس ممسين

وفنجال مع فنجال من كايف الحمس

مردّها بتزين، وإن عيّت تْزين

نشوف في باكر عوضنا عن الأمس

قصيدة تحبك جروحي
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
113 مشاهدة

كم تحبك جروحي
ما تبي اعتذار
قدرك أكبر وروحي..
تعشقك باختصار
***
ودي المس كفوفك
لا يطول الحنين
حيّ عينٍ تشوفك
يا بعد كلّ عين
***
كم تحبك جروحي
ما تبي اعتذار
قدرك أكبر وروحي..
تعشقك باختصار
***
المحبين واجد
بسّ ما لك مثيل
يا عسى أيّ حاسد..
في هوانا قتيل
***
قلت لك باكر أجمل
قلتها لك وأقول
الشتاء مهما طوّل..
ما هو كلّ الفصول
***
كم تحبك جروحي
ما تبي اعتذار
قدرك أكبر وروحي..
تعشقك باختصار

قصيدة صوتك تأخر
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
108 مشاهدة

نجمٍ طفى.. قبله نجوم
ليه اختفى..
وللحين ما أقدر أنوم
عشت التعب..
وللحين في ظِلّ التعب
وش هو السبب!!
نجمٍ طفى!!
تعودت عيني عليه!!
هل كنت أحبه!!
كنت أبيه!!
لوحت أنا بيمناي
وصرخة ترد لشفاي..
صوتك تأخّر..
صوتك تأخّر
كلّ شيء ساكن.. كلّ شيء داكن
ما في المكان
سوى صوت الرياح.. كله غضب
وساعة غرفتي.. كنّه عتب
وفجأة..
تناظرني المراية
تناديني لحكاية..
بياض الشَعر يحكيها بصمت
اثر انتظاري..كان عمر
كان اختياري.. وكان أمر
لوحت أنا بيمناي
وصرخة ترد لشفاي..
صوتك تأخر..
صوتك تأخر
بقولها.. لو ما سمع صوتي أحد
بقولها.. قدام شباك الوعد
مشتاق لك يا نجم حبّي
مشتاق لعيونك وربّي
بقولها.. من كل روحي والجسد
مشتاق لإحساس الأنامل
مشتاق والله ما أجامل
سافرت في مركب سهر..
وبكيت لقدوم الفجر
لوحت أنا بيمناي
وصرخة ترد لشفاي
صوتك تأخر..
صوتك تأخر

قصيدة أقبلَت أربعيني
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
108 مشاهدة

أقبلَت أربعيني بالرضى والأمل

كلّما قلت خيرة يشتعل بي طموح

واللي مكتوب لي حيّاه مهما حصل

واللي ودّه يروح اليوم خَلّه يروح

كلّ من شافني يحْسب طريقي سهل

اكتسى الشيب زينه من رماد الجروح

قدّ ما ضرني طول الشقاء والزعل..

ببتسم لين ما يبقى حمامٍ ينوح

كم تماديت بذنوبي وكثر الزلل

بين أبليس والتوبة صراع ونزوح

لكن الله معي مهما خفوقي غفل

دوم يستر على عبده لو أنه فضوح

كم سهرت الليالي أدرس بْلا كلل

والشهادة دليل المعرفة والرجوح

أكتسب من هل الخبرات علم وعمل

والمعالي تنادي فوق أعلى الصروح

كم تغنّى قصيدي في الهوى والغزل

والنغم يكشف الخافي بسري يبوح

منوتي بيت خالد مضربٍ للمثل

وغنوةٍ للوطن فوق الأغاني تلوح

كم عشقت وهويت وذقت حالي العسل

بس تأذيت من طيبي وطبعي سموح

وحدة النفس أبرك من غرام العلل

كود به قلب يفهمني ووجهٍ صبوح

كم عطيت الأحبة وألقي منهم أقل

يكفي أدمح خطاهم وأعتبرها مزوح

يكفي أسأل عن الغايب ولو ما سأل

ما تحسفت لحظة والمراجل وضوح

العمر يهتني به من مشاه بْمهل

ومن نثر طيب فاله مثل عطرٍ يفوح

بطرد الياس ما له في حياتي محل

دامها الشمس تشرق والجسد فيه روح

قصيدة خذني هناك
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
99 مشاهدة

خذني هناك..
خذني بعيد.. أمل جديد
مكان فيه أقدر أكون
وأقدر أحب..
ولي عيون
هيّا.. قبل يدري الشفق
قلبي هنا ما قد خفق
هناك..
شفت ابتسامة صادقة
شمسٍ على كل الشفاه
أجمل رسالة للحياة
وهناك..
شفت القلوب العاشقة
كلٍ له جناح ويطير
ولا به ظلوم ولا أسير
وأنا بطير..
أهيم من الغيوم إلى القمر
وإذا بردت..
لبست الشال من قوس المطر
هيّا.. قبل يدري الشفق
قلبي هنا ما قد خفق
لأجل أنسى..
عن كلّ جرحٍ صار..
بعزف أنغامي
وعن كلّ وقتٍ طار..
بسبق أيامي
ولا أترك بقلبي مكانٍ للحنين
وش تنتظر! كان انتظاري بالسنين
وش تنتظر!.. ليه نتأخر!
صدقني ما شي بيتغير
خذني هناك.. لا تذبل أحلامي
هيّا.. قبل يدري الشفق
قلبي هنا ما قد خفق

قصيدة رعود
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
99 مشاهدة

إن كان في قلبك رعود
أحد جرح مشاعرك
وإلا نكر بعض الوعود
بالله قل لي.. هو خطا!
إني أبادر بالعطا..
وتحبني!
خله يقول اللي يقول
أني سحرتك بالهوا
وإلا على خلك عذول
بالله قل لي.. هو خطا!
إني أبادر بالعطا..
وتحبني!
أقبل علي.. يا قوتي وضعفي
أقبل وحط راسك على كتفي
وش تنتظر.. ما فاتنا يكفي
الحين وبس.. أقبل علي
وإن كنت في ليل وشتاء
ما أحدٍ يحس برعشتك
والفجر ما تدري متى
بالله قل لي.. هو خطا!
إني أبادر بالعطا..
وتحبني!
وإن ما بقى شي تخسره
والياس في قلبك سكن..
ولا عاد فيك تخيّره
بالله قل لي.. هو خطا!
إني أبادر بالعطا..
وتحبني!
أقبل علي.. يا قوتي وضعفي
أقبل وحط راسك على كتفي
وش تنتظر.. ما فاتنا يكفي
الحين وبس.. أقبل علي