ديوان قصائد لشعراء المملكة العربية السعودية (متجدد)☘️☘️

قصيدة ألم فرقاك
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
46 مشاهدة

نويت أرمي ورى ظهري..
شعورٍ قد بلاني فيك
نويت أرميك..
يا حزنٍ بات في صدري
كثر ما أغليك..
أخذ صبري..
ربيع العمر من عمري
وأنا وياك..
حتى لو عجزت أنساك
مهما قلت أبي أنساك
نويت أرمي ورى ظهري..
ألم فرقاك
-
غريبة حالة الذكرى
بقت ذكرى..
ولكن طعمها تغيّر
صوَرنا كلّها بسمة
بقت بسمة..
ولكن لونها أصفر
أنا اللي صرت من بعدك
على يدّك..
أخاف مْن الفرح وأكثر
يعود الحزن وأتكسر
ولكن علّها خيرة
يطل غيرك على الديرة
ويجبر بالهوى كسري
من يدري؟..
حتى لو عجزت أنساك
مهما قلت أبي أنساك
نويت أرمي ورى ظهري..
ألم فرقاك

قصيدة من مدة
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
46 مشاهدة

ما قلت لك من مدة إني أحبك؟
ما قلت لك ما لي وطن غير قلبك؟
يملا سنين العمر فرحة
والقلب يسأل وين جرحه!
يقفي مع النسيان لا صرت قربك
يا شمس روحي يا صباحه
دفاك يكسي البال راحة
يا كبر حظي يوم صادفت دربك
-
ما قلت لك من مدة إني أشوفك..
طفلة من اللي فاض طيبة بجوفك؟
حبك ورب البيت نعمة
ما يوفي قدرك أيّ كلمة
ولا يجيب الشعر حالي حروفك
تستقبليني بابتسامة
وما تنطق شفاهك ملامة
يبقى شموخك مهما كانت ظروفك!
-
الله لا يحرمني لمسة كفوفك
ما قلت لك من مدة إني أحبك؟

قصيدة أنا تمنيتك


سطام بن أحمد الحرابي

#العصر الحديث #المملكة العربية السعودية

0

44 مشاهدة


أنا تمنيتك لي العمر كلّه
والحب يغمرنا بشمسه وظلّه
ما كنت أظن في يوم هذي الحكاية..
بكلّ ما فيها تصل للنهاية
صعبة علي أنطق بها للمرآية!
صعبة علي أقول.. ودعتك الله
-
شفت السعادة فيك وارتاح بالي
رسمت أحلامي معك في خيالي
ولو بيدّي أمنية.. بس أبيها
شوفي عيوني زين وتأمليها
تلقين فيها أغلى من شفت فيها!
صعبة علي أقول.. ودعتك الله
-
بتذكّر اللي بيننا طول الأيام
وأضوي لنا شمعة من العام للعام
هي ذكرياتي، لو غدت حيل مُرّة
ما أشوف غيرك لو أشوف المجرّة
بصغي لقلبي وأسمعك كلّ مرّة!
صعبة علي أقول.. ودعتك الله

قصيدة راحت منيرة
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
43 مشاهدة

راحت منيرة وأنطفت شمعة الدار

والقلب ينشد وش يعوّض ضياها!

راحت و"ثالث ركن" بالجوف إنهار

يا الله ترحم حالنا في عزاها

لي جدّةٍ بالطيْب أعذب من أمطار

وأطهر من الأطفال صافي حشاها

في خيرها تاجٍ على روس الأخيار

ومن كلّ طبعٍ زين ربي حباها

عشت بكنفها ألف سيرة وتذكار

أذكر الين اليوم ريحة عشاها

وأذكر عطايا العيد من يومنا صْغار

مهما كبرنا مستمرٍ عطاها

يا الله تغفر ذنبها وأنت غفار

واكتب لنفسٍ مطمئنة رضاها

وبرحمتك حرّم يديها عن النار

واجعل لها في جنتك منتهاها

مع النبي، بين الصحابة والأبرار

هذي منيرة صعب نلحق جزاها

قصيدة مرثية إبراهيم الإبراهيم
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
42 مشاهدة

مرحوم يا من فاتنا في شبابه

يالوافي إبراهيم ولد البراهيم

لا شكّ موتك ما حسبنا حسابه

فجعتنا في غفلةٍ دون تقديم

صار الحزن في القلب كايد مصابه

وأنفاسنا تزفر لهبها من الضيم

الموت ربي قدّره في كتابه

حقٍّ علينا به رضينا بتسليم

الطيّب المضياف مفتوح بابه

له مجلسٍ عامر بحلو الترانيم

خيره كثير وقَلّ من هو درى به

يا الله تقبّل ما عطى دون تأثيم

كان الشغف عنوان حضرة جنابه

والصعب له يسهل بعزمٍ تصميم

وإن شَدّ في موضوع أو جَزّ نابه

ندري بجوفه قلبٍ أبيض من الغيم

ذكراه تبقى ما تغيب بْغيابه

وطاريه نسعد به كما رشة الديم

يا ربي اغفر له ويمّن كتابه

أنت الرحيم وما بحكمك مظاليم

ووسّع بقبره ثم ولّم زهابه

لجنّتك واسقيه من عين تسنيم

صلّوا على خير الهُدى والصحابة

عدّ الرجاء في رحمة الله وتسليم

قصيدة على الموعد
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
43 مشاهدة

قضى موعد..
وجاء موعد..
حبيبي.. ما كفاك غياب!
مدري وش جرى! قل لي!
كان لغيبتك أسباب!
وقل لي يا بعد ناسي
أخاف أنك بعد ناسي
وأخاف أموت من ياسي
قضى موعد..
وجاء موعد..
وأنا وقلبي على الموعد
أنا وقلبي تعبنا أمس
تعبنا من عيون وهمس
قالوا لو تجي باكر
حاله يكسر الخاطر
عيونه تفضحه ويبان..
مهما يحاول يكابر
وقل لي يا بعد ناسي
أخاف أنك بعد ناسي
وأخاف أموت من ياسي
قضى موعد..
وجاء موعد..
وأنا وقلبي على الموعد
تجمّل..
يا أمل عمري تجمّل
وقل لي جاي
أبي تروي ضما روحي وكل دنياي
قالوا لو تجي باكر
حاله يكسر الخاطر
عيونه تفضحه ويبان..
مهما يحاول يكابر
وقل لي يا بعد ناسي
أخاف أنك بعد ناسي
وأخاف أموت من ياسي
قضى موعد..
وجاء موعد..
وأنا وقلبي على الموعد

قصيدة إن جيت للحق
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
42 مشاهدة

إن جيت للحقّ، ما لك حقّ تفتنّي

يا كايد الحسن أرفق بي على مهلك

يكفي خيالك وهمساتك تجننّي

ودقات قلبي تسابَق يوم أوجّه لك

والسحْر بعيونك اللي هي سبب فنّي

تجهل بسحرك وكم تختال في جهلك!

خذ عنّي أنّك حلا الدنيا وخذ عنّي

أن المطر في جماله صار يشبه لك

ملكْت كلّي وكلّك دوم يسكنّي

بالحيل صعبه على غيرك ويا سهْلك

ياللي وجودك أمل ضيّه يطمنّي

وإن ضاق صدري، لساني غصب ينده لك

طاهر وعفوي وعفوك لو بدر مِنّي..

تقصير في وصف طيبٍ عذب من نهلك

عندي سؤال وعسى ما أكون متجنّي

من أيّ كوكب سريت وجيت مع أهلك!

قصيدة للخلود
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
41 مشاهدة

هذا أنا..
وهذا كل اللي أعرفه..
اختياري هو حياتي
والعطا عنوان ذاتي
واشتعالي صعب وقفه
راح أثبت لأجل حلمي قد ما أقدر
هذا إيماني بنفسي بس لا أكثر
وإنت لي وحدي..
لي طريقٍ ما مشى به أي أحد قبلي
والمشاعر ما لها كلمة على عقلي
وإنت لي وحدي..
عمري ما أطري الوداع..
إنت تدري من أنا
للأبد.. للخلود
حبي لك مثل الفضا..
ماله حدود
رحلتي داخل عيونك ما لها آخر
قل لي لو لها آخر!!
ذكرياتك باقية ما دمت بك حاضر
إنت أمسي.. وإنت يومي
وإنت باكر
وإنت لي وحدي..
عمري ما أطري الوداع..
إنت تدري من أنا

قصيدة جابوا طاريك
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
38 مشاهدة

جابوا طاريك..
ذكّروني فيك
صورتك مرّت ثواني..
وارتعش قلبي بْجمالك
ما دروا إنّا افترقنا..
وانتهت رحلة دلالك
خفت أسأل كيف حالك
ويسألوني وش جرى؟
كيف أشكي وأنتِ جرحي!
وأنّ جرحي ما برى!
ليتهم ما ذكّروني فيك
ليتهم ما عذّبوني فيك
حزن في قلبي كبير
بس عزاي بْبسمتك
والمهم شفتك بخير
-
قلبي بعدك ما خفق..
ما أظنّ بْيوم يخفِق
صعب أكرر غلطتي..
والأمل ما عاد يصْدق!
الندم أدمى شفاتي
وقّفَت عندك حياتي
كلّ شي واقف بدونك إلا عمري
ما قدرت أكون مثلك أقوى صبري
وأنسى حضنٍ كان يغفى فوق صدري
علميني وش سواتي!
ليتهم ما ذكّروني فيك
ليتهم ما عذّبوني فيك
حزن في قلبي كبير
بس عزاي بْبسمتك
والمهم شفتك بخير

قصيدة عندي
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
37 مشاهدة

عندي..
أنت اليدين اللي ألاقيها
إذا تاهت خطاي
عندي..
أنت النجوم اللي أناديها
تنوّر لي مساي
أكيد أحس بوجودك
وأشوفك في السما
ما به طريقٍ طويل.. ولا ضما
وأنت عندي
-
عندي..
أنت الرفيق اللي يراعيني
ولو طال الخصام
عندي..
أنت الكلام اللي يواسيني
إذا عَزّ الكلام
أكيد أحس بوجودك
وأشوفك في السما
ما به طريقٍ طويل.. ولا ضما
وأنت عندي
-
أكيد أحس بوجودك
وأشوفك في السما
ما به طريقٍ طويل.. ولا ضما
وأنت عندي