اخترنا لكم

‏هذي حياة مسطرين التواريخ
وهذي مضاربهم وهذا دبشهم

من دونها كم راح شيخٍ ولدشيخ
ماتروي حياض المنايا عطشهم

حامد بن حمدي

إما اشتهر بالطيب والناس تكفيك
والا ترى مالك ورى الصيت حاجة

بعض العرب في شهرته كنه البيك
مشهور لكن في النهاية دجاجة

.....

تجمل ترى والله ما للجميل انكار
ولا ينكره من كان في راسه مروه

عسى راع أبشر ماتقفي به الأقدار
ولا ينقطع ذكره ولاتنطفي ضوه

.....

الزمان يدور والوقت يطحنا رحاه
كل يوم يموت رجال ونصلي عليه

كم رفيقٍ ودنابه على قيد الحياه
وكم رديٍ يبطي الموت عيا مايجيه

.....

أحب الجماله والجماله عمل مبرور
وأحب الغناه وعز نفسي عن المنّه

وأحب الصراحه والصراحه بها معذور
حيث ان الصراحه تقطع الشك والظنّه

وأحب الكريم اللي يفرّج عن المعسور
ليامن عطى حتى هله مادروا عنّه

.....

ياللي تقول إن فقرنا من يدينا
لاتحسبنّا مانعرف التدابير

ياما غدا منّا وياما عطينا
وياكثر ماحاشت يدينا من الخير

نجود من جودات ربك علينا
ونصبر ليا كثرت علينا المخاسير

وان جات من ربك على مابغينا
والا صبرنا في رجا الله تيسير

.....

الهقوه اللي تدحم كبار الصفوف
يبغالها لمداحم العالم متن

واللي مراجلهم على حسب الظروف
لاشدو حبال المواقيف فلتن

واللي يشوف الحق وماكنه يشوف
هذا يغط النور ويثير الفتن

ماتستوي روس النشاما والضعوف
بيارق الطيّب على العز اثبتن

.....

وقفنا على باب الامل وقفة المحتاج
و رجينا كريم ماهو يصك بيبانه

يناجيه عبده ما يرده سحا واحراج
و يطلبه من فضله و مدته و احسانه

عسى مقبلة الايام يسر ورخا وافراج
وعسى ما مضا يمحاه عفوه وغفران

آمين

صكوك الجمايل فالنشاما مسّنْ سيوف
مادام السنافي بين وقفة وترحيبة

تقدّم على درب القدا والعيون تشوف
سهوم الليالي تخطي الكفْو وتصيبه

ترى شرهة اللي لا جمالة ولا معروف
مثل مِنّة اللي ما عطا شي من جيبه

.....

رغم الظروف اللي تمرّنا عايشين
والوقت يمشي ما يطالع فايته

ممتع شعور الصبر بكل الحالتين
يعلمك كل شيٍ بيوصل غايته

نتصنع الضحكة وحنّا ساكتين
وفالساكتين أشياء ماهي ساكته

.....