اخترنا لكم

‏لا أحـد يقول الشعر ماهو مرجلة
‏لا والله الا الشعر عندي راس مال

‏الشــعر له بــين العــوارف منزلة
‏له قدر عــالي في مفاهيم الرجال

‏من قــدره بالفعل يخـــتار أجزله
‏والشعر ديوان العرب في كل حال

.....

‏يناديك همس الغيم والماطر الهمّال
‏وجمر الشموس وبارق الليل والقمرى

‏وقف لك حنين الامس وقفة رضا وإجلال
‏وطاحت قِدمك اخر حصوني من الذّكرى

‏عرفتِك مثل اجمل قصيده تمر البال
‏وذِكرتك مثل جرح لو اموت ما يبرى

.....

‏أنتِ أم السِّنين المقبلة والمقافي
‏كيف اشيِّد مشاريهك وأثبِّت وتدها

‏يا فداك الصَّحاري والمدن والمرافي
‏ونجمةٍ كلّ ما طلّت يبشّر سعدها

‏في هقاوي كلامٍ كلّ ما قلت وافي
‏ضيّفتني عيونك ما هو أشرّ وأدهى

‏اتركيني ورى ضحكتك أعنّ القوافي
‏ضحكةٍ وش علي إن ضاع عمري بعدها

.....

‏فالوساع الحور ما يجمع شتاتي
‏ودي أزبنها وأنا زبن المجنّا

‏ما أنثنى عزمي لو إن الريح عاتي
‏لين فرّع ليّن العود وتثنّى

‏غير لا يشغلك فقري من غناتي
‏أنا مخلوقٍ على شان أتعنّا

‏أنا وافكار القصيد ومفرداتي
‏كان بتروحين وين نروح حنّا

.....

‏حتى الحزن يبي من الواقع نجاه
‏ما يزبن إلا في صدور الطيبين

‏إللي عيونه ما تشوف إلا عناه
‏ماعاد يثّر في محانيه الحنين
‏
‏إللي عطيناه الثقه ربي عطاه
‏فرصه وحيده ما تكرّرها السنين

‏حنّا ثقتنا غاليه مثل الحياه
‏ماهيب تعطى للأوادم مرتين

.....

أستغفر الله كل ماصبحت وامسيت
على قصوري في مواجيب ديني

يالله تعتقني إذا مني اخطيت
وتجعل ثـرى الجنه جزى والديني

.....

ياللي على غيبتك هلّت مدامعنا
لا واخسارة وفاي وسابق ايامي

اشبعتني بالكلام اللي بلا معنى
لكن بالافعال شفني جايع وضامي

.....

‏يارب عنا على التقوى وزدنا ثبوت
‏في مغريات الحياه اللي علينا تمر

‏ نلهى والايام تجري والليالي تفوت
‏والعمر محدود والدنيا الدنيه ممر

.....

هـودت لفـراشي علـى بالـي انـام
وجردت فكري من صواديف مابه

كنت احسب اني غارق بين الاحلام
الله واكـبر يـاشـعـور الــكـئآبـه

اثـر الرقـاد اكبـر عـدوٍ للايتـام
اسقتهم ايام الطفوله شــرابه

.....

بكره يزين الدرب ويتغير الحال
‏وننسى غثى الماضي ونحمد الله

.....