فوق هام السحب ( الشعر الشعبي) على متن القوافي

قالوا حبيبك يسمع الشعر قلت إيه
يقراه بعيوني قبل تسمعونه

لولاه حتى طاري الشعر مابيه
مير اكتبه من شان خاطر عيونه

هو روح شعري وامنياته وماضيه
جذع الشجر وش كان لولا اغصونه

اكتب لغيره والقصايد تجي فيه
كن القصايد حالفه ماتخونه

هذاك لامنه زعل قمت اهاديه
حتى وهو مخطي تعذرت دونه

يمكن لو انه يلمس الجرح بيديه
يستغرب ان اللي لمسها طعونه

ابطى وهو غايب وزلت حراويه
وأنا من العام اتحرى مزونه

هو مادرى اني في غيابه محاتيه
ليته نشّد عن حالي ياللي يجونه

وقلبي اللي توه افلت عراويه
كيف انسرق وضلوع صدري حصونه

عجزت ارده كن ماني براعيه
يوم انتثر شوقه وهاضت اشجونه

يبسن عروقه لكن اللي يعزيه
ان اكثر العالم تردد لحونه

خافوا من الله لاتجيبون طاريه
لاصرت انا موجود لاتذكرونه

لو كل غالي جابه الله لغاليه
ماشفت لك مخلوق تبكي عيونه

.....

ثنتين يعطونك معزه وتقدير
‏دينك وفعل البر في والدينك

‏وثنتين لو طال الزمن مابهن خير
‏هرج القفا ومجاملة من يهينك

.....

على حالنا ماغير الوقت فينا شي
نعيش بكرامة نفس ونموت ماخنا

ندور بياض الوجه ياهل الضمير الحي
نعز الرفيق ولا يجيه الخطا منا

طموحاتنا هي هي وعزومنا هي هي
تلين الجبال الراسيه مابعد لنا

.....

شي بقلبي واهجه مستمري
لولا ازرق الدخان يطفي لهيبه

سلط على الدخان لوهو مضري
له حزه عند احتكام المصيبه

وانا الذي مبدي على الناس سري
من خوف سودان الوجيه تحكيبه

.....

يابنت انا جني طويلات الاشبار
حرٍ سلايل حر ماني بمجنون

يوم اسجد لربي خوفي من النار
اللي عيال البوم فيها يطيحون

.....

لو جار فيك الزمن والوقت وأيامه
ماهي غريبه مادام الدنيا دواره

احدن يقوم الصباح يخطط احلامه
ويمسي وهو ف القبر سَرَت به اقداره

.....

نكتم شعور قلوبنا من حيا الروح
دام الاماني بالمحاني كثيره

أحيان نطريها على البال وتروح
وأحيان تطغى بالخفوق وتثيره

.....

خذ لك نصيحة واحد داج الاكوان
جرب غرابيل الدهر من نصيبه

من جاهد الدنيا بلا رووس جنحان
يصبر لصكّات الزمان الرهيبه

.....

‏يادانة البيت لاتمشين زعلانه
ترى ظروف الزمن ماهيب بيديني

الود ودي اسج الرجل يا الدانه
اطرب على طرقةٍ فيها تخاويني

.....

‏في زحمة العالم لو تمر لحظات
‏كنّ المكان اللي تجي فيه فاضي

‏بس أنت من يجعل من الهم بسمات
‏يمرك الزعلان و يروح راضي

.....