فوق هام السحب ( الشعر الشعبي) على متن القوافي

اصبري ياعين وأنتي من كبار العدود
‏لو يلج الموج وسط البحور الطاميه

‏اصبري لاعاد تشكين من كثر الجحود
‏لو تشوفين وعيون البشر متعاميه

‏اقبلت بقعا وهي ضاميه قدم الورود
‏ودها تارد وعييت واقفت ضاميه

‏كان ماتبكين لله في وقت السجود
‏ماتبكين المصايب وهي متراميه

ما انثنيت بساحة الحرب قدام الحشود
‏حاميٍ راسي وروس الدواهي حاميه

‏كيف تبغين انثني لك وقلبي فيه زود
‏ساميٍ نبضه وضخّات عرقه ساميه

.....

الناس تظهرها المواقف والأيام
والرجل تعرف قيمته من كلامه

رجلٍ يكفي فالمواقف ليا قام
ورجلٍ جلوسه خير له من مقامه

.....

لاتسمع الي قال واللي يقولون
بعض البشر ماهمهم غير قالو

ولا تميل لو شفت الخلايق يميلون
خليك جبل في ضلك الناس مالو

.....

خلاص لاترجع ترانا سلينا
ماكنت اصدق يوم اني انساك

في بعدكم ياما عليكم بكينا
واليوم ماتطري على البال ذكراك

انا ادري انك رغم صدك تبينا
لاشك ناس ضدنا تقصر خطاك

خل الذي غير حنانك علينا
يعطيك من قلبه ربع ماعطيناك

من سكرة الحب الصناعي صحينا
حتى المجالس عفتها خوف طرياك

ودعت ماضي حبنا وانتهينا
وقلب نسيته يوم لابد ينساك

ذكراك يالغدار هانت علينا
حتى دموع العين فرحت بفرقاك

حب جديد غير حبك لقينا
وحديتني جعل الليالي تحداك

.....

‏المحبَه أنت وأنت الغير عادي
‏من عرفتك والمشاعر مستقرّه

‏يبتسم يومي ويطرب بك فؤادي
‏راحتي برضاك حلّت كل مُرّه

‏هاك قلبي وهاك عين وهاك غادي
‏دلّه لدربك وخذ خيره وشرّه

‏وش أبي بوجيه خلق الله وأنادي
‏وجهك الله خالقه طيب ومسرّه

.....

من عطاني قدري أعطيه إحترامي
ومن تجاهلني تجاهلته وطفته

ومن يدوّر قربي أعطيه إهتمامي
ومن يقفّي عني أهملته وعفته

والمكان اللي ينزّل من مقامي
تنكسر رجلي ليا جيته وحفته

.....

التقينا والهوى ماله أمان
‏والخجل عم المكان وعمني

‏والسؤال اللي عجزت أرميه كان
‏أنت ماعندك يدين تضمني

.....

خل في صدرك على الدنيا قبول
واعرف ان الشمس تشرق لو تغيب

وعوّد لسانك ليا ضاقت يقول
الأماني في رجى الله ماتخيب

.....

مامشينا على طوعك ولا طوعه
والردي من خلقته مايدانينا

لو يشيل الحقد في داخل ضلوعه
ساعة الشدّة شفه يفتخر فينا

لاتعقّد عند الأجناب موضوعه
ماقضى موضوعه إلا بأسامينا

.....

ماتدري اني كم شعور ابتليته
وكم بيت دوزنته على نغمة الاه

مادام روحك للشعَر مستميته
تكفين قولي لي ياسهم ماشاء الله

.....