اخترنا لكم شعر نبطي وفصيح

ما تطرد الضيقات كثر التناهيد
ولا كثرة الونات تبري جراحك

غرد بذكر الله تطيب التغاريد
وتحلا لك الدنيا ويحلى صباحك

.....

من اول طيب الولد من خواله
واليوم طيبه من خويٍ يخاويه

اما يقوده مع دروب الجماله
والا يدله للردى لين يرديه

يوم رمش الشمس في جفني غفا
وابتدا ليل المواجع والجروح

وكل نورٍ في عيوني لك طفا
وكل عرقٍ في خفوقي لك يبوح

قلت ابيّح سرّك اللي لو خفا
بان في عينك ولك طرفٍ فضوح

ويش علمك يامضيعّة الدفا
في ليالي البرد والوقت الشحوح

ويش علمك يوم قلبك ما صفا
يالهوى القتال يا السم الذحوح

ما كفاك اللي عطيتك ما كفا
يا حسايف يوم لي قلبٍ نصوح

يالمقفي طالبك ما تقول افا
يوم روحٍ تشتكي لفراق روح

والموادع لاتعنّيها حفا
خطوةٍ جاتك وخطواتٍ تروح

وياهلا بالحزن يوم انّه لفا
وعزة الرجال اغلى من الطموح

ما حسبنا هروج جتنا من قفا
والرجل والنعّم ابو وجهٍ سموح

ان عطينا ما عطينا الا وفا
وان عسفنا ما عسفنا الا جموح

وان عفينا كلمة الشيخ ان عفا
والله انه ما يعرضها مزوح

وان قسينا جينا اقسى من صفا
وان تواضعنا خجل وجهٍ صبوح

ما عاد تفرق هي وصل والا جفا
وما عاد تفرق لوتجي والا تروح

.....

سرا البارق اللي له زمانين ماسرا
صدوق المخايل بارقه يجذب الساري

على فرعة الوادي وسيله تحدرا
وغنت طيور الماء على الحاير الجاري

مر بي غزال بعد عرفه تنكرا
عليه الله أكبر كل ماحل له طاري

نطحني بقرض الهيل حدر المشجرا
جميل المحاسن لا ظخيم ولا عاري

أرى سلت العاتق إلى صد مادرا
من سلت العرجون في صافح الذاري

ابو لبة مثل القمر ضاح وأسفرا
وإلى غابت القمرا تقدى به الساري

صويب الهوى مسكين مشيه على ورا
ترى النقص فيه حيله أقوى من الضاري

برى الجرح منه ومن الجرح مابرا
وهو يحسب إني يوم طال المدى باري

سليمان بن شريم

لو القصائد تنزرع في يديني
لازرع بدال الجرح تهليل وأعيادْ

بس القصيدة ضي في دمع عيني
كل الحكايا فيه موتٍ وميلادْ

الله يا للي كان وعدك حنيني
ما عاد يبقالي مع الليل ميعاد

ساعاته الخرسا إذا قلت ويني
قالت ورا حزنك بلا ولف وبلادْ

وأنفاسه السكرى شجن يحتويني
أشوف ضحك الكون من حولي حدادْ

.....

يا موطني يا موطني خير الاوطان
يا دارنا يا عزنا يا سندنا

تبقى لمن ذاق التعب رمش واجفان
فيك الأمان ومن عطاك انوجدنا

غلاك فينا ما يقدر بالاثمان
حنا زرعنا من غلاك وحصدنا

طلنا وطاولنا معك غر الامزان
واستلهمت منك النفوس وصعدنا

دام عزك ياوطن

العيشة اللي تدبل الكبد تنعاف
والنفس عن ما تكرهه مستريحة

نفوسنا دايم عفيفات ونظاف
وابدانا من كل علة صحيحة

صاحين صافين المشاريب واشراف
ما ناكل المتردية والنطيحة

يوم السنين الماضية حيل وعجاف
يندر لنا من هبة الريح ريحه

اكرام لو يلحق بنا نقص وخلاف
نملا الصحن ونلحفه بالذبيحة

صلبين في وقت الشدايد وعرّاف
منا المشورة واختيار النصيحة

وان ثارت الهيجا لنا وسط واطراف
وجه الحريب نقنعه بالفضيحة

خلف بن هذال

تلاوعني الفرقى وانا ما قبل اللوعه
و من لاعته فرقى الحبايب بكى منها

يهج الحشا و الجفن ما جفت دموعه
و ابا اشتم محبة بعض الاصحاب و العنها

عسى الله يروع اللي يسبب لي الروعه
متى الريح تحملني و اواطن مواطنها

و متى ربعي الغياب تلتم بربوعه
و اقبل خدودآ باسود الرمش دافنها

دقاقة ملامح تفرع البيض مربوعه
و من حذقها في ردن ثوبك تكفنها

أولع شموع الوجد و أطفي شموعه
و أنا والهواء غبه و تلطم سفاينها

خلف بن هذال

جيت لك من نجد عاشق مستهام
وقبل أجي لك بالجسد بـ الروح جيت

عاجز أوصف بس بي بيت وسلام
ياملامح في ملامحها ربيت

في حنينٍ ماوصل سره وحمام
يعرفه من ذاق ( مايك ) يـ الكويت

.....

صادفنّي ثلات إحترت ويّاهن
أبهرني صحيح وقمت أطالعهن

طولهن واحد ،،ولبستهن ،،وممشاهن
والله أعلم بعد يمكن طبايعهن

زاهياتٍ براقعهن ،، وتزهاهن
لعنبو جدهن ما أحلى براقعهن

لا رضى ابوهن عن الناس خبّاهن
ولا بغى يدمّر العالم يطلّعهن

قمت أعدّد على نفسي مزاياهن
وقمت أردد على نفسي وأنا أتبعهن

هذي أحلاهن،،لالا،،هذي أحلاهن
لالا،،لاذيك لا،،لاماهي بمعهن

وإستدارن ،، بجنبي شخص ناداهن
قلت ذي فرصتي بأقصد وأسمّعهن

للقصايد مع إني حافظ أرداهن
إرتبكت وعجزت أتذكر أروعهن

والسوالف بعد خلني أنساهن
ضيعنّي صحيح الله يضيعهن

والدليل إني تخربطت ويّاهن
أبسلم عليهن ،،قمت أودّعهن

خالد المريخي