اخترنا لكم

تكرم خطانا عن دروب المقفيّن
ويكرم قصيد الشوق وأعذب حروفه

واللي خلق صف الرجال المصليّن
إني على قد المحبه عيوفه

طرى علي بيتٍ من شهور وسنين
ومعاني البيت الجزيل معروفه

إن كانه السلطان حنّا سلاطين
ومن زلّ عنّا بالنظر ما نشووفه

.....

مايزعلنا كلام القفى بين الرخوم
‏الجبال جبال وضرب الحصى ماهزها

.....

استانسو ترا الليالي زايله
ولا تكدركم تصاريف الحياه

ماينفع المهموم همٍ شايله
الرابح الي يعطي الدنيا قفاه

وترا التشكي بالظروف المايله
اتشين الرجال وتقلل حلاه

حتى ولو عاين نجوم القايله
يخلي الشكوى لربه في دعاه

واللي يدور للدروب الطايله
فلا يخلي طاعة الله والصلاه

.....

لاتشتكي من بعض الأصحاب وتبوح
كـلـن يبيّن بآخـــر الـوقـت أصله

أحـدن يجيلك لأجل حاجات ويروح
واحــدن لوانه راح ماغاب وصله

.....

خلّوه يحضن راحة القلب وينام
‏قــرا كـــلام الله ونـامت عيــونه

‏خلَّى لكـم كلّ الدفــاتر والأقلام
‏خلّوا له القرآن لا تأخــذونه

.....

‏بخير دام إن عندنا من يقولون
متى الصلاة وكم باقي عليها

.....

‏يارب مسي كل غالي بغاليه
‏واجعل لهم من كل شبر سلامة

‏واجعل لنا من منزل الطيب عاليه
‏وأحفظ عبيدك من دروب الندامه

.....

تبي الصراحه ومعه الموجز المختصر
خلك مع الناس سلام وعليك السلام

ماعاد تدري وش اللي في نفوس البشر
احيانا تشك كل الناس فيها انفصام

اسبوع مثل نسيم الصبح عقب المطر
واسبوع مثل العجاج اللي يشيل الخيام

.....

لـو فاتك اللي فـي حياتـك تمناه
‏ماهـوب مثل اللي اذا متّ فاتك

‏ساعـه تعيش بها على طاعة الله
‏تسوى جميع اللي جمعت بحياتك

.....

‏لاجاتك الحكمه من لسان شايب
خذها وسكر بالحشا دونها الباب

مرت به الدنيا وشاف العجايب
وجمع بقلبه من تجاريبها كتاب

.....