فوق هام السحب ( الشعر الشعبي) على متن القوافي

جف صوت الحروف وشح فكر الكلام
‏وانعقد حبل فوقه عبرة جانيه

‏كل ماقلت هانت بذكر الله وانام
‏ناخ ركب الجروح اللي لفت عانيه

‏كل ليلة بصدري مؤتمر للسلام
‏وينقصف مايكمل بالفرح ثانيه

‏الطف الكذب قولة بأن حالي تمام
‏والمعارك بصدري طحن متفانيه

بين خابت ظنوني بين كثر الملام
ارجي الله جزانا ثمرة دانيه

كيف بقنع عزومي تستمر للامام
وانا حكمة حياتي فانيه فانيه

.....

اذكرك ياقلبي قبل عده سنين
‏تعشق تفاصيل الحياة وصخبها

عايش بدون قيود وبدون روتين
‏تمشي ورا احلامك وتنسى تعبها

هاذا وتوك ماوصلت الثلاثين
‏موتت شغفك الغامضه وش سببها

.....

يسعد مساكم ياجميلين الأطباع
ويسعد مساء برنامج اللي جمعنا
‏
‏الموقع اللي فيه من كل الأنواع
ياما حفرتو فيه وياما حفرنا

بقلمي

احرص على وقتك ترى الوقت غالي
مافات من وقتك مقدّر ومحسوب

.....

‏في وقتنا اختلت جميع الموازين
والود بين الناس قصرت حباله

ليت الرداء يرسم بوجه الرديين
ونميز أهل الطيب وأهل النذاله

.....

‏لاصار لك شخص تحبه وتغليه
‏لاتدخله في كل طاري وسيره
‏
‏سكر عيون الناس لاصرت شاريه
‏محد في هذا الوقت يعطيك خيره

.....

‏ماعاد صدري على الطعنات يملك مجال
وماعدت ابي عذر يشفع له عشان اقبله

بنساه ولا اتناسى لكن باي حال
بتجاهله لو يذبحني عليه الوله

ماكنت اود الجفا بالعكس اود الوصال
لكن ابي حل يرضينا عجزت اصله

واقفيت باخر لقى يوم ازرق الدمع سال
وسلكت درب البعاد وكان يامطوله

.....

‏انا ما اعرف ليه انتظاري عليه يزود
‏مع انه عنيد وقاسي القلب ومكوبر

‏يواعد على انه في اكتوبر علي يعود
‏ياكذبة ابريل تنافسك كذبة اكتوبر

.....

افا يصدري ضقت من جاير الوقت
‏خابرك يا صدري تشيل الثقايل

‏وش فيك علمني لك ايام مارقت
‏ضايق وفيك الهم صايل وجايل

‏خابرك ماعمرك للأحزان رافقت
‏واليوم كنك شايل جبال حايل

.....

‏ياغايب عن عيوني خاطري يطريك
‏في كل لحظة عيونك كيف بانساها

‏لو غبت ماغاب طيفك عني وطاريك
‏كنك معي في خفايا الروح واقصاها

.....