ديوان قصائد لشعراء المملكة العربية السعودية (متجدد)☘️☘️

قصيدة هذي السعودية
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
63 مشاهدة

"أخضر" كسى وجه السما بالمهابة
"أبيض" قديم الخير مثل السحابة
"في حضرته" باقي البيارق تشابه
مع كلمة التوحيد والسيف مسلول
"هذي السُّعُودية" وما بعدها قول
-
"أخضر" كما عذق النخل في شموخه
"أبيض" كما وجه الكرم في شيوخه
"في حضرته" يبقى العدو في رضوخه
مع كلمة التوحيد والسيف مسلول
"هذي السُّعُودية" وما بعدها قول
-
"أخضر" نماري به على كتف سلمان
"أبيض" وسلّيته على كلّ خوّان
"في حضرته" عرضة فخر زين الأوطان
مع كلمة التوحيد والسيف مسلول
"هذي السُّعُودية" وما بعدها قول
-
"أخضر" على رؤية "محمد" وعزمه
"أبيض" على صفو العرب لاح نجمه
"في حضرته" الشعب آمن بحلمه
مع كلمة التوحيد والسيف مسلول
"هذي السُّعُودية" وما بعدها قول

قصيدة يوم ثاني
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
62 مشاهدة

ويومٍ ثاني راح..
بعد ما الغالي راح
كيف البعد يرضيه!
ودمعة عين مغليه!
بلا كلمة وداع
تركني للضياع
شتاء ورى شتاء
ولا أحدٍ قال لي ليه!
وكل ليلة تمر أسال
متى هذا الجليد يزول
وأحس ضيّ الفجر أقبل
وصوتٍ من بعيد يقول..
لا منت الوحيد..
وإن كنا بعاد..
حبك في الوريد
وفي كل البلاد
ويبقى الشوق لك
والإحساس لك
شمعة كل عيد
بعد ما الصوت غاب
عجزت القى جواب
أبي أعرف لمن..
هذا صوت من!!
صوت اللي رحل
أو صوت الأمل
أو صوت الجراح
ويومٍ ثاني راح

قصيدة يسعد أيامك
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
61 مشاهدة

حبيبي يسعد أيامك
تكون أطول من أيامي
أبي أعرف عن أحلامك
وأخليها هي أحلامي
تشوف الخير قدامك
وأشوفك دوم قدامي
-
أضمك حيل في صدري
وزخات المطر معنا
تغني يا بعد عمري
وتغسل كل مواجعنا
أنت الصدق في نظري
ولا به شيء يخدعنا
-
تكلم يا أرق بسمة
أحبك ليه تخفيها!
أبيك تقولها نسمة..
تمر روحي وتحييها
أحبك ما هي بس كلمة
هي الدنيا وما فيها!
-
أبيك تحس بإحساسي
وش أحكي لك! وش أبكي لك!
وكيف أن وقتي القاسي..
تخطيته بحبي لك
ظلام القلب من يأسي..
تلاشى في قناديلك
أبيك تصير أنفاسي
وأصير بكل تفاصيلك!
-
وش الفتنة سوى لونك؟
وشمسك من يداريها؟
وش أشعاري سوى عيونك؟
رموشك هي قوافيها!
ومن هو غير مفتونك..
لأهل الذوق يرويها!
-
تكلم يا أرق بسمة
أحبك ليه تخفيها!
أبيك تقولها نسمة..
تمر روحي وتحييها
أحبك ما هي بس كلمة
هي الدنيا وما فيها!

قصيدة منت صاحي
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
60 مشاهدة

أنت صاحي! لا وربي منت صاحي

كيف بعد العمر هذا ما أحبك!

كلّ شيء يشهد معي، حتى جراحي

مير أظنّ إبليس وسواسه لعب بك!

قبل أحبك، ما في شي يكبح جماحي

والهوى له ألف دربٍ غير دربك

لكن اخترتك وسلمتك جناحي

لي سماء بنجومها واخترت قربك

تدري أنك سلوتي وأنت انشراحي

أشعر أنه سعد حظي انكتب بك

بسمتك يا زين هي قهوة صباحي

أنت كيفي وأهوى فنجالك وشربك

كيف ما أحبك وبك تسكن رياحي!

وكنت جنبك دوم في سلمك وحربك

شرهتي يا كبرها، لو كنت صاحي..

كان ما وسوست واستغفرت ربك

قصيدة أعرفك زين
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
61 مشاهدة

أعرفك زين وأنت الزين كّله

وأعرف اللي ورى أحلى ابتسامة

حبّك العذب لا يمكن أملّه

ولا يهزّه جفا وإلا ملامة

في عيونك لقى حلمي محلّه

وعاشقك ما يبي يترك منامه

سلهِم الرّمش، بتهنّى بظلّه

واتقلّب على خدٍّ وشامة

بك تعلّمت أحبّ العمر والله

وأنت عمري بلا خوف وندامة

فيك دمعي من الفرحة أهلّه

وأحمد الله على نعمة تمامه

تدري أنّ الهوى ما به مذلّة

به نصون المودّة والكرامة

الزعل والرضا كلٍّ يدلّه

والمحب ما يطوّل في خصامه

لو بعاتب بشي واحد، أقلّه..

كيف تجهل بقلبي واهتمامه!

أطرد الشكّ والتفكير خلّه

وصدق اللي يغنّي بك غرامه

قصيدة التغلي
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
60 مشاهدة

التغلّي، ما يفيد اللي تغلّى

وأنت قدْرك تعرفَه بالحيل غالي

والمهلّي، ما يفزّ لْمن تولّى

لو تبي تقْفي يسامرني ظِلالي

أنت خِلّي، وأحلى من بدرٍ تجلّى

مير ذلّ النفس والله ما طرا لي

التسلّي، ما هو طبعي اتسلّى

مكتفي بك عن جميع الناس سالي

والتخلّي، لا تخافه ما أتخلي

ما تشوف الضيم مهما ضاق حالي

أَطلب اللّي، في سماواته تعلّى

يحفظِك لي من صواديف الليالي

قصيدة الحنان العذب
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
59 مشاهدة

تطري علي أيامنا أول
شوقي لها طوّل
ما كنت أظن الجرح في باكر
مَرّ النوى خِلّي ولا روّح
أقفى ولا لوّح
للحين زوله في السماء حاضر
كيف الحنان العذب في عيونه
يغدر بمفتونه
صدق الهوى غلاّب في الآخِر
وين القلوب الضايعة تمضي
ضاقت علي أرضي
ومن يجبر الخاطر من الخاطر
بركب على خيل الأمل وأرحل
للباكر الأجمل
كل الظروف بدنيتي تصفى
ولو صاحبي صدفة تذكّرني
وإلا سأل عنّي
قولوا نزَف جرحه هنا وأقفى

قصيدة حبست جرحي
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
56 مشاهدة

حبست جرحي في الحشا طول عمري

عل وعسى يبرا، ويا صبْر الأيام

الصدق جرحي ما رحم طول صبري

وإنه حبسني ظلم عامٍ ورى عام

لا شكّ جرحي هو سبب شيب شَعري

أخذ شبابي للحسايف والأوهام

عظيم جرحي هو سبب نزف شِعري

يكفي علي صرت اسمعه بين الأنغام

وإن عفت جرحي قال لي وين! بدري!

بتذوق ناري لو حكى ألف لوّام

واليوم جرحي بعد ما طال أسري

أطرى الغياب وخفت لا تغيب الأحلام

أعتدت جرحي ما توقعت يسري

وأنا على الحالين عضيت الإبهام

مالي سوى ربي يدبّر لي أمري

يسوق لأجلي راحة البال قدّام

قصيدة أبوعدك
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
56 مشاهدة

أبوعدك، ننسى الألم، ننسى اللي فات

نفرح سوا، نضحك سوا، نكبر سوا

يا أغلى حب، يا نبض قلبي والحياة

ياللي عليك أخاف من نسمة هوا

وأبوعدك، دنيا الهنا بعد الشتات

حتى ولو قلبي تعذّب واكتوى

في بسمتك نور الأمل والأمنيات

ألقى بها بلسم جروحي والدوا

الروح لك، والشوق لك، والذكريات

وبالي معك لما أغني للهوى

وأبوهبك، العمر كلّه للممات

وما نفترق مهما الزمن جار وقوى

قصيدة ما يذوق الجرح
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
54 مشاهدة

الصبر عندي جميل
وإن غدى حظي بخيل
علمتني وحدتي..
إني أرضى بالقليل
دام راسي حيّ ويشم الهوا..
وش علي من المفارِق والنوى!
لو أصيح الليل كله..
ما تطيح إلا دموعي
ولو أشب الآه والله..
ما تذوب إلا ضلوعي
ما يذوق الجرح أبد..
اللي قلبه ما يميل
دام راسي حيّ ويشم الهوا..
ما علي من المفارِق والنوى